டாஸ்மாக் வசூல் பணம் 80 லட்சம் அபேஸ்: கொள்ளையர்களின் தந்திரத்தை பாருங்கள்!

**krishnaamma** · **krishnaamma** Wed Aug 26, 2015 1:52 am

சென்னை: சென்னை நீலாங்கரையில் காருடன் டிரைவரை கடத்திச் சென்று, டாஸ்மாக் பணம் ரூ.80 லட்சம் கொள்ளையடிக்கப்பட்டுள்ள சம்பவம் காவல்துறையை அதிர வைத்துள்ளது.

சென்னையை அடுத்த நீலாங்கரை கிழக்கு கடற்கரை சாலையில் உள்ள மதுபான கடைகளில் விற்பனையாகும் பணத்தை வசூலித்து வங்கிகளில் செலுத்தும் பணியில் தனியார் நிறுவனம் ஈடுபட்டுள்ளது.

கிழக்கு கடற்கரை சாலையில் உள்ள கடைகளில் வார விடுமுறை தினங்களான சனி மற்றும் ஞாயிற்றுக்கிழமைகளில் அதிக அளவில் மதுபானங்கள் விற்பனை ஆகும். இந்நிலையில் மேற்கூறிய தனியார் நிறுவன ஊழியர்கள், நேற்று மாலை பணம் வசூலிக்க காரில் சென்றனர். காரை டிரைவர் ஜெயசெல்வம் (44) என்பவர் ஒட்டினார்.

கிழக்கு கடற்கரை சாலையில் உள்ள சுமார் 25க்கும் அதிகமான கடைகளில் வசூலான ரூ.80 லட்சம் பணத்துடன் நீலாங்கரை பகுதிக்கு வந்தனர். அங்குள்ள மதுபான கடையில் வசூலான பணத்தை பெறுவதற்காக, தனியார் நிறுவன ஊழியர்கள் 3 பேர் காரில் இருந்து இறங்கிச் சென்றனர்.

டிரைவர் ஜெயசெல்வம் ரூ.80 லட்சம் பணப்பையுடன் காரில் அமர்ந்து இருந்தார். அப்போது, திடீரென்று 4 வாலிபர்கள் காரில் ஏறி அமர்ந்தனர். அவர்கள், கத்தி முனையில் டிரைவர் ஜெயசெல்வத்தை மிரட்டி காரை ஓட்டச் சொன்னார்கள். இதனால் பயந்து போன ஜெயசெல்வம், அவர்கள் சொன்னபடி காரை ஓட்டினார்.

கார் ஈஞ்சம்பாக்கம் பக்தி வேதந்தாசாமி சாலைக்கு சென்றதும், அந்த 4 பேரும் டிரைவர் ஜெயசெல்வத்தை கீழே இறங்கச் சொல்லி சரமாரியாக அடித்து உதைத்தனர். இதனால் அவர் காரில் இருந்து கீழே விழுந்தார். பின்னர் 4 பேரும் ரூ.80 லட்சம் பணப்பையுடன் சிறிது தூரம் ஓடிச் சென்று, அங்கு நின்று கொண்டிருந்த மற்றொரு காரில் ஏறி தப்பிச் சென்று விட்டனர்.

அதன்பிறகு ஜெயசெல்வம் அங்கிருந்து காரை ஓட்டி வந்து மற்றவர்களிடம், நடந்த விவரங்களை கூறினார். இதுபற்றி நீலாங்கரை காவல்துறையில் புகார் அளிக்கப்பட்டது. அதன்பேரில் போலீசார் வழக்கு பதிவு செய்து தீவிரமாக விசாரணை நடத்தி வருகின்றனர்.

வார விடுமுறையில் பணம் அதிகமாக இருக்கும் என்பதை அறிந்த மர்ம கும்பல், பணத்தை கொள்ளையடித்துச் சென்று உள்ளது. இது பணம் பறிக்கும் கும்பல் தானா? இல்லை தனியார் நிறுவனத்தில் பணியாற்றுபவர்கள் தந்த தகவலின் பேரில் இந்த கொள்ளை நடந்து உள்ளதா? என்று பல்வேறு கோணங்களில் காவல்துறையினர் விசாரணை நடத்தி வருகின்றனர்.

விகடன்

**சிவா** · **சிவா** Wed Aug 26, 2015 1:57 am

இதுபோல் அனைத்து டாஸ்மாக் பணத்தையும் கொள்ளையடித்துச் செல்லட்டும்! டாஸ்மாக் வசூல் பணம் 80 லட்சம் அபேஸ்: கொள்ளையர்களின் தந்திரத்தை பாருங்கள்! 3838410834