கதை கேளு, கதை கேளு ... சைக்கிள் கதை கேளு :)

கதை கேளு, கதை கேளு ... சைக்கிள் கதை கேளு



* இந்தியாவிற்கு முதல் சைக்கிள் 1890ம் ஆண்டுதான் வெளிநாட்டிலிருந்து இறக்குமதியாகி வந்தது. இதன் விலை 45 ரூபாய்.

* முதல் உலக யுத்தம் நடந்த போது, 1917ல் சைக்கிளின் விலை 500 ரூபாய்க்கு உயர்ந்தது. ஆனால், யுத்தம் முடிந்ததும் 15 ரூபாய்க்கு குறைந்து விட்டது.

* பஞ்சாபை சார்ந்த 5 பேர் BSA குறுக்கு பார் சைக்கிளை 1919ல் பிரிட்டனிலிருந்து இறக்குமதி செய்து சிம்லாவில் ஓட்ட எண்ணினர். அதற்கு அப்போது கவர்னரின் அனுமதி தேவைப்பட்டது. அவர் சிம்லாவின் பிரதான மால்சாலையில் ஒரு மணி நேரம் ஓட்ட அனுமதி கொடுத்தார். அப்போதுதான் சிம்லாவில் சைக்கிளையே பலர் முதல் தடவையாக பார்த்தனர்.

* 'ஸ்ரீஜான்கிதாஸ் கபூர்' என்பவர் 1951ல் அட்லஸ் சைக்கிள் தொழிலகத்தை 'சோனாபட்'டில் துவங்கினார். வருடத்திற்கு 12ஆயிரம் சைக்கிள்கள் தயாரிக்கப்பட்டு விற்பனைக்கு வந்தன.

* 'மஞ்கல்' என்பவர், 1956ல் HERO சைக்கிள் நிறுவனத்தை துவங்கினார்.

* 'அட்லஸ்' சைக்கிள் 1958ல் முதல் தடவையாக வெளிநாட்டுக்கு ஏற்றுமதி செய்யப்பட்டது.

* ஹீரோ சைக்கிள் 1975ல் இந்தியாவில் மிகப் பெரிய சைக்கிள் தயாரிக்கும் நிறுவனமாக மாறியது. அதிலிருந்து தினமும் 7ஆயிரத்து 500 சைக்கிள்கள் தயாரிக்கப்பட்டு வெளிவரலாயின.

* அட்லஸ் சைக்கிள் 1978ல் முதல் ரேஸ் சைக்கிளை அறிமுகப்படுத்தியது. அட்லஸ் மட்டுமே இன்று 4 மில்லியன் சைக்கிள்களை உற்பத்தி செய்கிறது.

* பயர் பாக்ஸ் என்ற இந்திய பிராண்ட் 2005ல் 6000 ரூபாயில் சூப்பர் சைக்கிள் ஒன்றை விற்பனைக்கு கொண்டு வந்தது.

* இன்று சைக்கிள்கள் 'ரோடு பைக்ஸ்' 'ஹைபிரிட்ஸ்' என பல பெயர்களில் வெளிவருகின்றன. இவை 20ஆயிரம் ரூபாய் முதல் 8 லட்ச ரூபாய் வரை விற்கப்படுகின்றன.

* சைக்கிளிலேயே இன்று எல்.இ.டி., லைட்கள் பொருத்தப்பட்டுள்ளது.

* கார்களில், குளிர் வாசஸ்தலங்களுக்கு செல்பவர்கள். அங்கு ஜாலியாக சைக்கிளில் சுற்றி வர ஏதுவாய், சைக்கிளையும் காருடன் எடுத்துச் செல்ல ஏதுவாய் இன்று கேரியர்கள் வந்துவிட்டன.

* இன்று ப்ரீமியம் பிராண்ட் சைக்கிள்கள் பல உள்ளன. டிரெக், பெர்காமவுண்ட், பியாக்சிதாகூன், க்ளாண்ட், மெரிடா, கானன்டேல், ஸ்பெஷலைஸ்ட் மெர்சடெஸ்... ஹம்மர் என பல பிராண்டுகள் உள்ளன.

*இந்த அல்ட்ரா மாடர்ன் சைக்கிள்கள், இன்று பெங்களூரில் மட்டும் 15ஆயிரம் உள்ளன. இவற்றை பெரிய மனிதர்கள் அல்லது அவர்களுடைய குழந்தைகள் ஓட்டுகின்றனர்.

'கானன்டேல் சினாப்சி' என்ற சைக்கிளின் விலை எவ்வளவு தெரியுமா?
1லட்சத்து 30 ஆயிரம் ரூபாய்...!

*கர்நாடகாவில், பீஜப்பூரை 'சைக்கிளின் நகரம்' என அழைக்கின்றனர். இதற்கு காரணம்... இங்கு மன்னர்கள் காலத்திலேயே சைக்கிள்கள் ஓட்டவும், அவர்க ளிடையே போட்டி வைத்து, பரிசளித்தும் ஊக்கப்படுத்தப்பட்டனர்.

*இதனால்தானோ என்னவோ இன்றும் பீஜப்பூர் சைக்கிள் வீரர்களுக்கு பேர் பெற்ற ஊராக உள்ளது. ஆமாம் இந்திய, சர்வதேச வீரர்களான நீலம்மா மல்லிகாவாத், வேலப்பா பி.லமானி, கங்கு பிராதர் மற்றும் காவேரி பனாகர் ஆகியோர், பீஜப்பூரை சார்ந்தவர்கள் தான்!

பெங்களூரில் சொகுசு சைக்கிள்களை ஓட்டுகின்ற பலர், பல சைக்கிள் கிளப்புகளை இணைந்து அவ்வப்போது ஊர் வலமும் நடத்தி வருகின்றனர். சுற்றுப் புற சூழல் தடுப்புக்கு சிறந்த கருவியாக இன்று சைக்கிள் உள்ளது.

ஸ்ரீலட்சுமி.
சிறுவர்மலர்