மத்திய அரசு ஊழியர்கள் அனைவரும் சொத்து கணக்கு காட்ட அக்டோபர் 15 இறுதி கெடு: லோக்ஆயுக்தா சட்டப்படி உத்தரவு

புதுடெல்லி:
மத்திய அரசு ஊழியர்கள் அனைவரும் வரும்
அக்டோபர் 15ம் தேதிக்குள் தங்களின் சொத்துக்
கணக்கை காட்ட வேண்டும் என்று அரசு ஊழியர்
நலத்துறை உத்தரவிட்டுள்ளது.

மத்திய அரசு ஊழியர்கள் ஒரே ஆண்டில் ஒன்றுக்கு
மேற்பட்ட முறையில் சொத்துக்கணக்கு தாக்கல்
செய்ய வேண்டியிருக்கிறது. கடந்த மார்ச் 31க்குள்
அரசு ஊழியர் விதிகளின் படி, சொத்துக்கணக்கு
தாக்கல் செய்ய வேண்டும்.

அதை எல்லாரும் துறை வாரியாக சமர்ப்பித்து
வருகின்றனர். இதுதவிர, மத்திய அரசு ஊழியர்கள்
அனைவரும், லோக் ஆயுக்தா சட்டப்படி மீண்டும்
ஒரு விரிவான சொத்து மற்றும் கடன் கணக்கு
அறிக்கை தாக்கல் செய்ய வேண்டும்.

ஒவ்வொரு அரசு ஊழியரும் மார்ச் 31ம் தேதியை
அடிப்படையாக கொண்டதாக சொத்து அறிக்கையை
லோக் ஆயுக்தா அமைப்பிடம் சமர்ப்பிக்க வேண்டும்.
இதற்கு ஜூலை 31ம் தேதி வரை அவகாசம் தரப்படுகிறது.

எனினும், கடந்த ஆண்டு சொத்து அறிக்கையை
சமர்ப்பிக்க வேண்டிய அரசு ஊழியர்களுக்கு
செப்டம்பர் 15 வரை அவகாசம் தரப்பட்டது. அப்படியும்
பலர் தாக்கல் செய்யவில்லை. அதன் பின் டிசம்பர் வரை
அவகாசம் நீட்டிக்கப்பட்டது. பின்னர் மீண்டும் ஏப்ரல்
வரை நீட்டிக்கப்பட்டது. இப்போது மீண்டும்
அக்டோபர் 15 வரை இறுதி அவகாசம் தரப்பட்டுள்ளது.

அரசு விதிகள் படி மார்ச் மாதம் தாக்கல் செய்யும்
அறிக்கையில் சில சொத்துக்களை மறைக்க வாய்ப்பு
உள்ளது. ஆனால், லோக் ஆயுக்தா சட்டப்படி,
அரசு ஊழியர் மட்டுமின்றி, அவரின் மனைவியின்
சொத்து கணக்கும் தெரிவிக்கப்பட வேண்டும்.

அதனால் தான் பலரும் சொத்து கணக்கு அறிக்கை
தாக்கல் செய்ய தயங்குகின்றனர்.

வீடு முதல் ரொக்கம் வரை

அரசு ஊழியர்கள் ஏ, பி மற்றும் சி பிரிவு ஊழியர்கள்
என அனைவரும் சொத்துகணக்கு காட்ட வேண்டும்.
லோக் ஆயுக்தா சட்டப்படி புதிய விதிகளின் கீழ் இவர்கள்
அறிக்கை தர வேண்டும். கையில் இருக்கும் ரொக்கம்,
வங்கி டெபாசிட், பாண்டு, பத்திரங்கள் மூலம் முதலீடு,
பங்கு முதலீடு, இன்சூரன்ஸ் பாலிசிகள், பிஎப், கடன்கள்
என்று எல்லாம் அடங்கிய சொத்து அறிக்கை சமர்ப்பிக்க
வேண்டும்,
-------------------
தினகரன்