அபுதாபியில் மோடிக்கு சிவப்பு கம்பள வரவேற்பு!

அபுதாபி:பிரதமர் மோடிக்கு, அபுதாபியில் சிவப்பு கம்பள வரவேற்பு அளிக்கப்பட்டது.

மோடி, ஐக்கிய அரபு எமிரேட்ஸ் நாடுகளில், இரண்டு நாள் அரசு முறை பயணம் மேற்கொள்வதற்காக, நேற்று பிற்பகல், 1:30 மணிக்கு, டில்லியில் இருந்து விமானத்தில் புறப்பட்டார். மாலை 4:30 மணிக்கு, அபுதாபி விமான நிலையம் வந்தடைந்தார்.அவரை, மரபுகளை மீறி, அபுதாபி பட்டத்து இளவரசரும், ஐக்கிய அரபு எமிரேட்சின் துணை சுப்ரீம் கமாண்டருமான, ஷேக் முகமது பின் சயீத் அல் நஹ்யான், தன் ஐந்து சகோதரர்களுடன், விமான நிலையத்திற்கே வந்து வரவேற்றார்.

வழக்கமாக, வெளியுறவுத் துறை அமைச்சர் தான், பிரதமரை வரவேற்பது வழக்கம். விமான நிலைய வரவேற்பை தொடர்ந்து, 'எமிரேட்ஸ்' ஓட்டலில், சிறிது நேரம் ஓய்வெடுத்த மோடியை, பிரபல தொழிலதிபர் பி.ஆர்.ஷெட்டி சந்தித்து பேசினார். அவரை, இந்தியாவில் முதலீடு செய்யுமாறு, மோடி கேட்டுக் கொண்டார்.



இதையடுத்து, மெக்கா, மதினாவை அடுத்து, உலகிலேயே மூன்றாவது மிகப்பெரிய மசூதியான, ஷேக் சையது கிராண்டு மசூதிக்கு, மோடி சென்றார். அதன்பின், முஸ்தபா நகரில், இந்திய துணைக் கண்டத்தை சேர்ந்த, ஆயிரக்கணக்கான தொழிலாளர்கள் குடியிருக்கும், ஐ.சி.ஏ.டி., முகாமிற்கு சென்று உரையாடினார்.

மோடி இன்று, பட்டத்து இளவரசர் ஷேக் முகமது பின் சயீத் அல் நஹ்யானை சந்தித்து பேசுகிறார். அப்போது, இந்தியா - ஐக்கிய அரபு எமிரேட்ஸ் இடையே, எரிசக்தி, பாதுகாப்பு உள்ளிட்ட துறைகளில், முக்கிய ஒப்பந்தங்கள் கையெழுத்தாக உள்ளன.

இதை தொடர்ந்து, மோடி துபாய் செல்கிறார். அங்கு, ஐக்கிய அரபு எமிரேட்ஸ் பிரதமர் ஷேக் முகமது பின் ரஷீத் மக்டோமை சந்தித்து பேசுகிறார்.அதன்பின், இந்திய - ஐக்கிய அரபு நாடுகளின் தொழிலதிபர்கள் கூட்டத்தில், மோடி உரையாற்றுகிறார். அப்போது, அவர் தொழிலதிபர்களை, இந்தியாவில் முதலீடு செய்யுமாறு கேட்டுக் கொள்வார். இதையடுத்து, துபாய் கிரிக்கெட் மைதானத்தில் நடக்கும், 'இந்தியர்களுடனான சந்திப்பு' நிகழ்ச்சியில், அவர் பங்கேற்கிறார்.

மோடியின் உரையை கேட்க, 51 ஆயிரம் பேர் முன்பதிவு செய்துள்ளனர். எனினும், மேலும் ஏராளமானோர் இந்த கூட்டத்திற்கு வருவர் என்று எதிர்பார்க்கப்படுவதால், மைதானத்திற்கு வெளியே, ராட்சத திரைகள் மூலம், நிகழ்ச்சியை ஒளிபரப்ப வசதி செய்யப்பட்டு உள்ளது; பலத்த பாதுகாப்பு ஏற்பாடும் செய்யப்பட்டு உள்ளது.

பாராட்டு:

விமான நிலையத்தில், தனக்கு அளிக்கப்பட்ட சிறப்பான வரவேற்பு குறித்து, மோடி, 'டுவிட்டர்'ல் கூறியிருப்பதாவது: பட்டத்து இளவரசர், விமான நிலையத்தில் எனக்கு அளித்த வரவேற்பிற்கு, இதயங்கனிந்த பாராட்டுகளை தெரிவித்துக் கொள்கிறேன். என் வருகை, இந்தியா - ஐக்கிய அரபு எமிரேட்ஸ் உடனான நல்லுறவை, மேலும் வலுவாக்கும் என்று நம்புகிறேன்.

தினமலர்