தங்கப் பத்திரத் திட்டத்தின் முக்கிய அம்சங்கள்

**ayyasamy ram** · **ayyasamy ram** Thu Nov 05, 2015 7:00 am

காகித வடிவில் தங்கத்தில் முதலீடு செய்யும் புதிய திட்டம் வரும் 5-ம் தேதி அறிமுகப்படுத்தப்பட உள்ளது. மத்திய அரசு சார்பில் ரிசர்வ் வங்கி கொண்டு வரும் இந்த தங்கப் பத்திரத் திட்டத்தின் முக்கிய அம்சங்களை தெரிந்து கொள்ளலாம்…

தங்கத்தின் எடை மதிப்புக்கு ஈடான விலை மதிப்பு கொண்ட பத்திரமே தங்கப் பத்திரம் எனப்படுகிறது. குறிப்பிட்ட ஆண்டுகளுக்கு பிறகு இந்த பத்திரத்தை திருப்பிக் கொடுத்து முதிர்வுப் பணத்தை பெறலாம். இதற்கு இடைப்பட்ட காலத்தில் வட்டியும் உண்டு.

தற்போதைய நிலையில் முதல் தொகுதி தங்கப் பத்திரங்களை வாங்குவதற்கான விண்ணப்பங்கள் நவம்பர் 5-ம் தேதி முதல் நவம்பர் 20-ம் தேதி பெறப்படும் என மத்திய நிதியமைச்சகத்தின் அறிக்கையில் தெரிவிக்கப்பட்டுள்ளது. இதைத் தொடர்ந்து நவம்பர் 26-ம் தேதி தங்கப்பத்திரங்கள் வினியோகிக்கப்படும்.

வங்கிகள் மற்றும் குறிப்பிட்ட அஞ்சலகங்களில் இப்பத்திரங்களை வாங்க இயலும். முதல் தொகுதி தங்கப் பத்திரத்தின் முதலீட்டுக் காலம் 8 ஆண்டுகள் ஆகும். 5-வது ஆண்டிலிருந்து முதலீட்டிலிருந்து வெளியேறும் வாய்ப்பும் தரப்பட்டுள்ளது.

2,5,10,50,100,500 கிராமிலிருந்து 500 கிராம் வரை பல்வேறு எடை மதிப்புகளில் பத்திரங்கள் வெளியிடப்படும். பத்திரங்களின் விலை அவற்றின் வெளியீட்டு நாளுக்கு முந்தைய வாரத்தில் நிலவிய தூய தங்கத்தின் சராசரி விலையை வைத்து கணக்கிடப்படும். தங்கப் பத்திர முதிர்வு பணத்தை திரும்பத் தரும் போதும் இதே நடைமுறையே கணக்கிடப்படும் என்றும் அரசு அறிக்கையில் கூறப்பட்டுள்ளது.

முதல் தொகுதி பத்திரத்திற்கான வட்டி 2.75 சதவிகிதம் என்றும் நிதியமைச்சகம் நிர்ணயித்துள்ளது. முதலீட்டு தொகை மீதான வட்டி ஆண்டுக்கு இரு முறை வழங்கப்படும். தங்கப்பத்திரத்திற்கு தரப்படும் வட்டி, வருமான வரிக்குட்பட்டது.

மேலும் இத்திட்டத்தில் கிடைக்கும் ஆதாயத்துக்கு மூலதன ஆதாய வரி விதிக்கப்படும் என்றும் அரசு தெரிவித்துள்ளது. தங்க நகைகளை அடமானமாக வைத்து கடன் பெறுவது போல் தங்கப் பத்திரங்கள் மீதும் கடன் பெற முடியும் என்று தெரிவிக்கப்பட்டுள்ளது. பத்திர விற்பனையின் போது ஒரு சதவிகித வினியோக கட்டணம் வசூலிக்கவும் அரசு முடிவு செய்துள்ளது.

சாதகமான அம்சங்கள்

காகித வடிவில் தங்கத்தில் முதலீடு செய்யப் போகும் திட்டம் மத்திய அரசின் சார்பில் வழங்கப்படுவது என்பதால் இது மிகவும் நம்பகத்தன்மை கொண்ட முதலீடு என கூறப்படுகிறது.

