பீகார் தேர்தலில் தோல்வி: மக்கள் தீர்ப்பை ஏற்றுக் கொள்கிறோம்; பா.ஜனதா தலைவர் அமித்ஷா கருத்து

புதுடெல்லி,
-


பீகார் சட்டசபை தேர்தலில் மக்கள் அளித்த தீர்ப்பை ஏற்றுக் கொள்கிறோம் என்று பா.ஜனதா தலைவர் அமித்ஷா கூறினார்.

மகா கூட்டணி வெற்றி

பீகார் மாநில சட்டசபைக்கு நடந்த தேர்தலில் முதல்-மந்திரி நிதிஷ்குமாரின் ஐக்கிய ஜனதாதளம், லாலுபிரசாத்தின் ராஷ்டீரிய ஜனதாதளம், காங்கிரஸ் ஆகிய கட்சிகளின் மகா கூட்டணி 170-க்கும் அதிகமான தொகுதிகளில் வெற்றி பெற்று ஆட்சியை கைப்பற்றியது.

பா.ஜனதா தலைமையிலான தேசிய ஜனநாயக கூட்டணி எதிர்பார்த்த வெற்றியை பெறவில்லை.

பா.ஜனதாவின் தோல்வி குறித்து அக்கட்சியின் தலைவர் அமித்ஷா, டுவிட்டரில் கூறியதாவது:-

ஏற்றுக் கொள்கிறோம்

பீகார் சட்டசபை தேர்தலில் பெரும் வெற்றி கண்டுள்ள முதல்-மந்திரி நிதிஷ்குமார், ராஷ்டீரிய ஜனதாதள தலைவர் லாலுபிரசாத் ஆகியோருக்கு வாழ்த்துகள். இந்த தேர்தலில் மக்கள் அளித்த தீர்ப்பை ஏற்றுக் கொள்கிறோம்.

புதிய அரசு, பீகாரை வளர்ச்சிப் பாதைக்கு கொண்டு செல்வதற்கும் வாழ்த்துகிறோம்.

இவ்வாறு அதில் அவர் கூறியிருந்தார்.

இந்த நிலையில் டெல்லியில் அமித்ஷா வீட்டில் நேற்று கட்சியின் மூத்த தலைவர்கள் அவரை சந்தித்து பேசினர்.

இன்று ஆட்சி மன்றக் குழு

பீகார் சட்டசபை தேர்தல் தோல்வி குறித்து ஆய்வு செய்வதற்காக பா.ஜனதா கட்சியின் ஆட்சி மன்றக் குழு கூட்டம் இன்று(திங்கட்கிழமை) டெல்லியில் நடக்கிறது. இக்கூட்டத்தில், எதிர்பார்த்த வெற்றி கிடைக்காமல் போனதற்கான காரணம் குறித்து விவாதிக்கப்படுகிறது.

இதுபற்றி கட்சி தலைவர்களில் ஒருவரும் மத்திய மந்திரியுமான ராம்கிருபால் யாதவ் கூறுகையில், “பீகார் சட்டசபை தேர்தல் தோல்வியின் பின்னணிக்கான காரணங்கள் பற்றி கட்சி சுயபரிசோதனை செய்யும்’’ என்றார்.
=
தினத்தந்தி

சோனமுத்தா போச்சா

பாரதிய ஜனதா எங்கே தவறு உள்ளது என்பதை கவனிக்க வேண்டும்.