மனிதநேயமே மூச்செனக் கொள்வோம்!

-


இனி ஒரு விதி செய்வோம்” – அதை
உயிரினும் மேலெனக் காப்போம் – தனி
மனிதச் சுதந்திரம் பேணுவோம் – அதை
தரணிக்கேத் தந்து மகிழ்வோம்!!!
–
பாருக்குப் பெருந்துயரம் பாவம் மடமையால்
பாரினையே அச்சுறுத்தும் பயங்கரவாதக் கடும்துயரம்
வேரோடுப் பிடிங்கி எறியாமல் போனால்
வேதனையே இனியோங்கி இங்குயரும்!
–
நாடு பெற்றது சுதந்திரம் என்பதறிவோம் – அது
கேடுகெட்ட ஆயுதத்தால் அன்றி – பெரிதும்
பாடுபட்டுப் போற்றிய அஹிம்சை யெனும்
கடும் தவத்தால் அன்றோ!
–
நாடு சுதந்திரம் பெற்றென்ன ஆவது!
நாமும் சுதந்திரம் பெற வேண்டாமோ?
மகத்தான வாழ்விற்கு வழிகூறும் மதங்களின்
மகத்துவம் மறந்து திரியலாமோ?
–
அந்நியனை விரட்டி சுதந்திரம் பெற்றும்
அன்யோன்யத்தை அழிக்கும் மடமை கொண்டு
அடுத்தவர் தனின் சுதந்திரம் பறிக்க
அயராது கூப்பாடு போடுவோருமுண்டு!
வன்முறை என்பது இம்மண்ணிற்கு அன்னியம்
–
வம்புப்பேசுவது இம்மண்ணின் மைந்தனுக்கு அன்னியம்
வாதம் செய்தோம் நமக்குள்தீவிர வாதமாயினும்
பேதம் காணோம்! மனிதநேயம் காத்தோம்!
எங்கேப் போனது அந்த பெருந்தன்மை?
–
எங்கிருந்து வந்தது இந்தச் சகிப்பின்மை?
அந்நியனை விரட்டிய ஒற்றுமை – இங்கே
அநியாயமாய் செத்து போனதேனோ?
–
மதங்கள் மொழிகள் மகத்து வமானவை உயர்
மனித வாழ்விற்கு அகத்தூய்மை தானவை
மதம் கூறிய வாழ்க்கை வாழோம்!
மதமே வாழ்க்கையாய்ப் போனோம்!
–
சுதந்திரநாடு அதன்மக்கள் நாம் யாவரும்
சுதந்திரமானவர்கள் என்றெண்ணி வாழ்கிறோம்
சுதந்திரம் என்பது யாது? – பொறுப்புணர்வோடு
சுயவிருப்பமாற்றும் உரிமை யன்றோ!
–
பெற்றோம் சுதந்திரம்; பேணிக் காப்போமா? – மாசு
உற்ற மாக்களின் சூழ்ச்சியில் வீழ்வோமா?
மதத்தின் பெயரால் நம்முள்பிளவு பட்டால்
மகத்துவ மிகுநாடிது மண்ணோடுபோகும்!
–
இனம் மதம் மொழி என்று பேதம் கொண்டு
இன்று உலகை மிரட்டும் பயங்கரவாதம் வென்று
இந்தியர் நாமென்று சிந்தனைக் கொள்வோம்!
இனிமனிதநேயமே நம்மூச்செனக் கொள்வோம்!
–
அன்னிய தேசத்தின் சூழ்ச்சியில் அகப்படோம் – இந்த
புண்ணிய தேசத்தின் மாண்பினை காப்போம்
பயம் கோபம் வெறுப்பு பதட்டம் தொலைத்து
உபயம்மிகு உன்னதவாழ்வை வெல்வோம்
–
எம்மதமும் சம்மதம் இங்கே – உலகின்
எல்லா மதத்தின் மூலமும் இங்கே
எல்லையில்லா பேரின்பம் எங்கே? அதையுணர்த்தும்
எங்கள் கலாச்சாரமும் இங்கே!
–
பாரதம்நம் தாயென்றால் நாமிருவரு மதன்சேயன்றோ!
பாசிசம்கொன்று நம்முள் பாசம் கொள்வோம்
பயங்கரவாதம் ஒழித்து; நல்பாரதம் வெல்வோம்!
வாழ்கபாரதம் வாழியபாரத மணித்திருநாடே!
–
————————-
கோ.ஹாலாஸ்யம்

நன்றி – கவிதை மணி