திண்டுக்கல்லில் கிளிமூக்கு, விசிறிவால் சேவல்களின் கண்காட்சி!

-
இந்தியாவிலேயே முதல்முறையாக திண்டுக்கல்லில் கிளிமூக்கு, விசிறிவால் சேவல் கண்காட்சி நடைபெற்றது. சண்டை சேவல் வகைகளில், அழகுக்காக வளர்க்கப்படும் இவ்வகை சேவல்கள் கண்காட்சியில் இடம் பெறுவது இதுவே முதல்முறையாகும்.
–
தமிழகத்தில் அசீல், கடக்நாத், பஸ்ரா, நீக்கோபாரி, மொட்டைக் கழுத்து போன்ற கோழி இனங்கள் இறைச்சிக்காக வளர்க்கப்படுகின்றன. உணவிற்காக வளர்க்கப்படும் சேவல்கள் ஒருவகை என்றால், சண்டைக்காகவும் அழகுக்காகவும் வளர்க்கப்படும் சேவல்கள் மற்றொரு வகை. அப்படி அழகுக்காக வளர்க்கப்படும் மயில் கருப்பு, கீரி, கொக்கு வெள்ளை, கருஞ்செவலை, எண்ணெய் கருப்பு, பொன்னிறம் உள்ளிட்ட சேவல் இனங்கள் இப்போது அழிவின் விழிம்பில் இருக்கின்றன.
–
தமிழகத்தில் இவ்வகை கிளிமூக்கு, விசிறிவால் வகை சேவல்களுக்கு தென்மாவட்டங்கள்தான் பூர்வீகம். முன்பு சண்டைக்காக மட்டுமே வளர்க்கப்பட்ட சேவல்கள், இப்போது அழகுக்காகவும் பொழுதுபோக்கிற்காகவும் வளர்க்கப்படுகின்றன.

–“அழிந்து வரும் இச்சேவல் இனங்களை பாதுக்காக்கவும், அழகுக்காகவும் வளர்க்கப்படும் இச்சேவல்களை பிரபலபடுத்தவும், மக்களிடையே இந்த வகை சேவல்கள் குறித்த விழிப்புணர்வுவை ஏற்படுத்தவும் கண்காட்சிகள் அகில இந்திய சேவல் சங்கத்தின் சார்பில் நடத்தப்படுகிறது. 200 சேவல்கள் இக்கண்காட்சியில் பங்குபெற்றன. அடுத்ததாக இக்கண்காட்சி வரும் ஜனவரி மாதம் கோயமுத்தூரில் நடைபெறுகிறது.”
–
தமிழகத்தின் பல பகுதிகளில் இருந்தும், ஆந்திரா, ஒடிஸா, கர்நாடகா, கேரளா போன்ற மாநிலங்களில் இருந்தும் சவுதி அரேபியா, ஏமன், ஜோர்டன் போன்ற நாடுகளில் இருந்தும் கூட சேவல் ஆர்வலர்கள் தங்கள் சேவல்களுடன் கண்காட்சியில் ஆர்வத்துடன் பங்குபெற்றனர்!
–
திருச்சி முசிறியில் இருந்து வந்து கண்காட்சியில் தன் சேவலோடு கலந்துகொண்ட வாசுவிடம் பேசினோம். “என் பத்து வயதிலிருந்தே இவ்வகை சேவல்களை வளர்த்து வருகிறேன். நிறம், மூக்கு, வால் போன்ற அங்கங்களை மிக நேர்த்தியாக பராமரித்து சேவல்களை வளர்க்கிறேன். கிளிமூக்கு சேவல் வைத்திருப்பதை மிகவும் பெருமையாக கருதுகிறேன்” என்கிறார் வாசு. மேலும் ”சேவல் சண்டைக்கு பதில் இதுபோன்ற கண்காட்சிகள் நடத்தப்பட்டால் நாங்களும் பயனடைவோம், மக்களும் இது பற்றி அதிகம் தெரிந்துகொள்வார்கள்” என்றார்.
–

-
கிளிமூக்கு வகை சேவல்களை வாங்கும்போது சேவலின் நிறம், அலகு, தலை மற்றும் அதில் இருக்கும் பூ, காதுகள், வால் அமைப்பு, தாடை, முதுகு அமைப்பு, நீளமான கழுத்து, உறுதியான கால்கள், சிறகுகள், உடல்அமைப்பு உள்பட 32 விதமான அம்சங்களை கணித்துப்பார்த்து வாங்குகிறார்கள். கால்கள், கழுத்து, அலகு, வால் ஆகியவைகளுக்கு அதிக முக்கியத்துவம் கொடுக்கிறார்கள். காலில் உள்பக்கமாக வளரும் முள்ளை வைத்து அதன் வயதை எளிதாக கண்டுபிடித்து விடுகின்றனர்.
–
கண்காட்சியில் தன் மூன்று சேவல்களுடன் பழனியில் இருந்து வந்து கலந்துகொண்ட சீனிவாசனும் சிறுவயதில் இருந்தே இவ்வகை சேவல்களை வளர்த்து வருகிறார். எங்களைப் போன்றவர்களை ஊக்குவிக்க இதுபோன்ற கண்காட்சிகள் அடிக்கடி நடத்தப்பட வேண்டும் என்றும், அழிவின் விழிம்பில் இருக்கும் இச்சேவல்ளை பாதுகாக்கும் கடமை நம் அனைவருக்கும் உண்டு என்றும் அவர் கூறினார்.
–
கண்காட்சியில் சிறந்ததாக தேர்வு செய்யப்பட்ட சேவல்களுக்கு 1 கிராம் தங்கமும், கோழிக்குஞ்சுகளுக்கு 10 கிராம் வெள்ளியும் பரிசாக அளிக்கப்பட்டது. வித்தியாசமாக நடைபெற்ற இக்கண்காட்சியை பொதுமக்களும் ஆர்வத்துடன் ரசித்துச் சென்றனர்.
–
– சு. அருண் பிரசாத்

விகடன்