பற்கள்: பல பயனுள்ள தகவல்கள்

உணவு உண்பதற்கு, பேசுவதற்கு, சிரிப்பதற்கு, எடுப்பான அழகுக்கு அடிப்படையாக இருக்கும் பற்களை நாம் இழந்தால் பேசும்போது உச்சரிப்புகள் மாறும். உணவுப் பொருட்களை நன்றாக அரைத்து மென்று சாப்பிட முடியாது. எந்த பல்லை இழக்கிறோமோ அதற்கு அருகில் இருக்கும் பற்களும் நகர்ந்து தொந்தரவு தர தொடங்கிவிடும்.

குழந்தை பிறந்த 6–வது மாதத்தில் பற்கள் முளைக்கும். பால் பற்கள், நிரந்தர பற்கள் என்று இரண்டு வகைகள் உள்ளன. பால் பற்கள் விழுந்து முளைக்கும் தன்மை கொண்டவை.

பால் பற்கள் விழுந்து முளைப்பது 12 வயது வரை தொடரும். நிரந்தர பற்கள் 17 முதல் 25 வயது வரை முளைக்கும். அதன் பிறகு பற்கள் விழுந்தாலும் முளைக்காது. அதனால்தான் வயதான பின்பு பற்கள் விழுந்தாலும் முளைப்பதில்லை.

டூத் எனாமல் எனப்படும் பற் சிப்பி– இன் ஆர்கானிக் மெட்டீரியல்– ஆர்கானிக் மெட்டீரியல்– தண்ணீர் போன்றவைகளால் பற்கள் இயற்கையாக உருவாகின்றன.

பல் சொத்தை, தேய்மானம், பல் கூச்சம், பல் காரை, உடைபட்டு வலி ஏற்படுதல், பல் ரத்தப்போக்கு, பல் இடப்பிறழ்ச்சி போன்றவை பற்களில் பொதுவாக ஏற்படும் பாதிப்புகளாகும். ஈறுகளால் ஏற்படும் எல்லா பாதிப்புகளும் பற் களையும் பாதிக்கும்.

பல் சொத்தை ஏற்படுவதற்கு பல்வேறு காரணங்கள் இருக்கின்றன. பற்களில் ஒட்டும் வகையிலான இனிப்பு, சாக்லேட் வகைகளை அதிகம் உண்பது– சர்க்கரை கலந்த உணவுப் பொருட்களை அதிகம் சாப்பிடுவது– மாவுப் பொருள் உணவுகளை அதிகம் உட்கொள்வது போன்றவைகளால் பற்கள் பாதிக்கப்படுகின்றன. அந்த பாதிப்புகளே பல் சொத்தைக்கு காரணமாகின்றன.

முறையாக பற்களை சுத்தப் படுத்தாமல் இருந்தாலும், வாய் சுகாதாரத்தை பேணாமல் இருந்தாலும் பல் சொத்தை தோன்றும். வாயில் ஏற்படும் வறட்சி மற்றும் புகைப்பிடித்தலும் பல்சொத்தைக்கு காரணமாகும்.

தற்போது குழந்தைகள் மற்றும் சிறுவர்கள் அதிகமான அளவு சர்க்கரை கலந்த உணவுகளையும், சாக்லேட், பிஸ்கெட், ரொட்டி போன்றவைகளை சாப்பிடுகிறார்கள். அதனால் அவர்களது பற்கள் பாதிக்கப்படுகின்றன. முறையான பல் பராமரிப்பு முறைகளை அவர்கள் மேற்கொள்ளாததாலும் பற்கள் பாதிக்கப்படுகின்றன. பற்களை காலை எழுந்த உடனும், இரவில் தூங்கச் செல்வதற்கு முன்பும் துலக்கும் பழக்கத்தை ஏற்படுத்திக்கொண்டால் பெரும்பாலும் பல் பாதிப்புகள் தோன்றாது.

