150 கிலோ நாணயம் கொடுத்து வைர மோதிரம் வாங்கிய சீனர்

150 கிலோ நாணயம் கொடுத்து வைர மோதிரம் வாங்கிய சீனர்!

பீஜிங்: சிறுக சிறுக, 150 கிலோ எடைக்கு பணம் சேர்த்த சீனர், அதில் வைர மோதிரம் வாங்கியுள்ளார்.சீனாவைச் சேர்ந்தவர் லியாங், 30. 20 ஆண்டுகளுக்கு முன், தன் பள்ளி தோழியிடம், அவரை திருமணம் செய்து கொள்ள விரும்புவதாகவும், திருமணத்தின்போது, வைர மோதிரம் அணிவிப்பதாகவும் உறுதி அளித்தார். காலப்போக்கில், இருவரும், கல்விக்காக வெவ்வேறு இடங்களுக்கு சென்றுவிட்டனர். எனினும், வாக்குறுதியை லியாங் மறக்கவில்லை.

உறுதியளித்த நாள் முதல், 20 ஆண்டுகளாக, சிறுக சிறுக, தனக்கு கிடைத்த பணத்தை, நாணயங்களாக சேர்த்து வந்தார். 20 ஆண்டுகளுக்கு பின், 150 கிலோ நாணயங்கள் சேர்ந்து விட்டன. அந்த நாணயங்களை எண்ணியபோது, 1.23 லட்சம் ரூபாய் இருந்தது. சிறு சிறு உருளைகளாக அவற்றை கட்டி, ரிக் ஷாவில் வைத்து நகை கடைக்கு சென்றார்.

அங்கு, ஒரு வைர மோதிரத்தை வாங்கிய லியாங், தான் கொண்டு வந்த நாணய மூட்டையை கொடுத்தார். நாணயங்களை நோட்டுகளாக மாற்றித் தரலாமே என்று கடைக்காரர் கூற, தன் காதல் கதையை லியாங் கூறினார்.

இதனால், நெகிழ்ச்சியடைந்த கடைக்காரர், நாணயங்களை வாங்கிக்கொண்டு, வைர மோதிரத்தை அளித்தார். கடை ஊழியர்கள், ஐந்து மணி நேரம், அந்த நாணயங்களை எண்ணி முடித்தனர். வைர மோதிரத்தை, தன் காதலி முன் நீட்டிய லியாங், திருமணத்திற்கு சம்மதம் கேட்டார். சிறு வயது காதலை இன்னமும் மறக்காமல் இருந்த லியாங்கை திருமணம் செய்ய, அந்தப் பெண்ணும் சம்மதம் தெரிவித்தார்; விரைவில் அவர்கள் திருமணம் நடக்க உள்ளது.

தினமலர்

நெகிழ்ச்சியான செய்தி