அதிர்ச்சியில் இருந்து மீண்டுள்ளோம்: சங்ககாரா

லாகூரில் பயங்கரவாத தாக்குதல் அதிர்ச்சியில் இருந்து தனது அணி வீரர்கள் அனைவரும் மீண்டுள்ளதாக, இலங்கை கிரிக்கெட் வீரர் சங்ககாரா கூறியுள்ளார்.


இதுதொடர்பாக அவர் கூறியதாவது, பயங்கரவாதிகள் ஆயுதங்களால் தாக்கியதில் சிலருக்கு காயங்கள் ஏற்பட்டுள்ளன. ஆனாலும் எல்லோரும் பத்திரமாக இருக்கிறோம். எந்த வீரருக்கும் எந்த வித ஆபத்தும் இல்லை.

திலனின் காலில் புல்லட் பாய்ந்தது அதிர்ச்சியைத் தந்தது. ஆனால், இப்போது அவர் நலமுடன் இருக்கிறார். எல்லோருமே இப்போது நலமுடன் இருக்கிறோம். என் தோளில் குண்டுத் துகள்கள் பாய்ந்ததிருந்தது. அவை மருத்துவர்களால் எடுக்கப்பட்டு விட்டது.

இந்தத் தாக்குதல் நடந்ததில் எங்களுக்கு பலத்த அதிர்ச்சிதான். ஆயினும் அதிலிருந்து மீண்டு ஒவ்வொருவரும் நன்றாக இருக்கிறோம். இந்தத் தாக்குதல் சம்பவம் மிகவும் துரதிர்ஷ்டவசமானது.

பாகிஸ்தானுக்கு கிரிக்கெட் விளையாட வர மாட்டேன் என்று நான் மறுப்பு தெரிவிக்கவில்லை. காரணம், எங்கள் வாழ்க்கைக்காகத்தான் இந்த விளையாட்டை விளையாடுகிறோம். இது எங்களின் தொழில். ஆனால் எங்கள் குடும்பத்தை பார்க்கவும், ஊருக்கு பத்திரமாக செல்லவுமே இப்போது நாங்கள் விரும்புகிறோம் என்றார்.

இந்தச் சம்பவத்தில் உயிர் தப்பியது பற்றி ஜெயவர்த்தனே கூறுகையில், துப்பாக்கியுடன் வந்தவர்கள் முதலில் பஸ்சின் சக்கரத்தை நோக்கி சுட்டார்கள். பின்னர் பஸ்சை நோக்கி சுட்டனர். உடனே நாங்கள் அனைவரும் கீழே படுத்து எங்களை பாதுகாத்துக் கொண்டோம் என்றார்.

பாகிஸ்தானின் லாகூரில் உள்ள கடாபி கிரிக்கெட் மைதானத்துக்கு பயிற்சிக்காக சென்று கொண்டிருந்த இலங்கை கிரிக்கெட் வீரர்களின் பஸ் மீது பயங்கரவாதிகள் நடத்திய தாக்குதலில் குமார் சங்ககாரா, அஜந்தா மெண்டிஸ், தரங்க பரனவிதன, திலன் சமரவீர, மஹேல ஜெயவர்த்தனே, சமித்தா வாஸ் ஆகியோர் காயமடைந்தது குறிப்பிடத்தக்கது.

இந்தத் தாக்குதலுக்குப் பிறகு உடனடியாக கிரிக்கெட் தொடர் ரத்து செய்யப்பட்டு, இலங்கை வீரர்கள் அபுதாபிக்கு பலத்த பாதுகாப்புடன் அனுப்பப்பட்டனர். அங்கிருந்தபடி அவர்கள் இலங்கை செல்கின்றனர்.