பொதுவாக தங்கத்தின் மீதான முதலீட்டு திட்டங்களில் வருவாய் எப்போதும் அதன் விலை ஏற்ற, இறக்கத்தை மட்டுமே சார்ந்துள்ளது. ஆனால் தங்கப் பத்திரத் திட்டத்தில் கூடுதலாக வட்டி வழங்கப்படுவது அதன் மிகப்பெரிய சிறப்பம்சமாக பார்க்கப் படுகிறது.

தங்க நகைகளைப் போல தங்கப் பத்திரத்தையும் அடகு வைத்து பணம் பெற அனுமதி அளித்திருப்பது இத்திட்டத்தின் மற்றொரு சிறப்பம்சமாக பார்க்கப்படுகிறது. மேலும் முதிர்வு காலம் 8 ஆண்டுகளாக இருந்தாலும் 5 ஆண்டுகளில் இருந்தே பத்திரத்தை பணமாக்கும் வசதியும் முதலீட்டாளர்களை ஈர்க்கும் என நிபுணர்கள் கருதுகிறார்கள்.

மேலும் தங்க நகைகள் திருட்டு அதிகரித்து விட்ட இக்காலத்தில் அதை பொருள் வடிவில் பாதுகாத்து வைத்திருப்பதை விட காகித வடிவில் முதலீடாக வைத்திருக்கும் வசதி மக்களை கவர்ந்திழுக்கும் என இந்தியா ரேட்டிங்ஸ் என்ற சந்தை மதிப்பீட்டு நிறுவனம் தெரிவித்துள்ளது.

மேலும் முதலீட்டு நோக்கில் தங்கம் வாங்கும் போது அது தூய்மையானததானா என்பது போன்ற கவலைகள் எழும் நிலையில் தங்கப் பத்திர முதலீட்டில் அந்தக் கவலைகள் இருக்காது என்பதையும் அந்நிறுவனம் சுட்டிக் காட்டுகிறது.

தங்கத்தின் விலை ஏற்ற, இறக்கங்களை பொறுத்தே இத்திட்டத்தின் லாப, நஷ்டங்கள் அமையும். தங்கம் விலை எதிர்காலத்தில் குறையும் பட்சத்தில் இத்திட்டம் நஷ்டத்தை தரும் என்றும் கூறப்படுகிறது. ஆனால் தங்க விலை நிலவரத்தை நீண்ட காலமாக உற்று கவனித்து வருபவர்கள் அதன் விலை குறைய வாய்ப்பு மிகமிகக் குறைவு என்கிறார்கள்.

தங்கத்தில் காகித வடிவில் முதலீடு செய்யும் திட்டங்கள் ஏற்கனவே உள்ளன. கோல்டு இடிஎஃப் போன்ற ஆவண வடிவ திட்டங்களை காட்டிலும் தங்கப் பத்திரம் திட்டம் ஆதாயம் மிக்கது என்கின்றனர் நிபுணர்கள்

இந்தியாவில் முதலீட்டு நோக்கில் அதாவது தங்க நாணயங்கள் மற்றும் கட்டி வடிவில் விற்கப்படும் தங்கத்தின் அளவு ஆண்டுக்கு 300 டன்கள் என மதிப்பிட்டுள்ளது மத்திய அரசு. இந்த முதலீடுகளில் பெரும்பகுதியை தங்கப் பத்திரத்திட்டத்திற்கு திருப்பிவிடுவதுதான் அரசின் நோக்கமாக உள்ளது.

இத்திட்டத்தை நோக்கி மக்களை நோக்கி கவர்ந்திழுப்பதற்காக மூலதன ஆதாய வரி விலக்கு உள்ளிட்ட சலுகைகளும் வரும் பட்ஜெட்டில் அறிவிக்கப்படலாம் என தகவல்கள் வெளியாகியுள்ளன.

