11 மாநில மொழிகளில் ஆண்ட்ராய்ட்...

**Powenraj** · **Powenraj** Sun Nov 15, 2015 8:30 pm

ஆங்கிலம் பேசப்படாத மக்களிடம், ஸ்மார்ட் போன் பயன்பாடு பெருக வேண்டும் என்றால், அவர்களின் மொழிகளில் ஆண்ட்ராய்ட் இயக்கம் பயன்பாட்டுக்குத் தரப்பட வேண்டும் என்பது அனைவரும் ஒப்புக் கொள்ளப்பட்ட உண்மை. இதனை உணர்ந்த, கூகுள் நிறுவனத்தின் தலைவர் சுந்தர் பிச்சை, இந்தியாவில் 11 மாநில மொழிகளில் ஆண்ட்ராய்ட் இயக்கம் தரப்படும் என அண்மையில் அறிவித்துள்ளார்.

பிரதமர் மோடி அவர்களின் டிஜிட்டல் இந்தியா திட்டத்தின் ஒரு பகுதியாக இந்த நடவடிக்கை இருக்கும். இது குறித்த கூடுதல் தகவல்கள் வெளியிடப்படவில்லை என்றாலும், மோடி அவர்களுக்குப் பிடித்த குஜராத்தி மொழி இந்த 11 மொழிகளில் ஒன்றாக இருக்கும் என சுந்தர் பிச்சை உறுதி அளித்ததாகத் தெரிகிறது.

ஹிந்தி மொழிப் பயன்பாடு ஏற்கனவே 94% புழக்கத்தில் உள்ளது. மற்ற இணையப் பயனாளர்களில், 37% பேர் தங்கள் மொழிகளில் இணையம் தரப்பட வேண்டும் என விரும்புவதாக, ஓர் ஆய்வு தெரிவித்துள்ளது.
ஏற்கனவே அறிவித்தபடி, கூகுள் நிறுவனம், இந்தியாவில் ரயில் நிலையங்களில் இலவச வை பி இணைய இணைப்பினை வழங்க இருக்கிறது. இந்த ஆண்டு இறுதிக்குள் 100 நிலையங்களில் இந்த இணைப்பு கிடைக்கும் என்றும், அதன் மூலம், நாளொன்றுக்கு ஒரு கோடி பேர் பயனடைவார்கள் என்றும் அறிவிக்கப்பட்டுள்ளது. இதன் பின்னர், மேலும் 400 ரயில் நிலையங்களுக்கு இது விஸ்தரிக்கப்படும். இது செயல்படுத்தப்படுகையில், இந்தியாவிலேயே மிகப் பெரிய அளவிலான வை பி இணைப்பு இதுவாகத்தான் இருக்கும். இந்த திட்டத்தில், கூகுளுடன் RailTel எனப்படும் இந்திய நிறுவனமும் இணைகிறது. ஏற்கனவே, இந்நிறுவனம் 63,500 கி.மீ. தூரத்திற்கு தன் வலைப்பின்னலை ஏற்படுத்தியுள்ளது.

இது 5,000 ரயில் நிலையங்கள் வழியே செல்கிறது. இதுவரை, 32,500 கி.மீ தூரத்திற்கு பைபர் நெட்வொர்க் ஏற்படுத்தப்பட்டுள்ளது. மேலும், 29,500 கிமீ தூரத்திற்கு இந்த நெட்வொர்க்கிற்கான பணி மேற்கொள்ளப்பட்டு வருகிறது.