பறிமுதல் செய்த லாட்டரிக்கு கிடைத்த பரிசை பகிர்ந்து கொண்ட 2 போலீஸார் இடமாற்றம்:

-
கடந்த 15 ஆம் தேதி, தேனி மாவட்டம் கூடலூரில்
தெற்கு காவல் நிலைய போலீஸார் ரோந்து சென்றனர்.
அப்போது, தடை செய்யப்பட்ட கேரள லாட்டரி சீட்டுகளை
விற்பனை செய்துகொண்டிருந்த, அதே ஊரைச் சேர்ந்த
ஆதிமுத்து என்பவரைப் பிடித்தனர்.

பின்னர், அவரிடமிருந்து தடை செய்யப்பட்ட 26 லாட்டரி
சீட்டுகளையும் பறிமுதல் செய்து, அவரைக் கைது செய்து
சிறையில் அடைத்தனர்.

ஜாமீனில் வெளியே வந்த ஆதிமுத்துவிடம், அவர்
வைத்திருந்த லாட்டரி சீட்டுக்கு ரூ. 35 ஆயிரம் பரிசு
விழுந்துள்ளதாக கேரள லாட்டரி நிறுவனத்தினர்
தெரிவித்துள்ளனர்.

உடனே, தெற்கு காவல் நிலைய போலீஸாரிடம் தகவல்
தெரிவித்த ஆதிமுத்து, அந்த லாட்டரி சீட்டை தரும்படி
கேட்டுள்ளார். அப்போது, காவல் நிலையத்தில்
பணியிலிருந்த கண்ணன், மணிமாறன் ஆகிய இரு
போலீஸாரும் பறிமுதல் செய்யப்பட்ட லாட்டரி சீட்டுகளை
எடுத்துக்கொண்டு, ஆதிமுத்துவுடன் கேரள மாநிலம்
குமுளியில் உள்ள லாட்டரி நிறுவனத்துக்குச் சென்றுள்ளனர்.

பின்னர், பரிசு விழுந்த லாட்டரியின் மூலம் ரூ. 35 ஆயிரம்
பெற்றுள்ளனர். அதையடுத்து, ஆதிமுத்துவுக்கு
ரூ. 3 ஆயிரத்தை மட்டும் கொடுத்துவிட்டு, வெளியே
சொன்னால் கைது செய்து மறுபடியும் சிறையில் அடைத்து
விடுவோம் என மிரட்டியுள்ளனர்.

பின்னர், மீதமுள்ள ரூ. 32 ஆயிரத்தை தலா ரூ. 16 ஆயிரம்
என பிரித்துக் கொண்டனர்.

இது குறித்து ஆதிமுத்து காவல் நிலையத்திலுள்ள மற்ற
போலீஸாரிடம் தெரிவித்தார். இதனால், தங்களுக்கும்
பங்கு தராமல் ஏமாற்றிவிட்டதாக மற்ற போலீஸார்
அவர்கள் மீது கோபத்தில் இருப்பதாக, வாட்ஸ் அப்பில்
தகவல் பரவியது.
இதை, நூற்றுக்கணக்கானோர் பரிமாறிக் கொண்டனர்.
-
இது சம்பந்தமான தகவல் மாவட்டக் காவல் துறைக்கு
தெரியவந்ததை அடுத்து, மேற்கொள்ளப்பட்ட
விசாரணையில், அவர்கள் இருவரும் பரிசுத் தொகை பெற்றது
உறுதி செய்யப்பட்டது.
-
எனவே, இரண்டு போலீஸாரையும் கூடலூர் தெற்கு காவல்
நிலையத்திலிருந்து மாவட்ட ஆயுதப்படைக்கு பணிமாற்றம்
செய்து, மாவட்டக் காவல் துறை உத்தரவிட்டது.
அவர்களும் உடனே பணியில் சேர்ந்து விட்டனர். இச்சம்பவம்,
மாவட்டக் காவல் துறையினரிடையே பரபரப்பை ஏற்படுத்தியது.
-
---------------------------------------
தினமணி