கல்யாணம் ஆகலையேன்னு வருத்தமில்லை – கோவை எக்ஸ்பிரஸ்

-
–
நடிக்க வந்து இரண்டு தலைமுறைகளைக் கடந்து விட்டார்
கோவை சரளா. இந்தத் தலைமுறைக் குழந்தைகளுக்குக்
கூட இந்தப் பொம்பளக் கமலின் பெர்ஃபார்மென்ஸ் பிடிப்பது
ஆச்சர்யம்.
–
கோவை சரளா இதுவரை கொடுத்த பேட்டிகளை விரல்விட்டு
எண்ணி விடலாம். குமுதம் பெண்கள் ஸ்பெஷலுக்காக பேசியதில்
இருந்து….
–
எல்லா கேரக்டர்களுமே கலந்துகட்டி அடிக்கிறீங்களே?
–
ஸ்கூல்ல படிச்சுட்டு இருக்கும்போதே ‘முந்தானை முடிச்சு’ல
பெரிய பொம்பளை கேரக்டர். அடுத்த படமே சின்ன வீடுல
பாக்யராஜுக்கு அம்மா. காமெடினு முடிவு பண்ணினதால
இமேஜ் பார்க்க வேண்டியதில்லாம போச்சு. கேரக்டர் தான்
தம்பி முக்கியம்.
–
உங்களை ரோல்மாடலா வெச்சு நிறையப் பேர் வர்றாங்களே?
–
(சிரிக்கிறார்) அப்படிலாம் எதுவும் இல்லை தம்பி.
முன்னாடிலாம் ஆர்ட்டிஸ்டுக்கு லைஃப்டைம் அதிகம்.
இப்போ ஒண்ணு ரெண்டு படத்துக்கு மேல நிக்க முடியலை.
நமக்கு திறமையும் அதிர்ஷ்டமும் இல்லைனா அவ்வளவுதான்.
–
ஹீரோயின் லைஃபே மாறிடுச்சு. அப்பல்லாம் ஹீரோயின்
புடவையைத் தவிர வேற டிரெஸ் பண்ண மாட்டாங்க.
ஆனா இப்ப ஹீரோயினுக்கே கர்ச்சீஃப் தான் காஸ்ட்யூம்.
அதனால கிளாமர் ஆர்ட்டிஸ்டுக்கு வேலை இல்லாம போச்சு.
எந்த விஷயமா இருந்தாலும் மூடி வெச்சிருந்தாதான் மரியாதை.
–
சினிமா என்பதே ஆண்களுக்கான உலகமாச்சே? எப்படி
சமாளிக்கிறீங்க?
–
சினிமா மட்டுமா? இந்த உலகமே ஆண்களுக்கானது தானே?
பெண்கள் அதுல ஒரு பகுதி அவ்வளவுதானே?
–
உச்சா கூட போக முடியலைன்னுலாம் டயலாக் பேசுறீங்க.. எப்படி?
–
சின்ன வயசுலேயே எனக்கு சினிமால நடிக்கிறதுதாங்க லட்சியமா
இருந்தது. இந்த கேமரா முன்னாடி நின்னுடணும்னு ஏங்குனவ நான்.
அதனாலதான் எந்த கேரக்டர் கொடுத்தாலும் தயக்கமே வர்றது
இல்லை. சாதாரணமா பேசச் சொன்னா நான் அதிகம் பேச மாட்டேன்.
ஆனா ஒரு கேரக்டர் கொடுத்தா அந்த கேரக்டர் என்ன பேசணுமோ
அதைப் பேசிடுவேன்.
–
உங்க பார்வையில் இப்ப பெண்கள் எப்படி இருக்காங்க?
–
டெக்னாலஜி ரொம்ப இம்ப்ரூவ் ஆகிடுச்சு. முன்னேற்றம் இருந்தாலும்
அது இன்னொரு பக்கத்துல தப்பான விஷயங்களுக்கும் போய்க்கிட்டு
இருக்கு. அதைத் தடுக்கணும். ராக்கெட், ஃப்ளைட்னு பெண்கள்
வளர்றாங்க.. ஆனா அவங்களுக்கான பாதுகாப்பு அவங்க கையிலதான்
இருக்கு. எதையும் துணிச்சலா எதிர்த்து நின்னா வெளி ஆட்கள்
பாதுகாப்புத் தர வேண்டிய அவசியம் இல்லை.
–
இன்னமும் திருமணம் செய்துக்கலையே… ஏன்?
–
(கிண்டலாக) ஆங்… இன்னும் ஒரு 15 வருஷம் கழிச்சு வந்து கேளேன்..
கல்யாணத்தை பண்ணினவங்களே ஏண்டா கல்யாணம் பண்ணினோம்னு
டார்ச்சரை அனுபவிச்சுட்டுதானே இருக்காங்க?
–
அவங்களுக்கு ஒரு மாறுதலா ஒருத்தர் வேணாம்? இதோ பாரு நான்
கல்யாணமே பண்ணிக்காமதான் இருக்கேன்னு சொல்லிக்க நான்
இருக்கேன். சரளாவை கேள்வி கேட்க யாருமே இல்லை.
இப்படி வாழத்தான் பிடிச்சிருக்கு. கல்யாணம் பண்ணி வாழறவங்கள்லாம்
உண்மையான பாசத்தையா காட்டிட்டு இருக்காங்க. தனியா வந்தேன்.
தனியா போகப்போறேன். நடுவுல இந்த கல்யாண பாலிடிக்ஸ்லாம் எதுக்கு?
–
இதுவும் கஷ்டமான விஷயம். இருந்து பார்த்தா தான் தெரியும்.
நான் தெளிவா இருக்கேன். கல்யாணம் ஆகலையேங்கற எந்த வருத்தமும்
எனக்குத் துளிகூட இல்லை.
–
—————————————-

– க. ராஜிவ் காந்தி
குமுதம்