‘‘ராமாயணம் கதையை படமாக எடுக்க ஆசை- டைரக்டர் பிரபுதேவா –

-
மும்பை,

‘‘ராமாயணம் கதையை பிரமாண்டமான சினிமா
படமாக எடுக்க ஆசை உள்ளது. தயாரிப்பாளர் கிடைத்தால்,
அதிக பொருட்செலவில் இந்த படத்தை இயக்குவேன்’’
என்று பிரபுதேவா கூறினார்.

ராமாயணம்

ராமாயணம் கதை ஏற்கனவே ‘சம்பூர்ண ராமாயணம்’
என்ற பெயரில் படமாக தயாராகி 1958-ல் வெளிவந்தது.
சிவாஜிகணேசனும், என்.டி.ராமராவும் இதில் நடித்து
இருந்தனர். தற்போது டெலிவிஷன்களில் ராமாயணம்
தொடராக வருகிறது.

ராமாயணம் கதையை சினிமா படமாக்க டைரக்டர்
பிரபுதேவா முயற்சித்து வருகிறார். ஹாலிவுட்டில் வெளியாகி
பரபரப்பாக ஓடிய ‘லார்ட் ஆப் த ரிங்க்ஸ்’ என்ற படத்தை
போல் பிரமாண்டமான படமாக ராமாயணத்தை உருவாக்க
அவர் விரும்புகிறார்.

சாகச படம்

‘லார்ட் ஆப் த ரிங்க்ஸ்’ உலகம் முழுவதும் ரசிகர்களை
வெகுவாக கவர்ந்த சாகச படம். இந்த படம் மூன்று
பாகங்களாக வெளிவந்தது. முதல் பாகம் 2001-ம் ஆண்டிலும்,
இரண்டாம் பாகம் 2002-லும், மூன்றாம் பாகம் 2003-லும் வந்தது.
ஏற்கனவே வெளியான ஒரு நாவலை மையமாக வைத்து
அதே பெயரில் பீட்டர் ஜாக்ஷன் இந்த படத்தை இயக்கி
இருந்தார்.

அதே பாணியில் ராமாயணம் கதையை படமாக்க பிரபுதேவா
திட்டமிட்டு உள்ளார். இதுகுறித்து அவர் அளித்த பேட்டி வருமாறு:-

கனவு படம்

‘‘ராமாயணம் கதையை படமாக எடுப்பது என் லட்சிய கனவாக
இருக்கிறது. ‘லார்ட் ஆப் த ரிங்க்ஸ்’ ஹாலிவுட் படத்தைப்போல்
இதை உருவாக்க ஆசைப்படுகிறேன். ஆனால் ராமாயணத்தை
படமாக்குவதற்கு அதிக பணம் தேவைப்படும். நிறைய செலவு
செய்யக்கூடிய தயாரிப்பாளர் கிடைத்தால் ராமாயணத்தை
படமாக்குவேன்.

சூப்பர் ஸ்டார்கள் அமிதாப்பச்சன், ரஜினிகாந்த் ஆகியோரை
வைத்து படங்கள் இயக்கவும் ஆசை இருக்கிறது. ஏற்கனவே
அமிதாப்பச்சன் படம் ஒன்றை இயக்க எனக்கு வாய்ப்பு வந்தது.
ஆனால், என்னிடம் அப்போது தேதிகள் இல்லாமல் போனதால்
அது நடக்காமல் போய்விட்டது. அமிதாப்பச்சன் எப்போது
அழைத்தாலும் அவர் படத்தை இயக்க தயாராக இருக்கிறேன்.

ரஜினிகாந்த்

ரஜினிகாந்த் பெரிய சூப்பர் ஸ்டார். என் இயக் கத்தில் நடிப்பது
பற்றி அவர்தான் முடிவு செய்ய வேண் டும். அவருடன் இணைந்து
பணியாற்ற ஆர்வமாக இருக்கிறேன்.’’

இவ்வாறு பிரபுதேவா கூறினார்.
–
———————————————-
தினத்தந்தி