அழியாத நினைவுகள்.......

அழியாத நினைவுகள்.......
*************************
கொரியத் தமிழ் உறவுகள் குறித்தான பன்னாட்டுக் கருந்தரங்கம் முடிந்து வீடு வந்து சேர மணி 7.30 ஆயிற்று. நேற்று முழுவதும் ஏதையோ இழந்த மாதிரியே இருந்தது. மனம் ஒரு நிலையில் இல்லை. என் அலைபேசிக்கு கவிஞர் கவிவாணன் அவர்களிடமிருந்து நான்கைந்து அழைப்புகள் வந்திருந்தன. எடுக்காததால் ஒரு குறுஞ்செய்தியும் அனுப்பியிருந்தார். அதிர வைத்த அந்தக் குறுஞ்செய்தி VAIGAI ANISH EXPIRED.

அன்பு நண்பர் வைகை அனிஷ் இதயக் கோளாறினால் அவதிப்பட்டுக்கொண்டு இருந்தார். அதனுடன் கள ஆய்வு செய்து தரமான வரலாற்றுக் கட்டுரைகளைத் தொடர்ந்து எழுதிக்கொண்டிருந்தார். ஒவ்வொரு கட்டுரை எழுதியவுடனும் என் மின்னஞ்சலில் அது நிற்கும். அனுப்பிவிட்டு அழைத்து தகவல்சொல்லி, படித்துக் கருத்துக் கூறும்படி கேட்பார். ஒரு வாரத்திற்குள் நான் அழைத்துப் பேசவில்லை என்றால் மீண்டும் அழைத்து விடுவார்.

மூன்று ஆண்டுகளாகத் தொடர்ந்த இந்த முகம் காணாத நட்புக்குக் காரணம் “அழிந்த ஜமின்களும் அழியாத கல்வெட்டுகளும்” என்னும் அவரது முதல் நூலுக்கு நான் அணிந்துரை கொடுத்ததுதான். மேடம் என் எல்லா நூலுக்கும் நீங்கள்தான் அணிந்துரை தர வேண்டும் என்று அப்போதே அன்புக்கட்டளை இட்டார். அதைப் போலவே சென்ற வாரம் மின்னஞ்சலில் அடுத்த நூலை (அறிந்த ஜமின்களும் அறியாத கல்வெட்டுகளும்) அனுப்பி வைத்திருந்தார். படி எடுத்தும் அஞ்சலில் அனுப்பி வைத்தார்.

அவ்வளவு ஆழமான ஆராய்ச்சி. நூல் முழுவதும் படித்துக் குறிப்புகள் எடுத்து விட்டேன். தட்டச்சு செய்து அனுப்ப வேண்டும் அவ்வளவுதான். கோம்பை நாய்கள் மீது ஜமின்தார்கள் கொண்டிருந்த ஆசையைப் பற்றி வைகை அனிஷ் எழுதியிருப்பதைப் பற்றி நம்ம ரா.ரா விடம் பகிர்ந்து கொண்டேன்.
சென்ற புதன் கிழமை இரண்டு நாட்கள் முன்பு, கடையெழு வள்ளல்களின் விபரம் தர முடியுமா என்று கேட்டார். அந்தக் குரல் இன்னும் ஒலித்துக் கொண்டிருக்கிறது.

கடையெழு வள்ளல்கள் பற்றிய விபரம் தருகிறேன். எழு தோழா.....  எழுந்து வா தோழா.....

வைகை அனிஷின் முந்தைய நூலை வாசிக்க.......
http://www.pratilipi.com/…/azhintha-zaminkalum-aliyatha-kal…....

ஆழ்ந்த வருத்தங்களை பகிர்ந்து கொள்கிறேன் ஆதிரா.

நமக்கு நேரம் வரும் வரை மற்றவர்களுக்கு வருவதை வேடிக்கை பார்த்துத் தானே ஆகணும்.

வைகை அனிஷ் நம்மை விட்டு பிரிந்தலும் அவரின் அழியா பொக்கிஷம் நமக்கு ஆறுதல்.அவர் ஆத்மா சாந்தியடைய ஆண்டவனை பிராத்திப்போம்.ஆதிரா அவர்கள் அனிஷ் அவர்களின் நினைவுகளை வருத்தத்துடன் பதிவு செய்திருப்பது கண் கலங்க செய்கிறது.