1 ரூபாய் நோட்டுக்கு திடீர் மவுசு: 'ஆன்லைன்' வர்த்தகத்தில் 500 ரூபாய் !

**krishnaamma** · **krishnaamma** Thu Oct 08, 2015 11:38 am

ஒரு ரூபாய் நோட்டுகள் அச்சடிப்பதை, 20 ஆண்டுகளாக அரசு நிறுத்தி வைத்துள்ள நிலையில், அதற்கு மவுசு அதிகரித்துள்ளது. பழமையான பொருட்களை சேகரிப்போர், 150 முதல், 500 ரூபாய் செலவு செய்து, ஒரு ரூபாய் தாளை வாங்க தயாராக உள்ளனர்.

இந்தியாவில், ஒரு ரூபாய் நோட்டுகளை புழக்கத்தில் விடுவதை, 1996ம் ஆண்டுடன், மத்திய அரசு நிறுத்தி விட்டது. எனினும், கடந்த ஐக்கிய முற்போக்கு கூட்டணி அரசு, மீண்டும் அச்சடிக்க முயன்றபோது, ரிசர்வ் வங்கி எதிர்ப்பு தெரிவித்தது.அதையடுத்து, சட்ட அமைச்சகத்துடன் மத்திய அரசு கலந்தாலோசித்தது. அப்போது, 'ரிசர்வ் வங்கி அனுமதியின்றி, அச்சடிக்கலாம்' என, ஆலோசனை வழங்கப்பட்டது.

அதைத் தொடர்ந்து, மிகக் குறைந்த அளவில், ஒரு ரூபாய் நோட்டுகளை மத்திய அரசு அச்சிட்டது. எனவே, அவை தாராளமாக கிடைப்பதில்லை. அதனால், இது அரிய பொருள் வரிசையில் சேர்ந்து விட்டது.

தற்போது, 'இ--பே' ஆன்லைன் நிறுவனம், ஒரு ரூபாய் நோட்டுகளை ஏல முறையில் விற்பனை செய்கிறது. இந்த ஆண்டு அச்சிடப்பட்ட, ஒரு ரூபாய் நோட்டு ஒன்றின் விலை, 49 ரூபாயாக அந்நிறுவனம் நிர்ணயித்து உள்ளது. அதை, கூரியரில் அனுப்ப, 50 ரூபாய் கட்டணத்தைச் சேர்த்து, 99 ரூபாய்க்கு விற்கிறது. ஆனாலும், நாணயம் மற்றும் ரூபாய் நோட்டுகளை சேகரிப்போர், வாங்க விரும்புகின்றனர்.

இதுபோல், 1978ல் அச்சிடப்பட்டு, தற்போது புழக்கத்தில் குறைந்துள்ள, பழைய ஒரு ரூபாய் நோட்டுக்கு விலை, 450 ரூபாய். இந்தளவுக்கு ஒரு ரூபாய் நோட்டுக்கு திடீர் மவுசு ஏற்பட்டதற்கு, கடந்த, 20 ஆண்டுகளில், மத்திய அரசு வெறும், 1.9 லட்சம் ஒரு ரூபாய் நோட்டுகளை மட்டும் அச்சிட்டுள்ளது தான் காரணம் என கூறப்படுகிறது.-

விரைவில் புதிய 1 ரூபாய் !

இதுகுறித்து, ரிசர்வ் வங்கி அதிகாரிகள் கூறியதாவது:பொதுவாக, ஒரு ரூபாய் நோட்டு மற்றும் நாணயங்களை தயாரிக்கும் பொறுப்பு, மத்திய அரசிடம் உள்ளது. ஆனால், அதற்கு அதிகமான மதிப்புடைய ரூபாய் நோட்டுகளை, ரிசர்வ் வங்கி அச்சிட்டு வினியோகித்து வருகிறது. ஒரு ரூபாய் நோட்டில் மட்டும், மத்திய நிதி துறை செயலரின் கையெழுத்து இருக்கும்.

தற்போது, குறிப்பிட்ட அளவில் மட்டும், ஒரு ரூபாய் நோட்டுகள் புழக்கத்தில் விடப்படுகின்றன. சமீபத்தில், வடமாநிலங்களில், புதிய ஒரு ரூபாய் நோட்டுகள் வினியோகிக்கப்பட்டன.

தமிழகத்தில், புழக்கத்தில் விடுவது பற்றிய அறிவிப்பு விரைவில் வெளியாகும். அப்போது, பொதுமக்கள் நேரடியாக, ரிசர்வ் வங்கியில் வாங்க ஏற்பாடு செய்யப்படும். இவ்வாறு அவர்கள் தெரிவித்தனர்.

தினமலர்