எனது கவிதைகள் !

**M.Jagadeesan** · **M.Jagadeesan** Sat 16 May 2015 - 22:08

மெரீனா
=======
அதுவொரு அழகிய நிலாக் காலம்
கடற்கரை பூண்டது விழாக் கோலம்
சித்திரை மாதக் கத்திரி வெய்யிலில்
நித்திரை துறந்த இத்தரை மக்கள்

காற்று வாங்க கடற்கரை மணலில்
களிப்புடன் அமர்ந்து கடலை நோக்க
அழகிய நிலவு மெல்ல எழுந்து
அடிவா னத்தில் ஒளிக்கரம் நீட்ட
பழகிய நட்பில் பரவைக் காதலி
அலைக்கரம் கொண்டு அக்கரம் பற்றும்.

நிலவும் கடலும் நடத்தும் காதலை
உலவும் தென்றலும் உடுக்களின் தொகுதியும்
பறவைக் கூட்டமும் பலபட நின்று
மறைவாய் நோக்கி மகிழ்ச்சியைக் காட்டும்.

நடுக்கடல் தன்னில் நாவாய்க் கூட்டம்
அடுக்கிய அலையின் அன்புக் கரத்தால்
ஆட்டும் அசைவில் தன்னை மறந்து
அழகிய குழந்தை போலத் தூங்கும்.

அலைகடல் தன்னில் பரதவர் கூட்டம்
வலையினை வீசி மீன்களைப் பிடிக்க
கடற்கரை மணலில் கன்னியர் கூட்டம்
கண்வலை வீச காளையர் சிக்குவர்.

மைவிழி மாதர் மையலில் சிக்கிக்
கைப்பொருள் இழந்த காளையர் ஒருபால்
கூடிய எடையைக் குறைக்க வேண்டி
ஓடும் முதியோர் கூட்டம் ஒருபால்
குதிரை முதுகில் ஏறி அமர்ந்து
அதிர ஓட்டும் ஆடவர் ஒருபால்
கடற்கரை மணலில் சிறுகுழி தோண்டிக்
குடிநீர் விற்கும் கூட்டம் ஒருபால்
வடையும் பஜ்ஜியும் வஞ்சிர மீனும்
கடைகளில் வாங்கும் கூட்டம் ஒருபால்
கைவினைக் கலைஞர் உழைப்பினில் எழுந்த
கடல்படுப் பொருட்களின் காட்சிகள் ஒருபால்
இத்தகுக் காட்சிகள் மொத்தமும் கொண்ட
மெத்தகுக் கடற்கரை மெரீனா என்னும்
உலகின் அழகிய இரண்டாம் கடற்கரை.

**Dr.சுந்தரராஜ் தயாளன்** · 03/09/2011

நன்று

**M.Jagadeesan** · **M.Jagadeesan** Sun 17 May 2015 - 7:43

தங்களின் பின்னூட்டத்திற்கு நன்றி தயாளன் !

**M.Jagadeesan** · **M.Jagadeesan** Sun 17 May 2015 - 7:49

உறவுகள்
======
நீ
சிகரங்களைத் தொட்டபோது மகிழாத உறவுகள்
பள்ளத்தில் விழுந்தபோது பரிகாசம் செய்தன

வாளேந்தும் பகைவனைக் காட்டிலும்
தாள்பணியும் உறவுக்காரன் ஆபத்தானவன் .

நீ
கைதூக்கி விட்ட உறவுகளே உன்னுடைய
காலை வாருவதற்குக் காத்துக் கிடக்கின்றன !

உறவுகளால் என்றும் உபத்திரவம்தான்
என்செய்வது !
சில சமயங்களில் நம்முடைய
கைவிரல்களே கண்ணைக் குத்துகின்றன
அதற்காக
விரல்களை வெட்டுவது விவேகம் ஆகுமா ?

உறவுகளைத் திருத்துவோம்
உறவுகளை அரவணைப்போம்
உறவுகளோடு வாழ்வோம் !

**krishnaamma** · **krishnaamma** Sun 17 May 2015 - 11:32

நல்லா இருக்கு புன்னகை

**ayyasamy ram** · **ayyasamy ram** Sun 17 May 2015 - 11:58

**M.Jagadeesan** · **M.Jagadeesan** Sun 17 May 2015 - 12:09

கிருஷ்ணம்மா மற்றும் அய்யாசாமி ராம் ஆகியோரின் பாராட்டுக்கு நன்றி !

**M.Jagadeesan** · **M.Jagadeesan** Tue 19 May 2015 - 15:55

முதுமையே போ !
==============
எதுகை மோனை இல்லாக் கவிதைபோல்
முதுமை ஒரு விகாரமே!- அந்த
முதுமை வருவதற்குள் எனக்கு
முற்றுப்புள்ளி வைத்துவிடு இறைவா !

தந்தத்தினால் செய்த கைத்தடி என்றாலும்
சொந்தக் காலிலே நிற்பது போலாகுமா?
அந்த நிலையை அடையும் முன்பாக
ஆண்டவனே என்னை அழைத்துக் கொள்வாயே!

பல்லிழந்து சொல்லிழந்து
பார்வையில் திரை விழுந்து
கன்னத்தில் குழிவிழுந்து
காதோரம் நரை விழுந்து
கடலின் அலைபோலே
உடலெங்கும் சுருக்கங்கள்
எண்ணத்தில் தடுமாற்றம்
எழுத்திலே தடுமாற்றம்
மாத்திரையே உணவாக
மருந்தே நீராக
நோய்களின் புகலிடமாய்
பாயே இருப்பிடமாய்
கண்ணிருந்தும் குருடராய்
காதிருந்தும் செவிடராய்
வாழுகின்ற முதுமையை
வரவேற்க விரும்பவில்லை !

முதுமையால் சிறப்பு உற்றோர்
மேதினியில் சிலருண்டு
அன்னை தமிழுக்கு
அணிசெய்த காரணத்தால்
ஒளவைக்கிழவி அவள்
சாகா வரம் பெற்றாள்.
அமிழ்தினிய தமிழ்நூலைப்
பதிப்பித்த காரணத்தால்
தமிழ்த்தாத்தா உ.வே.சா.
தரணியிலே புகழ்பெற்றார்.
காந்தித் தாத்தா தன்
பொக்கைவாய் சிரிப்பினிலே
ஏந்திய அழகெல்லாம்
யார்பெர்றார் இவ்வுலகில் ?

ஆண்டுசில வாழ்ந்தாலும்
மார்க்கண் டேயனைப்போல்
குன்றா இளமையோடும்
குறைவில்லா நலத்தோடும்
என்றும் பதினாறாய்
இருந்திடவே விரும்புகிறேன்.

**krishnaamma** · **krishnaamma** Tue 19 May 2015 - 21:16

//ஆண்டுசில வாழ்ந்தாலும்
மார்க்கண் டேயனைப்போல்
குன்றா இளமையோடும்
குறைவில்லா நலத்தோடும்
என்றும் பதினாறாய்
இருந்திடவே விரும்புகிறேன்.//

புன்னகை

எல்லோருக்கும் இந்த ஆசை இருக்கும்.ஆனால் எத்தனை பேருக்கு கிடைக்கும் ? புன்னகை

...............நல்ல கவிதை ! எனது கவிதைகள் ! 3838410834

**M.Jagadeesan** · **M.Jagadeesan** Tue 19 May 2015 - 21:52

நன்றி கிருஷ்ணம்மா !

Sponsored content · Sponsored content

எனது கவிதைகள் !

எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

Re: எனது கவிதைகள் !

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக