நயன்தாராவால் நிம்மதி போச்சு! – இயக்குனர் பாண்டியராஜ்

சச்சின் டெண்டுல்கர் போல களத்தில் நின்று நிதானமாக
வெற்றிகளை ஈட்டி வரும் இயக்குநர் பாண்டியராஜ்.

‘இது நம்ம ஆளு’ ‘பசங்க 2’ முடித்து ‘கதகளி’ படப்பிடிப்புக்கு
பிஸியாகிக் கொண்டிருந்தவரை ஒரு மழை நாளில் சந்தித்தோம்.

பசங்க ஒன்றிலிருந்து பசங்க 2 எப்படி வித்தியாசப்படுகிறது?

நகரத்து சூழலில் தனியார் பள்ளிகளில் மெட்ரிகுலேஷன்
ஸ்கூலில் படித்து அபார்ட்மெண்ட்ஸில் வாழ்கின்ற குழந்தைகளின்
உலகம் எப்படிப் பட்டது என்பதே கதைக்களம்.

முதல் படத்திற்கும் இதற்கும் எந்த சம்பந்தமும் இல்லை.
அதில் நடித்தவர்கள் எவரும் இதில் இல்லை.

மெட்ரிகுலேஷன் பள்ளி ஆசிரியர்களை, பெற்றோர்களை,
மனநல மருத்துவர்களைச் சந்தித்து நிரம்ப விஷயங்களைக்
கேட்டறிந்து ஆய்வு செய்து இந்தக் கதை உருவம் பெற இரண்டு
வருடம் எடுத்துக் கொண்டோம்.

இதில் மாஸ் ஹீரோவுக்கு என்ன வேலை?

குழந்தைகளை பின்னணியாகக் கொண்டு கலகலப்பாக
ஜாலியாக போகும் கதையில் ஒரு நல்ல மெசேஜ் சொல்கிறோம்.
அந்த மெசேஜை ஒரு புதுமுகத்தின் வாயிலாக சொல்வதைவிட,
நல்ல இமேஜ் உள்ள பெண்களுக்குப் பிடித்த ஒரு மாஸ் ஹீரோ
சூர்யா செய்தால் நல்லா ரீச் ஆகும் என்பதாலே சூர்யாவை
முக்கியமான கேரக்டரில் நடிக்க வைத்தேன்.

சூர்யாவை எப்படி சம்மதிக்க வைத்தீர்கள்?

ஒரு நாள் சூர்யா சாரை பார்க்கப் போனேன் ‘நாங்க நம்ம ஒரு படம்
பண்ணுவோம். எனக்காக ஒரு நல்ல சப்ஜெக்ட் சொல்லுங்க’ என்றார்.

நான் வந்தது உங்களுக்கு கதை சொல்லத்தான்.
ஆனால் உங்களுக்காக அல்ல உங்கள் பேனருக்காக ஒரு குழந்தைகள்
கதை சொல்ல வந்தேன் என்றேன்.

‘அப்படியா… சூப்பர் சொல்லுங்க.. பண்ணுவோம்’ என்றார்.
அப்படித்தான் இந்தப் படம் தொடங்கியது. கதை கேட்டு பிடித்துப்போய்
அவரே தயாரிக்க ஓகே சொன்னார்.

அப்புறம், குழந்தை நல டாக்டர் வேடத்தில் வேறு யாரும் நடிப்பதை விட
நீங்களே செய்தால் நல்லா ரீச் கிடைக்கும் என்றதும் நடிக்கவும் சம்மதித்தார்.

குழந்தைகள் டாக்டர் என்றால் சீரியஸாக கேரக்டர் இல்லை.
குழந்தைகளுடன் ஜாலியாக லூட்டி அடிக்கிற டாக்டர்!
குழந்தைகள் விளையாடுவதை ரசித்துப் பார்த்து அவர்களோடு கலந்து
பழகி செய்திருக்கிறார்.

பெரிய ஸ்டார் என்ற பந்தாவை எந்த இடத்திலும் வெளிப்படுத்தவில்லை.
அவரைப் பொறுத்தவரையில் இது ஒரு சின்ன வேடம் என்பதில்லை.
ரொம்ப முக்கியமான வேடம். குழந்தைகளை நாம எப்படி பார்க்கணும்.
அவர்களை எப்படி ஹேண்டில் பண்ணணும் என்பதை சூர்யா கேரக்டர்
வாயிலாக வெளிப்படுத்துகிறோம்.

நடிப்பை விட்டு ஒதுங்கிய அமலாபாலை மறுபடியும் எப்படி திரைக்குள்
கொண்டு வந்தீங்க?

இந்த படத்தில் முதலில் நடிக்கப் பேசப்பட்டது சூர்யாவுடன் ஜோதிகாவையும்
நடிக்க வைக்கலாம் என்றுதான்.
ஜோதிகாவுக்கு கேரக்டர் பிடித்துப்போய் ஓ.கே. சொல்லி விட்டார்.
அந்த நேரத்தில் அவங்க ’36 வயதினிலே’ பண்ணிட்டிருந்தாங்க. அவங்களுக்கு
பதிலாக யார் என்று யோசித்தபோது திருமணமான முன்னணிப் பெண்மணி
அமலாபால் செய்தால் நன்றாக இருக்கும் என்று முடிவு செய்தேன்.

அதே போல் பிந்து மாதவியும் ஒரு குழந்தைக்குத் தாயாக நடிக்க
சம்மதித்ததற்கு காரணம் சூர்யா படத்திற்குள் வந்த பின்தான் நடந்தது.

உங்க பசங்க பத்தி சொல்லுங்க?

முதல் பையன் அன்புக்கரசு யூகேஜி.
இரண்டாமவர் ஸ்ரீரஞ்சன் இனிமேல்தான் ஃப்ரீகேஜி போகப் போகிறார்.
என் வீட்டுச் சுவர்களை வந்து பார்த்தால் எங்கும் என் குழந்தைகள்
கைவண்ணமே தெரியும்.

யாருடன் செல்ஃபி எடுத்துக்கொள்ள ஆசை?

இது நம்ம ஆளு சமயத்தில் நானும் கேமரா மேனும் நயன்தாராவுடன்
சேர்ந்து நிற்பதுபோன்று நயன்தாரா ஒரு செல்ஃபி எடுத்தார்.
அதைப் பார்த்து வீட்டில் இடி மின்னல் வெட்டி பெரிய வில்லங்கமே
ஆயிட்டது.

ஒரு போட்டோவுக்கு இவ்வளவு பவரானு அப்பத்தான் புரிஞ்சுது.
எனவே இனி எந்த நடிகையுடனும் செல்ஃபி எடுப்பதில்லை.
–
——————-

– சபீதா ஜோசப்
குமுதம்