சென்று வருகிறேன் உறவுகளே ! மீண்டும் சந்திப்போம் !

**M.Jagadeesan** · **M.Jagadeesan** Fri 17 Jul 2015 - 12:20

சென்று வருகிறேன் உறவுகளே ! -திரவியம்
வென்று வருகிறேன் வெளிநாடு சென்று !
நின்று பேசிடவும் எனக்கு நேரமில்லை - இங்கே
குன்றுபோல் வேலைகள் குவிந்துக் கிடக்கின்றன !

கடமைகள் எனக்குக் காத்துக் கிடக்கின்றன !
உடனிருந்து தோள்கொடுத்து உதவிகள் செய்திடவே
உடன்பிறந்த தம்பிகள் யாரும் எனக்கில்லை !
உடமைகள் எனச்சொல்ல தங்கையும் பெற்றோரும் !

தங்கையின் திருமணத்தை முடித்தல் வேண்டும் !
திங்கள் முகத்தாளின் திருமணத்தை நடத்திடவே
தங்கம் குறையாமல் ஐம்பது பவுன்வேண்டும் !
பங்கமிலா ரொக்கமாய் ஐந்துலட்சம் தரவேண்டும் .

அப்பாவின் இதயத்தில் இருக்கின்ற அடைப்பிற்குத்
தப்பாமல் அறுவை சிகிச்சைத் தரவேண்டும் .
தப்பேதும் இல்லாமல் சிகிச்சை நடந்திடவே
இப்போதே தரவேண்டும் இரண்டு லட்சமென்றார் .

இந்த அளவு பொருளீட்ட இந்தியாவில் இடமில்லை !
சொந்தமண்ணை விட்டு வெளிநாடு செல்வதற்கு
பந்தபாசம் விடவில்லை ! ஆனாலும் என்செய்ய !
முந்திநான் தலைமகனாய் பிறந்துஎன் தலைவிதியே !

**T.N.Balasubramanian** · **T.N.Balasubramanian** Fri 17 Jul 2015 - 13:18

பந்தபாசத்துடன் நடமாடும் நடுத்தர குடிமகனின்
மனநிலையை எடுத்துக்காட்டும்
கண்ணாடிக் கவிதை .
அருமை

ரமணியன்

**M.Jagadeesan** · **M.Jagadeesan** Fri 21 Aug 2015 - 13:31

நன்றி இரமணியன் .

**krishnaamma** · **krishnaamma** Sat 22 Aug 2015 - 3:24

//இந்த அளவு பொருளீட்ட இந்தியாவில் இடமில்லை !
சொந்தமண்ணை விட்டு வெளிநாடு செல்வதற்கு
பந்தபாசம் விடவில்லை ! ஆனாலும் என்செய்ய !
முந்திநான் தலைமகனாய் பிறந்துஎன் தலைவிதியே !//

வருத்தமான நிஜம் ஐயா !.............உண்மையை துகில் உரித்து காட்டி இருக்கீங்க புன்னகை