பற்களை ஆறு மாதங்களுக்கு ஒருமுறை, பல் டாக்டர் மூலம் சுத்தம் செய்துகொள்ளவேண்டும். அதன் மூலம் பல் கறை, பல் காரை, பற்களில் சேரும் அழுக்குகளை போக்கிவிடலாம். பல் காரை அதிகமானால் ஈறுகள் வலிமையற்று, பற்கள் ஆட்டம் காணத் தொடங்கிவிடும்.

விபத்தில் அடிபட்டு பல் கீழே விழுந்தால், வேர் பகுதியில் தண்ணீர் படாமல் கழுவி பால், இளநீர், உமிழ்நீர் போன்ற ஏதாவது ஒன்றில் போட்டு எடுத்துக்கொண்டு முடிந்த அளவு விரைவாக பல் டாக்டரை அணுகவேண்டும்.

சொத்தை பற்களை பிடுங்கினால் அந்த இடத்தில் மாற்று பல்லை பொருத்திவிடவேண்டும். மாற்று பற்கள் எடுத்து மாற்றத்தக்க விதத்திலும், நிலையாக பொருத்தும் விதத்திலும் உள்ளன.

பல் மருத்துவத்தில் இப்போது ஏராளமான நவீன சிகிச்சை முறைகள் கையாளப் படுகின்றன. லேசர் சிகிச்சைகள், காம்போசிட் பல் மருத்துவம், பல் பதியவைத்தல்– பல் நடுவதில் புதிய முறைகள் கையாளப்படுகின்றன. இதன் மூலம் பரிசோதனைகளும், சிகிச்சைகளும் எளிதாக்கப்பட்டிருக்கின்றன.

தற்போது பற்களின் அழகிலும் மக்கள் அதிக அக்கறை காட்டுகிறார்கள். பற்கள் எடுப்பாக இருந்தாலோ, வரிசை சீரற்ற வகையில் இருந்தாலோ, அதிக இடை வெளி மற்றும் பெரிய பற்களோடு இருந்தாலோ அதை இளம் வயதிலே சீர் செய்ய முன்வருகிறார்கள். அதனால் வசீகரமான முக அழகைப் பெறுகிறார்கள்.

செயற்கை பற்களை இப்போது பலரும் பயன்படுத்த தொடங்கியிருக்கிறார்கள். அதில் ஐந்து முறைகள் உள்ளன. அவை: கிரவுண், பிரிட்ஜ், இம்பிளாண்ட், பார்ஷியல் செட், புல் செட். அவைகளில் கிரவுண், பிரிட்ஜ், இம்பிளாண்ட் போன்றவை பற்களை நிரந்தரமாக வைக்கும் முறையாகும். பார்ஷியல் செட், புல் செட் போன்றவை எடுத்து மாற்றும் விதத்திலானவை.

செயற்கை பற்கள் சிர்கோணியம், செராமிக், அக்ரிலிக், மெட்டல் போன்றவைகளில் உருவாக்கப் படுகிறது.

பற்கள் அழகாக தோன்ற வேண்டும் என்பதற்காக தங்கத்தில் பற்களை பொருத்திக்கொள்வது ஏற்புடையதல்ல.

கர்ப்பகாலத்தில் பெண்கள் பல் மற்றும் ஈறுகளை பராமரிப்பதில் மிகுந்த அக்கறை செலுத்தவேண்டும். பல்லில் தொற்று ஏற்பட்டு அதை கவனிக்காமல் விட்டுவிட்டால், தொப்புள்கொடி வழியாக குழந்தையையும் அந்த தொற்று தாக்கும். அதனால் குழந்தை பாதிக்கப்படும்.

பல் சொத்தையை நாள்பட வைத்துக்கொண்டிருப்பது ஆபத்து. அதன் மூலம் உருவாகும் தொற்று ரத்தத்தின் மூலம் பரவி இதயத்தையும் பாதிக்கவைக்கும்.

