என்னுடையது

முனைவர் ப.குணசுந்தரி · 18/07/2015

என்னுடையது
------------------------

அதைப் பற்றிய பயம்
இருந்தது இல்லை
பெரிசா எனக்குப் பட்டது.
எதையும் சொல்லக் கேக்கிறதை விட
பட்டுத் தெரிஞ்சிக்கணும்னு
சொல்லுகிற தாத்தா
எப்பவும் நெனப்புல.

என்னிலிருந்து
கரைந்து போகிற
உயிர்ப்புக்காக வருத்தப்பட்டதில்ல
நெனச்சும் பார்த்தது இல்ல.

புத்தகத் தூசியும்
தட்டினாத்தான் உதிரணுங்கிற
நெனப்ப மீறி
ஒவ்வொரு முறையும்
அது தானே நிகழுது.

கிழிஞ்சது
கிழியாதது எல்லாம்
என் பகுதியில் பத்திரமாய்
தாத்தாவையும்
மிஞ்சிட்டன்னு சொல்லுகிற
அவ பார்வை
எனக்குள்ள அரிக்கிது.

வயசானவங்க
குழந்தைக்குச் சமம்

எதிர்த்த வீட்டு லட்சுமி பாட்டி
எப்பவும் குழந்தைதான்ற
பாப்பம்மாவின் பூசணி வாயில்
கைகால்களை நீட்டி
அருவருப்பாய் நெளியும் அது.

அனுமதியினைத் தாங்கி
அடையாளமிடப்பட்ட பொருட்களுள்
ஒன்றாய் அதுவும்.

வரவை நோக்கிய இருப்பு
முழுமை அல்ல
இரண்டன் கலப்பே முழுமை
அதுவா இதுவா
எளிதில் வசப்படாத கருத்து
எப்பொழுதாவது
அலைக்கழிக்கிறது.

இருப்பை அந்நியமாக்கும்
உரு தரும் முழுமையில்
விலகி நிற்க இயலாது
எதன் சார்பிலும்
யாருக்காகவும்
இழப்பதற்குமில்லை.

அது என்னுடையது
ஒவ்வொரு முறையும் தானே நிகழும்

முனைவர் ப.குணசுந்தரி தர்மலிங்கம்
(வார்ப்பு மின்னிதழில் வெளிவந்தது)

**பழ.முத்துராமலிங்கம்** · 27/09/2015

என்னுடையது

என்னுடையது

Re: என்னுடையது

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக