கவிஞர்களாக மாறிய தமிழக அமைச்சர்கள்!

தங்க நிகர் முகப் பொலிவும்
சிங்கநிகர் அகத் துணிவும் கொண்டு -
வங்கக் கரை கோட்டை தன்னில்
வானுயர்ந்த புகழ் படைத்து -
என்னாளும் தமிழகத்தை
நன்றாளும் தெய்வமே எங்கள் அம்மா!

இந்தியாவில்
எந்தத் தலைவரும்
சந்திக்காத
சத்திய சோதனைகளை
புத்திக் கூர்மையால்
புறம் போகச் செய்த
புரட்சிப் பூவே எங்கள் அம்மா!

ஒரு ரோஜாப் பூவைச் சுற்றி
எத்தனை, எத்தனை முட்கள்!
எங்கள் இதய பீடத்தில்
என்றும் சிம்மாசனம் இட்டு அமர்ந்திருக்கும்
ஒற்றை நெஞ்சத்தை எதிர்க்க
எத்தனை, எத்தனை கூட்டணிப் படைகள்!
அத்தனைக் கூட்டத்தையும்
ஆட்டம் காண வைத்த
அற்புதத் தலைவி அல்லவா எங்கள் அம்மா!

உலகே உற்றுப் பார்த்த
ஒரு பொய் வழக்கை -
தனியாய்
துணிவாய்
தூக்கி எறிந்த அன்னையே!
துணிவுக் கடலே எங்கள் அம்மா!

ஒரு கோடி சிங்கங்களின் வீரம்
ஒருங்கே குடியிருக்கும்
உறுதி படைத்த நெஞ்சமே !
பகைமைப் பாறைகளைப்
பிளந்து -
பச்சை இலைகளாய்...
அதுவும்
இரட்டை இலைகளாய்
வெளிவர செய்த
வீர விருட்சமே எங்கள் அம்மா !

குடும்பக் கூடாரத்திற்காக
கூட்டுக் கொள்ளையடிப்பவர் -
அரசியல் பாதை தெளிவின்றி
போதையில் புலம்புபவன் -
மகனுக்காக மக்களை ஏமாற்றிவரும்
பூச்சி பிடித்த மாம்பழம் -
என்ன செய்வது,
ஏது செய்வது என்று
எதுவும் புரியாமல்
அர்த்த ராத்திரியில் குடை பிடிக்கும் அற்பர் -
கறையே கையாகிப்போன
உயிரில்லாக் கட்சியின் உளறுவாய்ப் பித்தன் -
இவர்களா உங்கள் எதிரிகள் அம்மா?
உங்கள் எதிரிகளாய் இருக்கக்கூட
தகுதியே இல்லாத
அவர்கள் அனைவரும்
உதிரிகள் அம்மா! உதிரிகள்!

அன்புப் பாசறையே அம்மா!
தங்களை புரட்சித் தலைவி என
புகழோங்க அழைப்பதனால்
புரட்சி என்ற சொல்லுக்கே
புது ரத்தம் பாய்கிறது அம்மா!

அம்மா !
என்னைப் பெற்ற
அன்னையை எத்தனை முறை
அம்மா என அழைத்தேனோ - அறியேன்... அம்மா!
ஆனால் அதைக் காட்டிலும்
ஆயிரம், ஆயிரம் மடங்குகள்
தங்களை அம்மா, அம்மா, என
அழைத்திருப்பேன் அம்மா!
அதனால் எனது சுவாசக் காற்று வரம் பெற்றது அம்மா!

தங்கள்
திருமுகம் கண்ட பிறகு -
தெய்வத்தைப் பார்க்கும் ஆசைகூட
எனக்கில்லை அம்மா!
தெய்வத்தைப் பார்த்திருந்தால்கூட -
தாங்கள் எனக்களித்த
பெரும் பேற்றை
பெற்றிருக்க முடியாது அம்மா!

மதுரை மேற்குத் தொகுதியில்
இந்தச் சிறியேன்
எம்.எல்.ஏ. ஆவேன் என்று
யாருக்குத் தெரியும் அம்மா!
உங்களால் அன்றி
இது வேறு யாரால் முடியும் அம்மா!

உங்கள் தொண்டனாய் வாழ்ந்த
இந்த - ஒரு பிறவி போதும் அம்மா! போதும்.
ஒரு வேளை
ஏழு பிறவிகள் இருந்தால் கூட
மீதமுள்ள பிறவிகளை
எவரேனும் எடுத்துக் கொள்ளட்டும் அம்மா ! எடுத்துக் கொள்ளட்டும்

என் மூச்சுக் காற்றே அம்மா!
தங்கள் புண்ணியப் பாதங்களை
எனது இதயக் கோவிலாக
எண்ணி வழிபட்டு -
கூட்டுறவுத்துறை சார்ந்த பதிலுரையை தொடங்குகிறேன்.