வேண்டாம் யாசகம் கேட்கும் அவலநிலை!…

**ayyasamy ram** · **ayyasamy ram** Thu Dec 10, 2015 6:56 am

-
-கோவில் வாசல்,
தேவாலயச் சுவரோரம்,
மசூதி வாசல், இங்கெல்லாம்
மதவேற்றுமை இல்லை
யாசகம் கோரும் முகங்களில்….
–
தீபாவளியோ……
ரமலான் பெருநாளோ….
கிறிஸ்துமஸ் தினமோ…..
எந்த நாளிலும்
இனவேற்றுமை இல்லை
யாசகம் வேண்டும் கரங்களில்……
–
பசியறியாது சாதி……
பஞ்சமறியாது நீதி……..
பேரிடர் அறியாது பேதம்…..
பிழைக்கவழி யாசகமெனில்….!
–
யாசகக் கரங்கள்
வானம் பார்க்கும் ,
தானஞ்செய் கைகள்
பூமியை நோக்கும்!
–
பூமி விளைவிக்கும்
பொருளறிந்தே
பூமி நோக்கும் கொடுக்கும் கைகள்,
எதிர்பார்க்கவைக்கும்
–
தன்மையறிந்தே
வானம்பார்க்கும் யாசகம்!
–
யாசகம் கேட்பது இழிவன்று…
யாசகம் கேட்டபின்
யாசிப்போர்க்கு இடமறுக்கும்
வாசகச் சொல்லே மிக இழிவு!
–
வாமனனாய் மாவலியிடம்
அந்தணனாய் கர்ணனிடம்
யாசகம் கேட்டவன் பரந்தாமன்…
–
யாசகங் கேட்டே
உயிர்வாழும் நிலை படைத்த
ஆண்டவனே அழிக வெனக்
குறள் செய்தான் வள்ளுவன்.
–
இல்லையெனும் நிலைவரின்
இவ்வுலகை அழிப்போம் எனச்
சூளுரைத்தான் பாரதி.
–
எதுவாயினும் என்ன……
இந்நிலை எவர்க்கும் வேண்டாம்
யாசகம் கேட்கும் அவலநிலை!
–
——————————–

“இளவல்” ஹரிஹரன், மதுரை.
நன்றி- கவிதைமணி
படம்- இணையம்

============