போலி டாக்டர்களை தடுக்க ஸ்மார்ட் பெயர் பலகை: தமிழ்நாடு மருத்துவ கவுன்சில் அறிமுகம்

தமிழ்நாடு மருத்துவ கவுன்சில் சார்பில் டாக்டர்களுக்கு "ஸ்மார்ட் பெயர் பலகை" வழங்கும் விழா சென்னை அரும்பாக்கத்தில் நடந்தது.

விழாவிற்கு கவுன்சில் துணைத் தலைவர் டாக்டர் குமுதா லிங்கராஜு தலைமை தாங்கினார். பதிவாளர் டாக்டர் எஸ்.கந்தசாமி முன்னிலை வகித்தார். கவுன்சில் தலைவரும், தமிழ்நாடு அரசு டாக்டர்கள் சங்க மாநில பொதுச்செயலாளருமான டாக்டர் பி.பாலகிருஷ்ணன் ‘ஸ்மார்ட்’ பெயர் பலகையை அறிமுகம் செய்து வைத்தார். பின்னர் அவர் நிருபர்களிடம் கூறியதாவது:–

கூட்டத்தில் 30 ஆயிரம் போலி டாக்டர்கள் உள்ளனர். அவர்களை அடையாளம் காண இந்தியாவில் முதல் முறையாக தமிழ்நாடு மருத்துவ கவுன்சில் மூலம் டாக்டர்களுக்கு ஸ்மார்ட் பெயர் பலகை வழங்குகிறோம்.

3 மாதங்களில் அனைத்து டாக்டர்களுக்கும் ஸ்மார்ட் பெயர் பலகை வழங்கப்படும். 2016–ம் ஆண்டு ஜனவரி 1–ந்தேதி முதல் புதிதாக எம்.பி.பி.எஸ்., முதுநிலை மருத்துவ பட்ட மேற்படிப்பு முடித்து விட்டு பதிவு செய்யும் டாக்டர்களுக்கு அப்போதே ஸ்மார்ட் பெயர் பலகை வழங்கப்படும்.

இந்த ஸ்மார்ட் போர்டை அனைத்து டாக்டர்களும் தங்களுடைய மருத்துவமனைகள் மற்றும் கிளீனிக்குகளில் பொதுமக்கள் பார்வையில் படும்படி வைக்க வேண்டும்.

இதில் டாக்டர்களை பற்றிய அனைத்து விவரங்களும் இடம் பெற்றிருக்கும். மேலும் கியூஆர் கோடு மற்றும் 56767 என்ற எஸ்.எம்.எஸ். எண்ணும் இடம் பெற்று இருக்கும். ஸ்மார்ட் போன் வைத்திருப்பவர்கள் கியூஆர். கோ அப் மூலமாக டாக்டரின் பெயர், படிப்பு உள்ளிட்ட அனைத்து விவரங்களையும் சரிபார்த்து கொள்ளலாம்.

இதுதவிர போர்டில் இருக்கும் டாக்டரின் பதிவு எண்ணை 56767 என்ற எண்ணுக்கு எஸ்.எம்.எஸ். அனுப்பினாலும் டாக்டர் குறித்த விவரங்கள் எஸ்.எம்.எஸ். மூலம் அனுப்பப்படும். போலி டாக்டர் என்றால் தகவல் இல்லை என்று வரும். இதன்மூலம் போலி டாக்டர்களை எளிதில் அடையாளம் கண்டுகொள்ள முடியும்.

இந்தியா முழுவதும் இந்த திட்டத்தை செயல்படுத்தக்கோரி இந்திய மருத்துவ கவுன்சிலில் வலியுறுத்தப்படும். சித்தா, ஆயுர்வேத டாக்டர்கள் அலோபதி (ஆங்கில மருத்துவம்) சிகிச்சை அளிக்கக்கூடாது.

இவ்வாறு அவர் கூறினார்.-maalaimalar