நிர்வாணமும் நீலவானமும்

by **M.Jagadeesan** Wed Jul 08, 2015 6:11 pm

அமாவாசை அன்றுதான் ஆடைதரிக்கிறது நிலவு
முழுநிலவு அன்றுதான் நிர்வாணம் நிலவுக்கு
ஆடைதரித்த நிலவு கண்ணுக்குத் தெரிவதில்லை
நிர்வாண நிலவே நீள்விசும்புக்கு அழகாகும்.

பகலெல்லாம் நிர்வாணமாயிருக்கும் வானம்
நட்டநடு நிசியில் மின்னும் நட்சத்திரம் பதித்த
பட்டுக் கருநீலப் புடவை கட்டிப்
பகட்டுடன் காட்சி அளிக்கிறது.

காலை வேளையிலே பாடுகின்ற பூபாளம்
நாள் என்னும் நங்கைக்கு நாமிட்ட ஆடை.
பாவம் பாலைவனங்கள்!
நிழல் என்னும் ஆடை இல்லாமல்
நிர்வாணமாய் நிற்கின்றன.

நீலவானம் கண்ணுக்கு அழகு
நிர்வாணம் பாலுக்கு அழகு
ஆம் !
ஆடை அணிந்த பாலை
யாரும் விரும்புவது இல்லை.

ஓடையிலே ஓடும் நீருக்குப் பூக்கள்
ஆடை அணிவித்து அழகைக் கூட்டும்.
சாலைகளின் ஆடை , வாகனங்களின் அணிவகுப்பு
வேலைநிறுத்தம் வந்தால் சாலைகளுக்கு நிர்வாணம்..

ஆடையற்ற நிலை உடலுக்கு நிர்வாணம்
அறிவற்ற நிலை மூளையின் நிர்வாணம்
பசியற்ற நிலை வயிற்றின் நிர்வாணம்
அமைதியுற்ற நிலை மனத்தின் நிர்வாணம்

by shobana sahas Wed Jul 08, 2015 10:44 pm

//ஆடையற்ற நிலை உடலுக்கு நிர்வாணம்
அறிவற்ற நிலை மூளையின் நிர்வாணம்
பசியற்ற நிலை வயிற்றின் நிர்வாணம்
அமைதியுற்ற நிலை மனத்தின் நிர்வாணம் //
மிகவும் அருமையான கவிதை அய்யா . நிர்வாணமும் நீலவானமும் 103459460