பறக்குது பருப்பு விலை !

by **krishnaamma** Sun Oct 18, 2015 3:11 am

பறக்குது பருப்பு விலை: பதுக்கல் நடப்பது எங்கே?

பறக்குது பருப்பு விலை ! FD7S6Q42StSkI6KhdgZq+Tamil_News_large_1365873

சென்னை: தமிழகத்தில், எப்போதும் இல்லாத வகையில், துவரம் பருப்பு விலை கடுமையாக உயர்ந்துள்ளது.

ஒரு கிலோ, 195 ரூபாய்; பாக்கெட் பருப்பு கிலோ, 210 ரூபாயாக உள்ளது.வட மாநிலங்களில் பருப்பு விளைச்சல் குறைவால், தமிழகத்திற்கான வரத்து குறைந்துள்ளது. தேவைக்கேற்ப பருப்பு கிடைக்காததால், இரண்டு மாதங்களாக, பருப்பு விலை உயர்ந்து வருகிறது. சாப்பாடு விலை உயர்வு100 கிலோ எடையுள்ள, ஒரு மூட்டை துவரம் பருப்பு, நேற்று முன்தினம் வரை, 17 ஆயிரம் ரூபாய்க்கு விற்பனையானது; நேற்று திடீரென, 1,500 உயர்ந்து, 18 ஆயிரத்து, 500 ரூபாய்க்கு விற்கப்படுகிறது.

சில்லரையில் ஒரு கிலோ, 180லிருந்து, 195 ரூபாயாகவும், பாக்கெட் பருப்பின் விலை, 210 ரூபாயாகவும் விற்கப்படுகிறது. நான்கு நாட்களுக்கு முன், கிலோவுக்கு, 20 ரூபாய் விலை உயர்ந்த உளுத்தம் பருப்பு, கிலோ, 170 ரூபாய்; பாசி பருப்பு, கிலோ, 130 ரூபாய்க்கும் விற்கப்படுகிறது.

சர்க்கரை, புளி, பூண்டு, தனியா, மிளகாய் வற்றல் என, மற்ற அத்தியாவசிய பொருட்களின் விலை உயர்வால், ஓட்டல்களில் சாப்பாடு விலை, 5 ரூபாய் உயர்ந்துள்ளது. மற்ற உணவுப் பொருட்களின் விலையும், 10 சதவீதம் அதிகரித்துள்ளது.

சிறப்பு கவனம் வேண்டும்:

நிலைமையை சமாளிக்க, மத்திய அரசு, பருப்பு வகைகளில், தலா, 5,000 டன் இறக்குமதி செய்துள்ளது. கூடுதலாக, துவரம் பருப்பு, 3,000 டன் இறக்குமதி செய்தும், விலை குறையவில்லை. இதற்கு, 'ஆன்லைன்' வர்த்தகமும், பதுக்கலுமே காரணம் என, கூறப்படுகிறது. அத்தியாவசிய உணவுப் பொருளான பருப்பு விலையை, கட்டுக்குள் கொண்டு வர, மத்திய, மாநில அரசுகள் சிறப்புக் கவனம் செலுத்த வேண்டும் என்பதே, மக்களின் விருப்பம்.

கண்காணிப்பு குழு ஆய்வு:

தமிழக அரசு, உணவுத் துறை அமைச்சர் காமராஜ் தலைமையில், விலை கண்காணிப்பு குழுவை அமைத்துள்ளது. இதில், தலைமை செயலர், நிதி, வேளாண், உணவுத் துறை அதிகாரிகள் உள்ளனர். பருப்பு விலை உயர்வை கட்டுப்படுத்த, விலைவாசி கண்காணிப்பு குழு அதிகாரிகள், முக்கிய நகரங்களில் உள்ள, மொத்த விலை அங்காடிகளில் ஆய்வில் ஈடுபட்டு வருகின்றனர்.

இதுகுறித்து, அதிகாரிகள் கூறியதாவது:தமிழக பருப்பு வியாபாரிகளிடம், இரண்டு மாத இருப்பு உள்ளதாகவும், தீபாவளியை முன்னிட்டு, செயற்கையாக விலை உயர்த்தப்படுவதாகவும், தகவல் வந்துள்ளது. எனவே, சென்னை, மதுரை, திருச்சி உள்ளிட்ட முக்கிய நகரங்களில், பருப்பு மொத்த வியாபாரிகளிடம் ஆய்வு நடத்தப்படுகிறது. செயற்கையாக விலை உயர்வு இருந்தால், கடை உரிமம் ரத்து; உரிமையாளருக்கு சிறை போன்ற நடவடிக்கைகள் எடுக்கப்படும். இவ்வாறு அவர் கூறினார்.

தினமலர்