பேசா மனிதம்...!! -Mano Red

Mano Red · Mano Red Sun Aug 02, 2015 8:52 am

அதென்ன அவசரமோ...?
எல்லோரும் போலவே
முண்டியடித்து முன்னால் நின்று
பாட்டிலை வாங்கி
பிசகாமல் திருகி
முட்டக் குடித்து பின் நகர்ந்தான்..!!

மதுவாசம் சும்மா இல்லை
ஆவியில் புகுந்து
வெய்யில் காற்றில்
வேர்வையில் கலந்து
மிச்சமிருந்த உயிருடன் சேர்த்து
வெளியான போது
காற்றும் கிறங்கியிருக்கும்..!!

ஒற்றை ஆள்
தனியாக வரும் போதே
தள்ளி ஓடும் இந்த மனிதம்,
தள்ளாடி வரும் அவனை
தன்பக்கம் இழுக்கவா போகிறது..??
வழிவிடுகிறேன் என்று
வழிதவறியது மனிதாபிமானம்...!!

மிச்ச சொச்சமிருந்த மானமும்
ஆடையுடன் சேர்ந்து அவிழ
அனைவருக்குமே அவன்
முகம் சுழிக்கும் அசிங்கமானான்..!!
ஆனால்
அங்கிருந்த அனைவரும்
மானமுள்ளவர்களா தெரியாது..?!

ரோட்டில் படுத்தது முதல்
அம்சமாய் வாந்தி எடுத்து
நாசம் செய்தது வரை
அவனுக்கு நினைவில்லை
ஆனாலும் ஊருக்கு நினைவிருக்கும்,.!
தவழ்ந்து தவழ்ந்து
வீடு வந்து சேர்ந்தாலும்
சோகமும்,புலம்பலும்,வலியும்
குறைந்தபாடில்லை...!!

கொஞ்சம் பேசாம
வாய மூடிட்டு இருந்தா என்ன..?
விழப்போற எழவா
கொறஞ்சிடப் போகுது..!!
திட்டிக்கொண்டே போனார்
அவன் அப்பா..!!

அவருக்கு தெரியும்
பிணவறையில் தினம்
பிணங்களுடன்
பிழைப்பு நடத்தும் அவனுக்கு
எழவுக்கு மட்டும் குறையே
இருந்ததில்லை என்று..!!

**ayyasamy ram** · **ayyasamy ram** Sun Aug 02, 2015 11:09 am

Mano Red · Mano Red Sun Aug 02, 2015 1:47 pm

நன்றி

shobana sahas · shobana sahas Mon Aug 03, 2015 5:16 am

நல்ல கருத்துள்ள கவிதை மனோ ரெட் . சூப்பர் ... வாழ்த்துக்கள் .

**krishnaamma** · **krishnaamma** Mon Aug 03, 2015 10:24 am

//அவருக்கு தெரியும்
பிணவறையில் தினம்
பிணங்களுடன்
பிழைப்பு நடத்தும் அவனுக்கு
எழவுக்கு மட்டும் குறையே
இருந்ததில்லை என்று..!!//

பாவம் அவரும் அவனும்...................சூப்பர் மனோ புன்னகை