அரசி (Queen- Pablo Neruda)

Rangarajan Sundaravadivel · Rangarajan Sundaravadivel Thu Oct 04, 2012 9:58 am

நான் உன்னை அரசியாக்கினேன்.
உன்னை விட உயரமானவர்கள் உண்டு;
உன்னை விட தூய்மையானவர்கள் உண்டு;
உன்னை விட அழகானவர்கள் உண்டு;
ஆனால் அரசி நீயே.

நீ வீதிகளில் நடக்கும் போது ஒருவரும் உன்னை உணர்வதில்லை;
உனது வெண்கிரீடத்தை எவரும் காண்பதில்லை;
நீ நடக்கும் சிவப்புக் கம்பளத்தை யாரும் பார்ப்பதில்லை.
(அப்படியொரு கம்பளம் இருந்ததேயில்லை)

நீ தோன்றும் போது,
நதிகள் என் உடலில் ஓலமிடுகின்றன;
மணியோசை ஆகாயத்தை அசைக்கிறது;
இசை இவ்வுலகை நிறைக்கிறது.

நீயும் நானும் மட்டும்- அன்பே,
நீயும் நானும் மட்டும்.
நான் சொல்வதைக் கவனி.