நிலத்தின் கருணைதான் நெல்மணி!

**ayyasamy ram** · **ayyasamy ram** Mon Dec 07, 2015 6:29 am

-

உயர்ந்த மணியெதுவென
ஒருபோட்டி நடந்தது.
மின்னி
மினுக்கி
நவமணிகள்
நடந்து வந்தன.
–
நெல்மணி வந்தது
நெளிந்தும் தலைகுனிந்தும்!

அரங்கம் அதிர்ந்தது
ஆரவாரித்து!

ஒவ்வொரு
நெல்மணியிலும்
இறைவனாய்
ஒளிவீசுகிறான்
உழவன்!
–
காற்றுப் போகும் திசையில்
கழுத்தை வளைத்து
ஏதோ
கதைபேசிச் சலசலக்கும்
கதிர்மணியின் அழகை
வரப்பில் நின்று பார்த்தால் போதும்;
மனசுக்கு வண்ணங்கள் பூசும்!
–
வள்ளலார்
செல்வந்தர்களிடம்
சென்று யாசித்தது
பொன்மணியை அல்ல
நெல்மணியைத்தான்!
–
சொல்மணி வேண்டுமா?
நெல்மணி வேண்டுமா?
என
வறுமையில்
வாடும் புலவரைக் கேளுங்கள்;
வாய்மூடிச் சொல்வார்
வயிற்றைத் தடவி!
–
உயிர் வளர்ப்பதும்
உடல் வளர்ப்பதும்
உலகை வளர்ப்பதும்
நீயல்ல;
நெல்மணியே!
–
நிலத்தின் கருணைதான்
நெல்மணி!
–
—————————-
-கோ. மன்றவாணன்
கவிதை மணி