அரசு பள்ளி சுவரை இடித்து அதிமுக கூட்டத்துக்கு மேடை அமைக்கும் அமைச்சர்!

தஞ்சாவூர்: தஞ்சாவூரில் அரசு பள்ளி சுவரை இடித்து, அ.தி.மு.க. பொதுக்கூட்டத்துக்கு அக்கட்சியினர் மேடை அமைப்பது சமூக ஆர்வலர்களையும், பெற்றோர்களையும் கொந்தளிக்க வைத்துள்ளது.

அ.தி.மு.க. பொதுச் செயலாளர் ஜெயலலிதா ஆர்.கே.நகர் இடைத்தேர்தலில் பெற்ற மகத்தான வெற்றியை கொண்டாடுவதற்கும், நான்கு ஆண்டு கால ஆட்சியில் தமிழகத்தின் வளர்ச்சிக்கும், மக்களின் வளர்ச்சிக்கும் கொண்டுவரப்பட்ட திட்டங்கள் மற்றும் சாதனைகளை விளக்கவும் மாபெரும் பொதுக்கூட்டம், தஞ்சாவூரில் நாளை (5ஆம் தேதி) நடைபெற இருக்கிறது.

இதை தஞ்சை தெற்கு மாவட்ட செயலாளரும், வீட்டு வசதி நகர்ப்புற வளர்ச்சித் துறை மற்றும் வேளாண்மை துறை அமைச்சருமான வைத்திலிங்கம் ஏற்பாடு செய்து வருகிறார்.

இதற்காக மேடை அமைக்கும் பணி, தஞ்சாவூர் நாஞ்சிகொட்டை சாலையில் உள்ள மறியல் என்னும் இடத்தில், அரசு தொடக்கப் பள்ளியை ஒட்டி நடைபெறுகிறது. இந்நிலையில் மேடை அமைக்க இடையூறாக இருந்த பள்ளி சுவரை இடித்து விட்டு, மேடை அமைப்பதால் சமூக ஆர்வலர்களை கொதிக்க வைத்துள்ளது.

இது குறித்து சிலரிடம் பேசினோம்.

''நால்வர் அணியில் முக்கிய இடத்தில் இருப்பவர் அமைச்சர் வைத்திலிங்கம். அவர் ஏற்பாடு செய்யும் பொதுக் கூட்டதுக்கு உரையாற்ற தலைமை கழக பேச்சாளர் நிர்மலா பெரியசாமி வருகிறார். திரைப்பட நடிகை குடந்தை சர்மிலியின் நடன நிகழ்சியும் நடைபெறுகிறது. இந்த பொதுக்கூட்டத்தை மிக பிரம்மாண்டமாக நடத்த ஏற்பாடு செய்து வருகின்றனர். அதில் எல்லாம் எங்களுக்கு வருத்தம் இல்லை.

மேடை அமைக்கும் இடம் சாலையோரம் என்பதால் இடவசதி பத்தாது. அதனால் நடன நிகழ்ச்சி நடத்துபவர்கள் உடை எல்லாம் மாற்ற முடியாது என்பதற்காக, பள்ளி சுவரை இடித்து மேடை அமைத்து வருகின்றனர். அரசு விழாவுக்காகக் கூட பள்ளி வளாகத்தை இடிக்க அரசுக்கு அதிகாரம் கிடையாது. ஆனால், தங்கள் கட்சி பொதுக்கூட்டத்திற்காக எப்படி இவர்கள் பள்ளி சுவரை இடிக்கலாம்? ஆளும் கட்சியினர் என்பதால் யாரும் எதிர்த்து கேட்க முடியாமல், மனவேதனையில் இருக்கின்றனர்.

அதுமட்டுமல்லாமல், சில தினங்களுக்கு முன் நடந்த, பழைய கலெக்டர் அலுவலகம் அருங்காட்சியமாக மாற்றபட்ட விழாவுக்கு, கல்லூரி மாணவிகளை அழைத்து வந்திருந்தனர் அமைச்சர் தரப்பினர். ஆனால், இரவு எட்டு மணி வரைக்கும் அமைச்சர் வைத்திலிங்கம் வரவில்லை. இதனால் மாணவிகள் கடும் இன்னல்களுக்கு ஆளாகினர். இதுபோல் தொடர்ந்து மாணவர்களுக்கு தொல்லை தரும் வைத்திலிங்கம், தன் போக்கை மாற்றிக் கொள்ள வேண்டும்'' என பொங்கி தீர்த்தனர்.

ஆனால் அ.தி.மு.க.வினர் இதை எதையும் காதில் வாங்காமல், பள்ளி வேலை நாளான இன்று காலையிலேயே மேடை அமைக்கும் பணிகளை ஆரம்பித்து செய்து வருகின்றனர். அவர்களுக்கு கூட்டம் சிறப்பாக நடைபெற வேண்டும் என்பதே நோக்கம். அந்த பள்ளியில் படிக்கும் குழந்தைகளின் நிலைதான் பரிதாபத்துக்குரியது என வருத்தப்பட்டனர் பொதுமக்கள்.

விகடன்

நிகழ்ச்சி நடந்து விட்ட பிறகு புதிய சுவர் எழுப்பி கொடுத்து விடுவாருங்க இதை ஓர் புகார சொல்லாதிங்க .அம்மா அரசு...