காக்கைக் குணம்.

**M.Jagadeesan** · **M.Jagadeesan** Fri Jan 08, 2016 9:34 am

ஒரு பழம்பாடல் காகங்களிடம் காணப்படும் ஆறு நற்பணபுகளைக் கூறுகிறது. எளிமையான ஒரு வெண்பா வடிவில் அமைந்துள்ள அப்பாடல் இதுதான்:

காலை எழுந்திருத்தல் காணாமலே புணர்தல்
மாலை குளித்து மனைபுகுதல் – சாலவே
உற்றாரோ(டு) உண்ணல் உறவாடல் இவ்ஆறும்
கற்பாயே காக்கைக் குணம்.

உரையே தேவையின்றி எளிதில் புரிகின்ற இப்பாடல் ‘விநோத ரச மஞ்சரி’ என்ற நூலில் காணப்படுகின்றது.
இது ஒரு நேரிசை வெண்பா . இந்த ஆறு குணங்களையும் நாமும் கற்கவேண்டும் என்று ஆசிரியர் வலியுறுத்துகிறார் .

இந்த வெண்பாவில் " காணாமலே " என்ற வார்த்தைதான் சிக்கலைத் தருகிறது . வெண்பா இலக்கணப்படி வெண்பாவில் கனிச்சீர் வரக்கூடாது . ஆனால் " காணாமலே " என்ற மூவசைச்சீர்
நேர்/நேர்/நிரை என்ற வாய்ப்பாட்டில் அமைந்து தேமாங்கனி என்ற கனிச்சீரில் வந்துள்ளது . இந்தத் தவறை ஒதுக்கிவிட்டுப் பார்த்தால் இது காக்கையின் நற்பண்புகளைக் கூறும் ஓர் அழகிய வெண்பா.