புனித மாதம்'

ஆண்டின் கடைசி மாதமாக விளங்குவது டிசம்பர் மாதமாகும். முப்பத்தோரு நாள்களைக் கொண்டது. "டிசம்' என்ற லத்தீன் மொழியிலிருந்து வந்ததுதான் டிசம்பர். இந்த மாதத்தை "வின்டர்' மாதம் எனவும் "புனித மாதம்' எனவும் அழை

ஆண்டின் கடைசி மாதமாக விளங்குவது டிசம்பர் மாதமாகும். முப்பத்தோரு நாள்களைக் கொண்டது. "டிசம்' என்ற லத்தீன் மொழியிலிருந்து வந்ததுதான் டிசம்பர். இந்த மாதத்தை "வின்டர்' மாதம் எனவும் "புனித மாதம்' எனவும் அழைக்கிறார்கள்.

ஏசு கிறிஸ்துவின் பிறந்த தினமான டிசம்பர் 25-ஆம் நாளை கிறிஸ்துமஸ் தினமாக உலகம் முழுவதும் கொண்டாடுகிறார்கள். டிசம்பர் மாதத்தின் முதல் நாளிலிருந்தே கிறிஸ்துமஸ் விழாவிற்கான கொண்டாட்டங்கள் துவங்கிவிடும். சிறுவர்கள் "அட்வென்ட்' என்ற அட்டை விளையாட்டை விளையாடுவார்கள். ஏசு கிறிஸ்துவின் வாழ்க்கை வரலாற்றை விளக்கும் இந்த விளையாட்டை குதூகலமாக விளையாடுவார்கள்.

டிசம்பர் 6-ஆம் தேதி, புனித நிக்கோலஸ் தினமாகக் கொண்டாடுகிறார்கள். நான்காம் நூற்றாண்டைச் சேர்ந்த கிறிஸ்துவ பாதிரியாரான புனித நிக்கோலஸ் குழந்தைகளிடம் அன்பும் பாசமும் நிறைந்தவராக விளங்கினார். உடல் நலம் சரியில்லாதவர்களை குணப்படுத்துதல், ஏழைகளுக்கு உதவுதல் போன்ற நற்செயல்களைச் செய்து வந்தார். ஹாலந்து நாட்டு மக்கள் "சான் நிக்கோலஸ்' என்று இவரைக் கொண்டாடுவார்கள். இந்த வார்த்தையே பின்னாளில் மருவி "சான்டகிளாஸ்' என ஆனது!

கிறிஸ்துவ பெயர்களுக்கு தனியாக எந்தப் பொருளும் இல்லை என்கிறது மேல்நாட்டு அளவை இயல். ஆனால் பெயர்களுக்கும் பொருள் உண்டு. பழைமையான மொழிகளிலிருந்து இப்பெயர்கள் வருகின்றன.

பெஞ்சமின் என்ற பெயர், ஹீப்ரு மொழியிலிருந்து வருகின்றது. ஹீப்ரு மொழி, ஏசு பிரான் பேசிய மொழியாகும். "ஹென்றி' என்றால் "வீட்டுத் தலைவன்' என்று பொருள். "ஜான்' என்றால் "இறைவனின் கொடை' என்று பொருள்.

டிசம்பர் மாதம் இரண்டாம் வாரத்தில் செயின்ட் லூசியா தினம் கொண்டாடுகிறார்கள். நம்மூரில் கார்த்திகை தீபம் கொண்டாடுவது போல, இது, வீடுகளில் தீபங்களை ஏற்றும் தினமாகும்.

சிறுமிகளும் இளவயதுப் பெண்களும் தேவதை போல் வெள்ளை உடை அணிந்து, குடும்ப உறுப்பினர்கள் அனைவருக்கும் இனிப்பு, பலகாரம், தேநீர் ஆகியவற்றைப் பரிமாறுவர். வீடு முழுவதும் வண்ண விளக்குகளாலும் மெழுகுவர்த்திகளினாலும் அலங்கரித்திருப்பர்.

சுதந்திர இந்தியாவின் முதல் குடியரசுத் தலைவராக இருந்தவர் ராஜேந்திர பிரசாத். இவர் 1884-ஆம் ஆண்டு டிசம்பர் 3-ஆம் நாள் பிறந்தார். தேர்ந்த ஆளுமை, துணிச்சல், தன்னம்பிக்கை.... ஆகிய பண்புகளைக் கொண்டிருந்த ராஜேந்திர பிரசாத், இரண்டு முறை குடியரசுத் தலைவராகப் பதவி வகித்தார். நாட்டின் உயரிய விருதான "பாரத ரத்னா' விருதையும் பெற்ற பெருமைக்குரியவர் ராஜேந்திர பிரசாத்.

நன்றி தினமணி