15 வயதிலேயே ‘ஐ.க்யூ’வில் அசத்தி பி.டெக். படிக்கும் நெல்லை மாணவி

**T.N.Balasubramanian** · **T.N.Balasubramanian** Sat 5 Sep 2015 - 22:23

15 வயதிலேயே ‘ஐ.க்யூ’வில் அசத்தி பி.டெக். படிக்கும் நெல்லை மாணவியுடன் காணொலி காட்சியில் பிரதமர் இன்று பேசுகிறார்: ஆட்சியர் அலுவலகத்தில் ஒத்திகைb]

திருநெல்வேலி மாணவி விசாலினி யுடன்(15), பிரதமர் மோடி இன்று காணொலி காட்சி மூலம் பேசுகிறார். இதற்கான ஒத்திகை நேற்று மாவட்ட ஆட்சியர் அலுவலகத்தில் நடைபெற்றது.

திருநெல்வேலி நீதிமன்றம் அருகேயுள்ள சங்கர்நகரில் கல்யாணகுமாரசாமி - சேதுராக மாலிகா தம்பதியின் மகள் விசாலினி. சிறுவயதில் மழலைப் பேச்சுக்கே திணறியவர். தற்போது கம்ப்யூட்டர் துறையில் தமது வயதை கடந்த சாதனைகள் படைத்துவருகிறார். பாளையங் கோட்டை லட்சுமிராமன் பள்ளியில் ஒன்பதாம் வகுப்பு பயின்றார். சிறுவயதிலேயே கம்ப்யூட்டர் துறையில் பல்வேறு கடினமான தேர்வுகளில் இவர் தேர்ச்சி பெற்ற தைப் பாராட்டி, 15 வயதிலேயே ஸ்ரீவில்லிபுத்தூர் கலசலிங்கம் பல்கலைக்கழகத்தில் கம்ப்யூட்டர் சயின்ஸ் துறையில் பிடெக் முதலாம் ஆண்டில் பயில அனுமதிக்கப்பட்டுள்ளார்.

ஆசிரியர் தினத்தையொட்டி இன்று மத்திய மனிதவள மேம்பாட்டுத் துறையின் ஏற்பாட்டில், நாடு முழுவதும் பத்து மாநிலங்களில் சிறந்து விளங்கும் மாணவ, மாணவிகளுடன் காணொலி காட்சி மூலம் பிரதமர் பேசுவதற்கு ஏற்பாடு செய்யப்பட்டுள்ளது. தமிழகத்தில் விசாலினியுடன் இன்று காலை 11 மணிக்கு, பிரதமர் மோடி பேசுகிறார்.

இதுகுறித்து விசாலினியின் தாய் சேதுராகமாலிகா கூறியதாவது:

சிறுவயதிலேயே விசாலினிக்கு ஐ.கியூ. (அறிவுகூர்மை) வழக்கத் தைவிட அதிகமாக 225 புள்ளி அளவில் இருந்தது. பள்ளியில் இரட்டை புரமோஷன் என்னும் வகையில் இரண்டு வகுப்புகளை ஒரே ஆண்டில் கடந்து தேர்வானார். ஏழாம் வகுப்பு பயிலும்போதே கம்ப்யூட்டர் துறையில் டிகிரி முடித்தவர்கள் ஆன்லைனில் எழுதக்கூடிய தேர்வுகளை எழுதி தேர்வாகியுள்ளார். சர்வதேச கருத்தரங்குகளிலும் பேசியுள்ளார். டெல்லியில் நடந்த கூகுள் கல்வியாளர் உச்சி மாநாட்டில் சிறப்பு விருந்தினராக விசாலினி பேசியிருக்கிறார். தற்போது பிரதமருடன் அவர் பேசுவது மகிழ்ச்சி அளிக்கிறது. இவ்வாறு அவர் கூறினார்.

இதனிடையே பிரதமருடன் மாணவி விசாலினி காணொலி காட்சி மூலம் பேசுவது தொடர்பான ஒத்திகை, திருநெல்வேலி மாவட்ட ஆட்சியர் அலுவலகத்திலுள்ள தேசிய தகவலியல் மையத்தில் மாவட்ட ஆட்சியர் மு.கருணாகரன் முன்னிலையில் நேற்று நடை பெற்றது. இம்மைய அலுவலர்கள் தேவராஜன், ஆறுமுகநயினார், கேந்திரிய வித்யாலயா உதவி ஆணையர் உமா சிவராமன் ஆகியோர் ஏற்பாடுகளை செய்தி ருந்தனர். விஜயநாராயணம் கேந்திரிய வித்யாலயா பள்ளி மாணவ, மாணவிகளும் இதில் பங்கேற்றனர்.

நன்றி தி ஹிந்து

ரமணியன்