இராமர் கொண்டாடிய தீபாவளிப் பண்டிகை!

by **சாமி** Sat Nov 07, 2015 4:27 pm

இராமர் தன் மனைவி சீதாதேவியுடன் சேர்ந்து தீபாவளிப் பண்டிகை கொண்டாடியதாக இராமாயணம் கூறுகிறது.

பலகாலமாக, கிருஷ்ணரால் கொல்லப்பட்ட நரகாசுரனின் நாள்தான் தீபாவளியாக கொண்டாடப்படுவதாக நம்பவைக்கப் பட்டுக்கொண்டிருக்கிறது. சிவவிரதங்களில் ஒன்றுதான் தீபாவளி என்பதை மறக்கடிக்க வைத்து விட்டார்கள்.

புராணக் கூற்றின்படி மகாபாரதத்திற்கு முந்தைய காலத்தது இராமாயணம். இராமாவதாரத்திற்குப் பின்னர் நிகழ்ந்ததுதான் கிருஷ்ணாவதாரம். அப்படியிருக்க இராமர் எப்படி தீபாவளி கொண்டாடியிருக்கமுடியும்? ஆக இராமர் சிவவிரதமிருந்து தீபாவளி கொண்டாடினார் என்பதே பொருத்தமாயிருக்கும் என்பதை அறிவுடையவர்கள் ஒப்புக் கொள்வார்கள்.

சிவபூசையின் பலன் தெரிந்துதான், பின்னர் இராமரும் தனது பாவங்கள் தொலைய இராமேச்சுவரத்தில் உள்ள சிவன்கோயிலில் சிவபூசை செய்து உய்வு பெற்றார்.

கிருஷ்ணரும் முறையாக சிவபூசை செய்து இருக்கிறார். தசாவதாரத்தின் ஒவ்வொரு அவதார முடிவிலும் சிவபெருமானால் விஷ்ணு ஆட்கொள்ளப்பட்டிருக்கிறார்.

..........................................................................................................................................................

தீபாவளி உலகமெல்லாம் கொண்டாடும் நன்னாள் பொன்னாள். இதை யாண்டும் எல்லோரும் குதூகலமாகக் கொண்டாடுகிறார்கள். சிவபெருமானை நினைத்துக் கடைத்தேறும் விரதங்கள் எட்டு. அதில் தீபாவளியும் ஒன்று. இது ஐப்பசி மாதம் அமாவாசைக்கு முன்தினம் வரும்.

தீபாவளி = தீபம் – விளக்கு, ஆவளி – வரிசை.

தீபத்தை வரிசையாக வைத்துச் சிவபெருமானை வழிபடுவதற்கு உரியநாள் தீபாவளி என உணர்க. தீபங்களை ஏற்றினால் இருள் தானே விலகிவிடும். விரதமிருந்தால் உடலும் உள்ளமும் தூய்மையடையும். விரதங்கள் பல. அவற்றில் சிவபெருமானை வழிபடும் விரதங்கள் எட்டு எனக் கந்தபுராணத்தில் ஏழாவது காண்டமாகிய உபதேச காண்டம் புகல்கிறது.

1.) சோமவிரதம்:
2.) திருவாதிரை விரதம்:
3.) உமா மகேசுவர விரதம்:
4.) மகாசிவராத்திரி விரதம்
5.) கேதார விரதம்
6.) கல்யாண சுந்தரர் விரதம்
7.) சூல விரதம் (பாசுபத விரதம்)
மீண்டும் சந்திப்போம்

இடப விரதம் (அஷ்டமி விரதம்)

தீபாவளி என்னும் நன்னாளைப் பொன்னாளாக எங்கும் கொண்டாடுகின்றார்கள். ஆனால், அதன் உண்மையை அறிந்தவர்கள் ஒரு சிலரே. பெரும்பாலானோர் நரகாசுரனைக் கண்ணபிரான் சங்கரித்தார் அந்த அரக்கனையழித்த நாளே தீபாவளி என்று கூறிக் கொண்டிருக்கின்றார்கள்.

பிராக்சோதிடபுரியை ஆண்ட நரகாசுரனைச் சங்கரித்த நாள் அதுவாக இருக்கட்டும். ஆனால், கேவலம் அரக்கனை அழித்த நாளுக்கு ஒரு கொண்டாட்டம் நிகழ்வது எங்கும் எக்காலத்தும் இருந்தது இல்லை. அப்படி இருக்குமாயின் இரணியனைக் கொன்ற நாள், இராவணனைக் கொன்ற நாள், கம்சனைக் கொன்ற நாள், இடும்பனை, பகனைக் கொன்ற நாள், துரியோதனனைக் கொன்ற நாள், அவ்வாறே அந்த நாகாசுரன், ஜலந்தராசுரன், இரண்யாட்சன், திருணாவர்த்தன் இப்படி புகழ் பெற்ற அசுரர்களை எல்லாம் கொன்ற நாளைக் கொண்டாடுவதாயின் நம் ஆயுளே அதற்குச் சரியாகிவிடும். ஆகவே, நரகாசுரனைக் கொன்றதற்காக தீபாவளி ஏற்பட்டதன்று.

by **சாமி** Sun Nov 08, 2015 7:53 am

தீபாவளி 'சிவ விரதம்' என்பதை மறக்கடிக்க பல கதைகள் சொல்லப்பட்டுள்ளன. அதில் ஒன்றுதான் சாகும் முன் தனது இறப்பை நாடே மகிழ்ந்து கொண்டாட வேண்டும் என்று நரகாசுரன் வரம் கேட்க, அவ்விதமே அளித்தார் கிருஷ்ணர் என்பது. இப்படி ஒரு நிகழ்வு நடந்தது என்று தேவிபாகவதத்திலோ அல்லது விஷ்ணுபுராணத்திலோ கிடையாது. அதில் அவனை மன்னித்தருளும்படிதான் வருகிறது. கொண்டாட வேண்டும் என்று வரவில்லை. ஆனால் இந்தக் கதை மக்களிடையே புகுந்துவிட்டது.

இப்படி பல கதைகள் உண்டு. அவற்றில் சில...

1) பாற்கடலைக் கடைந்த போது பல சிறப்பானப் பொருட்கள் தோன்றின. அப்போது வானத்து நிலவோடு மகாலட்சுமி தோன்றினாள். விஷ்ணு மோகினி அவதாரம் எடுத்து தேவர்களுக்கு அமுதத்தை வழங்கிய பிறகு, அவருக்கும் மகாலட்சுமிக்கும் திருமணம் நடைபெற்றது. அதுவே தீபாவளியாக கொண்டாடப்படுகிற்து.