2 கிராம் தங்கத்துக்கு ஈடான விலையை செலுத்தினாலே இத்திட்டத்தில் முதலீடு செய்ய முடியும் என்பது சாமானிய மக்களை வெகுவாக கவரும் அம்சம்.

மேலும் வங்கிக் கிளைகளிலும் அஞ்சல் அலுவலகங்களிலும் கூட இந்த பத்திரங்களை வாங்க முடியும் என்ற அம்சமும் இத்திட்டத்தை நோக்கி சாமானிய மக்களை ஈர்க்கும் என நம்பப்படுகிறது.

——————————

புதிய தலைமுறை டி.வி

Hari Prasath · Hari Prasath Thu Nov 05, 2015 10:27 am

நல்ல தகவல் ஐயா.....
இதன் மூலம் தங்க இறக்குமதியும் குறைய வாய்ப்புள்ளது....

**ayyasamy ram** · **ayyasamy ram** Thu Nov 05, 2015 11:10 am

தங்கத்தின் விலை ஏற்ற, இறக்கங்களை பொறுத்தே
இத்திட்டத்தின் லாப, நஷ்டங்கள் அமையும்
என்பது குறிப்பிடத்தக்கது...
-
வருமானமாக வழங்கும் வட்டிக்கு வருமான வரி விலக்கு அளிக்கலாம்...

**ராஜா** · **ராஜா** Thu Nov 05, 2015 12:35 pm

என்ன தான் கவர்ச்சிகரமான விளம்பரங்கள் மற்றும் லாபத்தை சொன்னாலும் மக்களுக்கு இந்த காகித தங்கத்தின் மேல் ஒருவித நம்பிக்கையின்மை இருந்துகொண்டு தான் இருக்கும்.

திடீரென்று ஒருநாள் அரசு கஜானா காலியாகிவிட்டது அதனால் உங்கள் பேப்பர் தங்கத்தை எங்களால் திருப்பி தர இயலாது வேண்டுமானால் இன்னும் ஒரு 10 வருடத்திற்கு பிறகு 10 மடங்காக கொடுக்கிறோம் என்று சொன்னால் என்ன பண்ணுவது.

**ayyasamy ram** · **ayyasamy ram** Thu Nov 05, 2015 1:45 pm

ராஜா wrote:என்ன தான் கவர்ச்சிகரமான விளம்பரங்கள் மற்றும் லாபத்தை சொன்னாலும் மக்களுக்கு இந்த காகித தங்கத்தின் மேல் ஒருவித நம்பிக்கையின்மை இருந்துகொண்டு தான் இருக்கும்.

திடீரென்று ஒருநாள் அரசு கஜானா காலியாகிவிட்டது அதனால் உங்கள் பேப்பர் தங்கத்தை எங்களால் திருப்பி தர இயலாது வேண்டுமானால் இன்னும் ஒரு 10 வருடத்திற்கு பிறகு 10 மடங்காக கொடுக்கிறோம் என்று சொன்னால் என்ன பண்ணுவது.

மேற்கோள் செய்த பதிவு: 1173097
=====
யூனிட் டிரஸ்ட் ஆப் இந்தியா 64 திட்டத்ததில்
முதலீடு செய்தவர்கள் - நான்கைந்து ஆண்டுகள்
கழித்து அசலை மட்டுமே பெற்றனர் என்பது
வரலாற்று உண்மை....

Sponsored content · Sponsored content

தங்கப் பத்திரத் திட்டத்தின் முக்கிய அம்சங்கள்

தங்கப் பத்திரத் திட்டத்தின் முக்கிய அம்சங்கள்

Re: தங்கப் பத்திரத் திட்டத்தின் முக்கிய அம்சங்கள்

Re: தங்கப் பத்திரத் திட்டத்தின் முக்கிய அம்சங்கள்

Re: தங்கப் பத்திரத் திட்டத்தின் முக்கிய அம்சங்கள்

Re: தங்கப் பத்திரத் திட்டத்தின் முக்கிய அம்சங்கள்

Re: தங்கப் பத்திரத் திட்டத்தின் முக்கிய அம்சங்கள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக