'வாட்ஸ் ஆப்' தகவல்: பரிசீலிக்க பொன்ராஜ் அறிவுரை

-
'வெள்ளம் சூழ்ந்த பகுதிகளில் பாதிக்கப்பட்டவர்களின்,
'108' ஆம்புலன்ஸ் சேவை அழைப்பு, 'வாட்ஸ் ஆப்' தகவல்களையும்
தமிழக அரசு பரிசீலித்து நடவடிக்கை எடுக்க வேண்டும்' என,
மறைந்த முன்னாள் ஜனாதிபதி அப்துல் கலாமின் அறிவியல்
ஆலோசகர் பொன்ராஜ் யோசனை தெரிவித்துள்ளார்.
-
இது குறித்து அவர், தன் முகநுால் பக்கத்தில், 'தமிழக அரசுக்கு
ஒரு அவசர அழைப்பு' என்ற தலைப்பில் குறிப்பிட்டுள்ளதாவது:
-
குழப்பம்:
-
வெள்ளத்தால் பாதிக்கப்பட்டவர்கள் தொடர்பு கொள்ள,
பல தொடர்பு எண்கள் வழங்கப்படுகின்றன. இந்த எண்கள்
வெவ்வேறு துறைகளிடம் இருப்பதால், எந்த கோரிக்கைக்கு
எந்த துறையிடம் விண்ணப்பிப்பது என்று தெரியாமல் குழப்ப
மடையும் நிலை ஏற்படுகிறது.

எனவே, 108 ஆம்புலன்ஸ் சேவைக்கான கட்டுப்பாட்டு அறையை,
வெள்ள நிவாரண பணிகள் தகவல் தொடர்புக்கான கட்டுப்பாட்டு
அறையாக பயன்படுத்த அரசு முன்வர வேண்டும்.

இதனால், அவசரகால அழைப்புக்களை பெறுவதில் ஏற்படும்
குழப்பங்களை தவிர்க்கலாம்.

*வெள்ளம் பாதித்த பகுதிகளை கண்டறிய, அண்ணா பல்கலையின்,
எம்.ஐ.டி.,யில் உள்ள ஆளில்லா விமான கண்காணிப்பு குழுவினரை
பயன்படுத்தலாம்

*அவசர கால அழைப்புகள் குறித்த தகவல்களை ராணுவம்,
விமானப்படை, கடற்படை, தேசிய பேரிடர் மேலாண்மை குழு தலைவர்
ஆகியோருடன் தமிழக அரசு அதிகாரிகள் பகிர்ந்து கொள்வதுடன்
ஒருங்கிணைந்து செயல்படலாம்

*இதன் வாயிலாக எந்தெந்த பகுதிகளுக்கு மீட்பு படகுகள்,
ஹெலிகாப்டர்களை அனுப்பலாம் என்பதை முடிவு செய்யலாம்

*நிவாரண பணிகளை ஒருங்கிணைத்து மேற்கொள்ள, 'ஹாம் ரேடியோ'
ஆப்பரேட்டர்களையும் தனியார் பண்பலை வானொலி சேவையையும்
பயன்படுத்த அரசு முன்வர வேண்டும்

* போலீஸ் தரப்பில், நிவாரண பணிகளை ஒருங்கிணைக்கும் அதிகாரி
யார் என்பதை வெளிப்படையாக அறிவிக்க வேண்டும்.

*தாம்பரம், குரோம்பேட்டை, பெருங்களத்துார், ஊரப்பாக்கம், இரும்புலியூர்,
அடையார், போரூர், ராமாபுரம், பழைய மாமல்லபுரம் சாலை,
கிழக்கு கடற்கரை சாலை ஆகிய பகுதிகளில் இருந்து தான் அதிக அளவில்
ஆபத்து கால அழைப்புகள் வருகின்றன.

எனவே, இந்த பகுதிகளுக்கு கூடுதல் கவனம் செலுத்தி நிவாரண பணிகளை
தீவிரப்படுத்த வேண்டும்

*அடுத்த மூன்று தினங்களுக்கு பலத்த மழை இருக்கும் என கணிக்கப்
படுவதால், வெள்ளம் பாதித்த பகுதிகளுக்கு அமைச்சர்களை அனுப்புவதற்கு
பதில், படகுகளை அனுப்பி நிவாரண பணிகளை மேற்கொள்வது நல்லதாக
இருக்கும். மேலும் இப்பணிகளுக்கு மீனவர்களை தன்னார்வலர்களாக
பயன்படுத்தலாம்.இவ்வாறு அவர் குறிப்பிட்டுள்ளார்.
-
-------------------