விதையில்லாப் பழம் .

**M.Jagadeesan** · **M.Jagadeesan** Tue Oct 06, 2015 9:16 pm

"காய்கறி வாங்கிட்டு வரும்போது அப்படியே ஒரு தர்பூசணி பழம் வாங்கிட்டு வாங்க! வெயிலுக்கு இதமா இருக்கும்." என்றால் என் மனைவி.

"வெயிலுக்கு இதமாத்தான் இருக்கும்; ஆனா அதுல இருக்குற கறுப்பு விதைகளை எடுத்துட்டு சாப்பிடணும்! அதுதான் கொஞ்சம் கஷ்டம்! முன்னாடியெல்லாம் திராட்சையில விதை இருக்கும்.அத சாப்பிடும்போது விதைய துப்பிட்டு சாப்பிடணும்.பிறகு Seedless Grapes..கண்டுபிடிச்சாங்க இப்ப நிம்மதியா சாப்பிட முடியுது. சீதாப்பழம் சாப்பிடறது ரொம்ப நியூசன்ஸ்! அதுல இருக்குற விதைய எடுத்துட்டு சாப்பிடறதுக்குல்ல பிராணனே போயிடும்! பழம்னா, உரிச்சோமா, சாப்பிட்டோமான்னு இருக்கணும். வாழைப்பழம் மாதிரி."

"அது கூட உரிச்சு சாப்பிடறது கொஞ்சம் கஷ்டம்தானே! யாராவது உரிச்சு கொடுத்தா வசதியா இருக்கும்! இல்லீங்களா?"

" என்ன? கிண்டலா? என்னை வாழைப்பழ சோம்பேறின்னு சொல்றியா?"

"ஐயையோ! அப்படி நான் சொல்லலையே! எதையும் கஷ்டப்படாமெ அனுபவிக்கனும்னு நினைக்கிறீங்களே! அதைத்தான் சொன்னேன்!"

"வள்ளுவர் கூட விதையில்லாப் பழத்தைப் பற்றிப் பேசியிருக்கார் ; உனக்குத் தெரியுமா ?

“ தெரியாதுங்களே ! அது என்ன பழம் ? “

காமப் பழம் !

ச்சே ! எந்த நேரத்துல எதைப்பத்திப் பேசணும்னு உங்களுக்குக் கொஞ்சம்கூட விவஸ்தை கிடையாது !

காமம்னு சொன்னாலே பேசக்கூடாத ஒன்னு என்ற முடிவுக்கு நாம் வரக்கூடாது; முதல்ல நான் சொல்றதக் கேளு ! அப்புறமா நீயே முடிவு பண்ணிக்கோ !

சரி சொல்லுங்க !

தாம்வீழ்வார் தம்வீழப் பெற்றவர் பெற்றாரே
காமத்துக் காழில் கனி.(1191)

அப்பிடின்னு ஒரு குறள் பாடியிருக்காரு ! இந்தக் குறளின் பொருள் என்ன தெரியுமா ?

நீங்களே சொல்லுங்க ! எனக்குத் தமிழ் கொஞ்சம் தகராறு !

கணவன் ,மனைவி இருவருக்கும் இடையில் எந்த மன வேறுபாடும் இருக்கக்கூடாது . உடல் ,உள்ளம் ,உயிர் மூன்றாலும் ஒன்றுபடவேண்டும் . இந்தநிலையில் இருவருக்கும் இடையில் நடக்கும் புணர்ச்சியானது , விதையில்லாப் பழத்தை சாப்பிடுவதுபோல மிகவும் இன்பமாக இருக்கும் .அவ்வாறின்றி இருவருக்கும் இடையில் மனவேறுபாடு இருப்பின் , அது புணர்ச்சியின் போது துன்பம் செய்யும் . மனநிறைவு இருக்காது . எவ்வாறெனின் பழத்தைச் சாப்பிடும்போது இடையே விதைகள் வந்து துன்பம்செய்தல் போல !

சரி ! சரி ! உங்களோட வள்ளுவர் வியாக்கியானத்தை நிறுத்துங்க ! வாசல்ல யாரோ வர்றமாதிரி தெரியுது !