பார்வைகள்!

**ayyasamy ram** · **ayyasamy ram** Fri Jul 24, 2015 2:45 am

-
நானும் என் எட்டு வயது மகனும் சலூன் கடைக்குச்
சென்றோம்.இன்னொரு தலையில் பிஸியாக இருந்த
கடைக்காரர், ‘‘வாங்க சார்… ஒரு பத்து நிமிஷம்
உக்காருங்க, இதோ முடிஞ்சிரும்!’’ என்றார்.
–
டீப்பாய் மீது கிடந்த அன்றைய தினசரியை நான்
எடுத்தேன். என் பையன் ‘‘ஹைய்யா…’’ என்ற
குதூகலத்துடன் அங்கேயிருந்த காமிக்ஸ் புத்தகத்தை
எடுத்துப் புரட்ட ஆரம்பித்தான்.
–
பேப்பர் படிப்பதில் என் கவனம் பதியவில்லை. காரணம்,
அந்த சலூன் சுவரெங்கும் பெரிய பெரிய சைஸில் சில
அரை நிர்வாணப் பெண்கள் படங்கள்.
–
இடம் கிடைத்து முடி வெட்டிக்கொள்ள அமர்ந்தோம்.
கடைக்காரர் என்னருகே வந்ததும், சற்று குரல் தாழ்த்தி,
‘‘என்னங்க! சின்னப் பசங்கல்லாம் வர்ற இடம்…
இப்படிப் படங்களை மாட்டி வச்சிருக்கீங்களே…
அவங்க பார்த்தா…’’ என்று இழுத்தேன்.
–
‘‘இல்லை சார்… அவங்கவங்க வயசுக்கேத்த மாதிரிதான்
பார்வை இருக்கும். வந்ததும் நீங்க பேப்பரை எடுத்தீங்க.
உங்க பையன் காமிக்ஸ் புக்கை எடுத்தான். பார்த்தீங்களா?’’
என்றார்.
–
கடையிலிருந்து வெளியில் வரும்போது, ‘‘அப்பா… அந்தக்
கடையில இருக்கிற மீன் தொட்டி மாதிரி நம்ம வீட்டுக்கும்
ஒண்ணு வாங்கலாம்பா!’’ என கண்கள் விரியக் கேட்டான்
மகன்.

கடைக்காரர் சொன்னது சரிதான். நான் அங்கேயிருந்த
மீன் தொட்டியைப் பார்க்கவே இல்லை!
–
———————————————————-

மீனா சுந்தர்
நன்றி- குங்குமம்