போலீசார் உடலில் கேமரா: குற்றம், லஞ்சத்தை தடுக்க பிரத்யேக திட்டம்

கோவை: குற்றம் மற்றும் லஞ்சத்தை தடுக்கும் வகையில், போக்குவரத்து பணிகளில் ஈடுபடும் போலீசாரின் உடலில், கட்டுப்பாட்டு அறையுடன் இணைக்கப்பட்ட பிரத்யேக 'கேமரா' பொருத்தி கண்காணிக்க திட்டமிடப்பட்டுள்ளது.

தமிழகம் முழுவதும் கடந்த, ௧ம் தேதி முதல் இருசக்கர வாகன ஓட்டிகள் ஹெல்மெட் அணிவது கட்டாயமாக்கப்பட்டது. இருசக்கர வாகனத்தில் பின்னால் அமர்ந்து செல்பவர்களும் ஹெல்மெட் அணிந்து செல்ல, தமிழக அரசு உத்தரவிட்டது. இதையடுத்து, கடந்த ௧ம் தேதி முதல் மாநிலம் முழுவதும் போலீசார் ஹெல்மெட் சோதனையில் ஈடுபட துவங்கினர்.ஹெல்மெட் அணியாத வாகன ஓட்டிகளுக்கு அபராதம் விதிக்கப்பட்டு, அவர்களது லைசன்ஸ் மற்றும் வாகனத்தின் ஆவணங்கள் பறிமுதல் செய்யப்படுகின்றன. ஐ.எஸ்.ஐ., தரச்சான்றிதழ் பெற்ற ஹெல்மெட் காட்டியபின் ஆவணங்கள் திரும்ப கொடுக்கப்படுகிறது.

இந்த ஹெல்மெட் கட்டாய உத்தரவை பயன்படுத்தி, சில போலீசார் வசூல் வேட்டையில் ஈடுபடவும் வாய்ப்பாக அமைந்துள்ளது.வாகன ஓட்டிகளிடம் லஞ்சம் பெறும் போலீசார் மீது கடுமையான நடவடிக்கை எடுக்கப்படும் என, தமிழக போலீஸ் இயக்குனரகம் தெரிவித்துள்ளது. இச்சூழலில், குற்றங்களை தடுக்க, லஞ்சம் வாங்கும் போலீசாரை கண்காணிக்க, போலீசார் கழுத்தில் கண்காணிப்பு கேமராவை பொருத்தும் திட்டம் அமல்படுத்துவது குறித்து ஆலோசிக்கப்பட்டு வருவதாக கூறப்படுகிறது.

இதுகுறித்து போலீஸ் வட்டாரங்கள் கூறியதாவது: போக்குவரத்து நெரிசலை ஏற்படுத்தும் வாகனங்கள் மற்றும் தாறுமாறாக நிறுத்தப்படும் பஸ்களை கண்காணிக்கவும், குற்றங்களை தடுத்து, லஞ்சம் வாங்கும் போலீசாரை கண்டறிய, போலீசார் கழுத்தில் கேமரா பொருத்தும் திட்டம் குறித்து ஆலோசிக்கப்படுகிறது. இதன்படி, போக்குவரத்து பணிகளில் ஈடுபடும் போலீசாரின் கழுத்தில் தொங்கவிடப்படும் கேமராவில் பதிவாகும் காட்சிகள் அனைத்தும், போலீஸ் கட்டுப்பாட்டு அறையில் பதிவாகும் வகையில், ஜி.பி.ஆர்.எஸ்., வசதி செய்யப்படும்.இந்த கேமராக்கள் மூலம் போலீசார் மட்டுமல்லாமல், குற்றச் செயல்களில் ஈடுபவர்களையும் கண்காணிக்க முடியும். இத்திட்டம், ஐதராபாத் போலீசில் விரைவில் அறிமுகப்படுத்தப்பட உள்ளது. இதேபோன்று தமிழகத்திலும் செயல்படுத்துவது குறித்து ஆலோசிக்கப்படுகிறது.இவ்வாறு அவர்கள் தெரிவித்தனர்.

விரைவில் இந்த கேமராவையும் ஹேக் செய்துவிடுவார்கள் காவல்துறையினர்!