சென்னை அருகே நடுக்கடலில் கடற்படை வீரர்கள் சாகசம்; 8 போர்க்கப்பல்கள் பங்கேற்பு

-

1971-ம் ஆண்டு இந்தியா-பாகிஸ்தான் இடையே நடந்த போரில்,
கராச்சி துறைமுகத்தை இந்திய கடற்படையினர் ஏவுகணை
மூலம் தாக்கினார்.
இதை நினைவு கூறும் வகையில், டிசம்பர் 4-ந்தேதி இந்திய
கடற்படை தினமாக கொண்டாடப்படுகிறது.

இந்த நிகழ்ச்சியின் ஒரு பகுதியாக போர்க்கப்பல்களில் கடற்படை
வீரர்களின் சாகச நிகழ்ச்சியும், பொதுமக்களுக்கு போர்க்கப்பல்
பற்றி தெரிய வேண்டும் என்பதற்காகவும் நடுக்கடலில் 8 போர்க்
கப்பல்களில் கடற்படை வீரர்கள் சாகசம் நடைபெறும் என்று
அறிவிக்கப்பட்டு இருந்தது.

அதன்படி, இந்த சாகச நிகழ்ச்சியை நிகழ்த்துவதற்காக
ஐ.என்.எஸ். சிவாலிக், ரன்விஜய், சக்தி, பெத்வா, கோரா, விபுதி,
நிசாங்க், சிந்துதுவாஜ் ஆகிய போர்க்கப்பல்கள் விசாகப்பட்டினத்தில்
இருந்து சென்னைக்கு வரவழைக்கப்பட்டு இருந்தன.

நீர்மூழ்கி கப்பல்

சென்னை துறைமுகத்தில் இருந்து நேற்று காலை பொதுமக்கள்,
இந்திய கடற்படை அதிகாரிகள், ஊழியர்கள், என்.சி.சி. மாணவர்கள்
என ஆயிரத்துக்கும் மேற்பட்டோரை கடற்படைக்கு சொந்தமான
இந்த போர்க்கப்பல்களில், சுமார் 30 கடல் மைல் தூரத்தில் நடுக்
கடலுக்கு அழைத்து சென்றனர்.

நடுக்கடலுக்கு சென்ற பிறகு, ஒவ்வொரு போர்க்கப்பல்களும்
வரிசையாக ஒன்றின் பின் ஒன்றாக அணிவகுத்து நின்றன.
அதன்பின்னர், ஒவ்வொரு கப்பல்களிலும், கடற்படைக்கு சொந்தமான
நீர்மூழ்கி கப்பல் வருகிறது என்ற அறிவிப்பு ஒலித்தது.

உடனே அனைவரும் ஆர்வத்துடன் பார்த்தனர். கொஞ்சம் கொஞ்சமாக
வெளியே வரத்தொடங்கிய நீர்மூழ்கி கப்பல், மீண்டும் நீரில் மூழ்கியது.
பத்திரிகை மற்றும் தொலைக் காட்சிகளில் மட்டுமே பார்த்த கப்பலை
நேரடியாக பார்த்ததும் அனைவரும் ஆர்வமுடன் செல்போனில் புகைப்
படம் எடுத்தனர்.

‘சீ கிங்’ ஹெலிகாப்டர்

அதைத் தொடர்ந்து, கடலில் தத்தளித்து கொண்டு இருக்கும் ஒருவரை,
ஹெலிகாப்டர் உதவியுடன் மீட்பது எப்படி? என்பதை கடற்படைக்கு
சொந்தமான ‘சீ கிங்’ ஹெலிகாப்டர் மூலம் செய்து காண்பித்தனர்.

பின்னர், கடலோர பகுதிகளை நீண்ட தூரம் சென்று ரோந்து பணியில்
ஈடுபடும் பெசோடியன் விமானமும், அதேபோல் குறுகிய தூரம் சென்று
ரோந்து பணியில் ஈடுபடும் ‘டோர்னியர்’ ரக குட்டி விமானமும் வானில்
சீறி பறந்தன. இதை பார்த்த பார்வையாளர்கள் அனைவரும் கைகளை
தட்டி ஆரவாரம் செய்தனர்.

