ஆறு மாதங்களில் 85 பிள்ளைகள் பெற்ற ‘மோசடி தாதி’

-
இந்தியாவின் அசாம் மாநிலத்தில் உள்ள
ஊரக சுகாதார நிலையம் ஒன்றில் தாதியாகப்
பணியாற்றும் லில்லி பேகம் லஸ்கர் (படம்) என்ற
பெண்மணி ஆறே மாதங்களில் 85 பிள்ளைகளைப்
பெற்றுள்ளார்.

அரசாங்க ஊக்கத்தொகை பெறுவதற்காக லில்லி
அரங்கேற்றிய இந்த மோசடி வெளிச்சத்திற்கு
வந்ததையடுத்து அவர் தற்காலிக வேலைநீக்கம்
செய்யப்பட்டார்.

அசாமில், ஆயிரம் குழந்தைகளில் 54 பிள்ளைகள்
பிறக்கும்போதே இறந்து விடுகின்றன. அத்துடன்
பிரசவத்தின்போது இறக்கும் பெண்களின்
எண்ணிக்கையும் 100,000 பேருக்கு 328 என்ற அளவில்
அங்கு அதிகமாக உள்ளது.

இதைக் கட்டுப்படுத்தும்விதமாக, பாது காப்பாகக்
குழந்தை பெற்றெடுப்பதற்காக ஊரக சுகாதார
நிலையங்களுக்கு வரும் பெண்களுக்கு 500 ரூபாய்
ஊக்கத்தொகை வழங்கப்படும் என அசாம் மாநில
அரசு அறிவித்திருந்தது. இந்த வாய்ப்பைப் பயன்
படுத்தி பணம் பெறத் திட்டம் போட்டார் லில்லி.

இதையடுத்து, தாம் பணியாற்றி வரும் ஊரக சுகாதார
நிலையத்தில் மட்டும் கடந்த ஆறு மாதங்களில்
160 பிரசவங்கள் பார்க்கப் பட்டதாகவும் அதில் பாதிக்கும்
மேற்பட்ட சம்பவங்களில் தாமே குழந்தையின் தாய்
என்றும் அவர் பதிவு செய்துள்ளார்.
இதன்மூலம் ரூ.40,000க்கும் அதிகமான தொகையை
அவர் சுருட்டினார். “அந்தச் சுகாதார நிலையத்தில்
பணி புரியும் ஒருவர் மூலம் கிடைத்த தகவலை அடுத்து,
அந்த நிலையத்தில் திடீர் ஆய்வு மேற்கொண்டோம்.
அப்போது நாங்கள் கண்டுபிடித்ததை எங்களாலேயே
நம்ப முடியவில்லை.

லில்லியின் பெயரில் மட்டும் 85 பிரசவங்கள் பதிவு
செய்யப்பட்டிருந்தன. புதிய தாய்மார்களுக்கு வழங்கப்
படும் ஊக்கத்தொகையை விநியோகித்ததும் அவர்தான்
என்பதால் அவரது மோசடியை எளிதில் கண்டுபிடிக்க
முடியவில்லை,” என்றார் சர்ஃபராஸ் ஹக் என்ற
அரசாங்க உயரதிகாரி.

தமது மோசடி குறித்தும் தற்காலிகப் பணிநீக்கம்
குறித்தும் லில்லி அதிகம் அலட்டிக்கொள்ளவில்லை
என்பது அவரது பேச்சில் தெரிந்தது.
-
----------------------------------------
தமிழ்முரசு, சிங்கப்பூர்