பாட்டி

யாமறிந்த உறவுகளில் பாட்டியின் உறவைப்போல்
பூமிதனில் யாங்கணுமே கண்டதில்லை-இது உண்மை!
எங்கள் பாட்டிக்கு எழுபது வயதிருக்கும்
தங்கநிற மேனியில் தகதகத்து ஜொலித்திடுவாள்
அங்கமெல்லாம் சுருக்கம் ஆனாலும் தளர்வில்லை
கொங்குதமிழ் பேசுவாள்;கொதப்புவாள் வெற்றிலையை
வெண்ணிற சேலையுடன் இரவிக்கை இருஜோடி
கண்ணிலே அணிவதற்கு மூக்குக் கண்ணாடி
இடுப்பிலே சுருக்குப்பை அதில்கொஞ்சம் சில்லரை
படுப்பதற்குக் கந்தல்பாய்; இடிப்பதற்குக் கல்லுரல்
நடப்பதற்குக் கைத்தடி; காதிலே செவிட்டுமெஷின்
அடங்கியது இவ்வளவே பாட்டியின் சொத்தெல்லாம்.

நீட்டியகால் நீட்டியபடி சுவற்றோரம் அமர்ந்திருப்பாள்
வீட்டிலுள்ள அனைவருக்கும் விடுகதைகள் வைத்திடுவாள்
கைநாட்டு என்றாலும் காவியங்கள் அத்துபடி
வீரர்தம் வரலாற்றை விரல்நுனியில் வைத்திருப்பாள்
அம்புலிமாமா கதை சொல்லி மகிழ்ந்திடுவாள்
வெம்புலியை தமிழச்சி விரட்டிய கதைசொல்வாள்
திங்களில் ஒருபாட்டி தினமும் வடைசுட்டு
அங்கிருக்கும் மக்களுக்கு விற்கின்ற கதைசொல்வாள்
நான்கெருது கதைசொல்லி ஒற்றுமையை வலியுறுத்தி
முயலாமை கதைசொல்லி முயற்சிக்கு வித்திடுவாள்.
நாட்டுப்புறக் கதையெல்லாம் நயத்தகு இசையினிலே
நீட்டி முழக்கியே பாட்டினிலே வைத்திடுவாள்

வாட்டி வதைக்கின்ற காய்ச்சல் இருமலுக்கு
பாட்டி வைத்தியம் கைகண்ட தீர்வாகும்
மூட்டு வலியென்றால் முடக்கத்தான் கீரையை
துவையல் அரைத்தே துயரம் போக்கிடுவாள்
நாவல் கொட்டையை இடித்துத் தூளாக்கி
பாகற் காயுடனே தினமும் உண்டுவர
போகும் சர்க்கரை பொருட் செலவின்றியே!
ஆங்கில வைத்தியத்தில் ஆயிரம் செலவிடுவார்
ஆனாலும் குணமில்லை; பக்க விளைவுண்டு
பாட்டி வைத்தியமோ ! பழங்கால வைத்தியமாம்
தோட்டி முதலாகத் தொண்டைமான் ஈறாக
நாட்டிலுள்ள அனைவருக்கும் நலம்பயக்கும் வைத்தியமாம் .

அன்பு காட்டுவதில் அவளோர் அன்னை
அறிவு புகட்டுவதில் அவளோர் ஆசான்
கருணை உள்ளமோ கடலினும் பெரிது
தெருவிலே வீட்டின்முன் யாசகன் கூட
" அம்மா! தாயே!!" எனப்பிச்சைக் கேட்காமல்
" பாட்டி! பெரியம்மா!" என்றே கேட்டிடுவான்!
பஞ்சுமிட்டாய் விற்பவன் தெருவிலே சென்றாலே
கெஞ்சுகின்ற பேரனுக்கு வாங்கியே தந்திடுவாள்!
வீட்டிலுள்ள பூனைநாய் முதலான ஜந்துக்கள்
பாட்டி கொடுத்தால்தான் பசியாற உண்டிடுமே !

எங்கள் குலதெய்வம் தங்கம்மா பாட்டியை
காலன் ஒருநாள் கைதட்டி அழைத்தானே !
வயிற்றுப் போக்கின் வடிவிலே வந்தானே !
வைத்தியருக்குச் சொல்ல அவரும் வந்தாரே
நாடியைப் பிடித்தவர் ; உதட்டைப் பிதுக்கிடவே
எல்லாம் முடிந்தது ; தெய்வமும் சென்றதுவே !

இன்று பாட்டியின் நினைவு தினம்.

பாட்டி மறைந்து ஆண்டுகள் சென்றாலும்
பாட்டியின் நினைவு என்றுமே நிலைத்திருக்கும்
வெள்ளைச் சேலையில், வெள்ளை ரவிக்கையில்
கள்ளமற்ற சிரிப்பில் காண்கின்ற எல்லோரும்
எங்கள் பாட்டியாய் எனக்குத் தோன்றிடுமே !

பாட்டி பாட்டு நன்றாக உள்ளது .

ரமணியன்

ரமணியன் அவர்களின் பாராட்டுக்கு நன்றி .

பாட்டி போற்றி! பாட்டி போற்றி!
போற்றி போற்றி