எப்போதும் சிரித்த முகத்துடன் வாழ, பற்களை நன்றாக பாதுகாத்திடுங்கள்! பராமரியுங்கள்!

சர்க்கரை நோயாளிகளின் பற்கள் அதிகமாக பாதிக்கப்படும் சூழ்நிலை உள்ளது. அதனால் அவர்கள் பற்களை முறையாக பராமரிப்பதில் அதிக அக்கறைகாட்டவேண்டும். ரத்தத்தில் சர்க்கரையின் அளவு அதிகமாக இருக்கும்போது, உமிழ் நீரிலும் சர்க்கரையின் அளவு அதிகரிக்கும். இது வாயில் நுண்ணுயிர் கிருமிகளை அதிகரிக்கச் செய்யும். அப்போது பற்களையும், வாயையும் சரியாக பராமரிக்காவிட்டால் ஈறு வீக்கம், வாய் தொற்று போன்றவை ஏற்படக்கூடும். உடனடியாக சிகிச்சை மேற்கொள்ளாவிட்டால், பாதிப்புகள் அச்சம் தரும் விதத்தில் அதிகரித்துவிடும். அதனால் எப்போதும் சர்க்கரையின் அளவை இயல்பாக வைத்திருப்பது நல்லது.

பல் சொத்தை ஏற்பட்டாலோ, முனை சீழ்க்கட்டி தோன்றினாலோ, பற்குழி நிரப்புவது பழுதடைந்தாலோ பல் வலி தோன்றும். பல் வலி பொதுவாக நடுராத்திரியில் அதிகமாகும். அதற்கு என்ன காரணம் என்றால், இரவில் நாம் பெரும்பாலும் மல்லாந்து படுக்கிறோம். அப்போது பல்லுக்கு செல்லும் ரத்த ஓட்டம் அதிகரிக்கும். அதிக ரத்த ஓட்டம் நரம்புகளில் அழுத்தத்தை ஏற்படுத்துவதால், இரவில் பல் வலி அதிகமாகிறது.

பற்களை பராமரிக்கும் வழிமுறைகளை சிறு வயது பருவத்தில் இருந்தே உங்கள் குழந்தைகளுக்கு கற்றுக்கொடுங்கள். பற்களை பலப்படுத்தும் உணவுகளை அதிக அளவில் பயன்பாட்டில் கொண்டு வாருங்கள். பச்சை காய்கறிகள், கீரைகள், பழங்கள் ஏற்றது. பழங்களை பற்களால் கடித்து நன்றாக மென்று சாப்பிட பழக்கப்படுத்துங்கள். அது பற்களுக்கு நல்லது. மாமிசம், மீன், முட்டை போன்றவை பல் எனாமலை பாதுகாக்கும் தன்மை கொண்டவை. பாலாடைக்கட்டி, கேரட் போன்றவைகளும் பற்களை பலப்படுத்தும்.

உடலில் ஏற்படும் பல்வேறு நோய்களின் அறிகுறிகளை காட்டும் தன்மை பற்களுக்கு உண்டு. ஈறுகளில் ஏற்படும் மாற்றங்கள், பற்களில் ஏற்படும் தேய்மானம், பல் முரசு நோய் போன்றவைகளை வைத்து அவருக்கு உடலில் சர்க்கரையின் அளவு அதிகரித்திருப்பதை உணர முடியும். பற்கள் மற்றும் ஈறுகளை பார்த்து வலிப்பு நோயின் பாதிப்புகளை கண்டறியலாம். இரைப்பை தொடர்புடைய நோய் இருப்பவர்களுக்கு வாய்ப்புண் மற்றும் வாய் நாற்றம் தோன்றும்.

கட்டுரை: டாக்டர். வே.சங்கர்ராம், M.D.S. Phd
ஈறு மற்றும் பல் சிகிச்சை நிபுணர், சென்னை–18.