இதையடுத்து, கடற்படைக்கு சொந்தமான விரைவு கப்பல் ஒன்று
கடலில் தண்ணீரை கிழித்து கொண்டு பாய்ந்ததும், சாகச நிகழ்ச்சியில்
கலந்து கொண்ட, ‘சீ கிங்’ ஹெலிகாப்டர், கடலில் சென்று கொண்டு
இருந்த ‘பெத்வா’ போர்க்கப்பலில் தரை இறங்குவதும்
பார்வையாளர்களை மெய்சிலிர்க்க வைத்தது.

போர்க்கப்பல்களின் செயல்பாடுகள்

அமைதியாக சென்று கொண்டு இருந்த சாகச நிகழ்ச்சியில், குறிப்பிட்ட
இலக்கை நோக்கி ‘பட பட’வென்று துப்பாக்கியால் சுடும் ஒரு நிகழ்வு
நடந்தது. இது கப்பல்களில் இருந்த பார்வையாளர்கள் அனைவருடைய
கவனத்தையும் ஈர்த்தது.

நடுக்கடலில் சென்று கொண்டு இருக்கும் போர்க்கப்பல், டீசல் இல்லாமல்
நின்று விட்டால், அந்த கப்பலுக்கு நடுக்கடலில் இருந்தவாறு டீசல்
நிரப்புவது எப்படி? என்பதையும் செய்து காண்பித்தனர். இதில் அதிநவீன
‘சிவாலிக்’ போர்க்கப்பலுக்கு, டீசல் நிரப்பி செல்லும் ‘சக்தி’
போர்க்கப்பலில் இருந்து டீசலை நிரப்பினார்கள்.

இந்திய கடற்படைக்கு சொந்தமான போர்க்கப்பல்களை நேரில் பார்த்த
பார்வையாளர்கள் அனைவரும் கப்பலில் இருந்தவாறு ‘செல்பி’ எடுத்து
கொண்டனர். சாகச நிகழ்ச்சிகள் மட்டும் அல்லாது, ஒவ்வொரு போர்க்
கப்பல்களின் செயல்பாடுகள் குறித்தும், கப்பல்களில் பணிபுரியும்
வீரர்களின் கடமைகள் குறித்தும் கப்பலில் இருந்த பார்வையாளர்கள்
கேட்டறிந்தனர்.

கடலோர பாதுகாப்பு

சாகச நிகழ்ச்சிகள் முடிந்த பிறகு, கிழக்கு பிராந்திய கடற்படை உயர்
அதிகாரி எஸ்.வி.பொகோரே நிருபர்களுக்கு பேட்டியளித்தார். அப்போது
அவர் கூறியதாவது:-

கடற்படை தினத்தை முன்னிட்டு, நடுக்கடலில் போர்க்கப்பல்களில் சாகச
நிகழ்ச்சிகளை பொதுமக்கள் மத்தியில் செய்து காண்பித்தது
மகிழ்ச்சியளிக்கிறது. பொதுமக்களுக்கு போர்க்கப்பல்கள் பற்றி நன்கு
தெரிய வேண்டும். அதன் ஒரு பகுதியாக தான் இந்த நிகழ்வு ஏற்பாடு
செய்யப்பட்டுள்ளது.

தமிழக கடலோர பாதுகாப்பு என்பதில் மிகவும் கவனமாக இருக்கிறோம்.
இதில் தமிழக கடலோர காவல்படையும், இந்திய கடலோர காவல்படை
மற் றும் கடற்படை முன்னெச்சரிக்கையுடன் செயல்பட்டு வருகிறது.
இந்தியா, ஜப்பான், அமெரிக்கா ஆகிய நாடுகள் இணைந்து நடத்தும்
கூட்டு போர் ஒத்திகை நிகழ்ச்சி குறித்து முழு தகவல்களும் கொடுக்க
ப்படும்.

அடுத்த ஆண்டு (2016) பிப்ரவரி மாதத்தில் இந்தியாவில் நடக்கும்
சர்வதேச கடற்படை கூட்டு ஆய்வுக்கு உலகநாடுகளுக்கு அழைப்பு
விடுக்கப்பட்டுள்ளது. இதில் 27 நாடுகள் பங்கு பெறுவதாக அறிவித்துள்ளது.
வரும் நாட்களில் இன்னும் சில நாடுகள் வரும் என்று எதிர்பார்க்கிறோம்.

இவ்வாறு அவர் கூறினார்.
–
—————————————-
தினத்தந்தி