“நாட்டைச் சீரழித்தது போதும்”:ரசாலி

அரசியல் ஆதாயத்துக்காக அரசமைப்பைப் புறக்கணிப்பவர்கள், நாட்டின் அடித்தளத்தையே அடித்து நொறுக்குகிறார்கள். இது நிற்க வேண்டும் என்று மூத்த அம்னோ தலைவர் துங்கு ரசாலி ஹம்சா கேட்டுக்கொண்டிருக்கிறார்.

பேராக் அரசியல் நெருக்கடி பற்றிக் கருத்துரைத்த அவர், “ஒரு வளமான மாநிலம் நலிவுற்றுக் கிடக்கிறது”, என்று வருத்தப்பட்டார்.

பாரிசான் நேசனல் அங்கு ஆட்சியைக் கைப்பற்றியதால் சட்டத்துக்குப் புறம்பான தொடர் விளைவுகள் பல ஏற்பட்டு இப்போது அங்கு சட்டப்படியான அரசு இல்லை என்கின்ற நிலை உருவாகியுள்ளது.

“ஒரு பொய் பல பொய்களுக்கு இட்டுச் செல்லும். ஒரு தவறான செயல், பல கேலிக்குரிய செயல்களுக்கு இட்டுச் செல்லும்.

“இந்தக் கோட்பாட்டைப் பிள்ளகளுக்குச் சொல்லிக் கொடுக்கிறோம். இது எளிய, ஆனால் உலகறிந்த உண்மை. இதுதான் இப்போது பேராக்கில் நிகழ்வதைப் பார்க்கிறோம்.”

ஒவ்வோர் அத்துமீறலாலும், நமது கண்ணியமும் கட்டுப்பாடும் அரசமைப்புடன் நம்மைப் பிணைத்துவைத்துள்ள பழக்கவழக்கங்களும் தளர்வடைகின்றன.

நாகரிக வாழ்க்கையை உறுதிப்படுத்தும் சட்ட ஆளுமை மீதான நம்பிக்கையும் மறைந்து போகிறது என்றவர் சுட்டிக்காட்டினார்.

“சட்டங்கள் கண்ணுக்குத் தெரியாதவை. அவற்றைப் புரிந்துகொண்டு பின்பற்றினால் மட்டுமே அவற்றுக்கு அர்த்தம் உண்டு.”

“ஆட்சியில் உள்ள அரசு, அதிகாரப் பிரிவினை போன்ற அடிப்படைக் கோட்பாடுகளைப் புறக்கணிக்கும்போது, அரசமைப்பு மடிந்துபோன காகிதத் துண்டாக மாறிவிடுகிறது”, என்றாரவர்.

“அரசமைப்பு என்பது சாதாரண சட்டமல்ல. அதுவே நாட்டின் அடிப்படைச் சட்டம், அதுதான் நாட்டின் அடிப்படைக் கொள்கைகளை வரையறுக்கிறது, தனிப்பட்டவர்களின் உரிமைகளுக்கு உத்தரவாதமளிக்கிறது, தேசிய கட்டுமானத்தின் கடமையை, அதிகாரத்தை எடுத்துரைக்கிறது.”

“மலேசியா, ஒரு நாடாக நிலைத்திருப்பதற்கு சட்ட அதிகாரத்தை வழங்கும் அடித்தளமாக, ஊற்றுக்கண்ணாக அது திகழ்கிறது”, என்று அந்த முன்னாள் நிதி அமைச்சர் குறிப்பிட்டார்.

மலேசியா இன்று: