பழமொழிக்கு உயிர் கொடுக்கும் பெண்கள்: தினமும் ரூ.200 சம்பாதித்து அசத்தல்

by **ayyasamy ram** Wed Jul 08, 2015 4:00 am

சித்தாலப்பாக்கம்: 'கைத்தொழில் ஒன்றை கற்றுக்கொள், கவலை இல்லை ஒத்துக்கொள்' என்ற கவிமணி தேசியவிநாயகம் பிள்ளையின் பழமொழியை காப்பாற்றும் வகையில், கிராம வறுமை ஒழிப்பு சங்கத்தின் கீழ், மகளிர் சுய உதவி குழு ஒன்று, கைப்பை தைப்பதன் மூலம், தினசரி 200 ரூபாய் சம்பாதிக்கின்றனர்.

சென்னை அடுத்துள்ள சித்தாலப்பாக்கம் ஊராட்சி, சீனிவாசா நகர் 1வது தெருவில், அந்த பகுதிக்கான கிராம வறுமை ஒழிப்பு சங்கம் உள்ளது. அந்த சங்கத்தில் உள்ள 20 பெண்கள், தங்கள் வறுமையை ஒழிக்க, சுயதொழில் மேற்கொள்கின்றனர்.அதாவது, கடைகளில் இலவசமாக அளிக்கப்படும் துணியினால் ஆன கைப்பைகளை, தைத்து தரும் தொழில் செய்கின்றனர். அதை, அவர்கள், ஒத்த தொழில் என்று அழைக்கின்றனர். அதில், தங்கள் குழுவை, 'ஒத்த தொழில் தையல் பூச்சரம்' என்றும் அழைக்கின்றனர்.

தொழில் செய்வதற்காக, தாங்கள் உறுப்பினர்களாக உள்ள மகளிர் சுய உதவி குழுவிடம் கடன் பெற்று, அதை மூலதனமாக பயன்படுத்துகின்றனர். அந்த பணத்தின் மூலம் தையல் இயந்திரங்கள் வாங்கினர்.குழுவின் செயலர் மஞ்சுளா, 30, பொருளாளர் மோகனா, 38, ஆகியோர், சென்னை பாரிமுனையில் உள்ள மொத்த வியாபார கடைகளுக்கு செல்கின்றனர். அங்கு, கடை உரிமையாளரிடம், தங்களை பற்றி தெரிவித்து, கைப்பை தைத்து தரும் ஒப்பந்தம் எடுக்கின்றனர்.

பைகள் தைப்பதற்கு தேவையான துணிகளை, கடை உரிமையாளர்களிடம் இருந்து பெற்று கொள்கின்றனர். பின், குழுவில் உள்ள பெண்களிடம் அந்த துணிகள் பகிர்ந்தளிக்கப்படுகிறது.
ஒவ்வொரு பெண்ணும், தினசரி சராசரியாக 150 முதல் 200 பைகள் வரை தைக்கின்றனர். தைக்கும் பைகளுக்கு கூலி, பையின் அளவை பொறுத்து நிர்ணயிக்கப்படுகிறது. பொதுவாக ஒரு பை தைப்பதற்கான, தையல் கூலி 80 பைசா முதல் 1.50 ரூபாய் வரை கொடுக்கப்படுகிறது. அதன் மூலம், ஒருநாள் 200 பைகள் தைத்தால், ஒரு பெண்ணின் வருமானம் 150 முதல் 200 ரூபாய் ஆகும்.

பை தைக்கும் பெண்கள், தங்கள் வசதிக்கு ஏற்ப, தினக்கூலி, வாரக்கூலி என, பெற்றுக் கொள்கின்றனர். அதன்படி பார்த்தால், ஒரு பெண்ணின் மாத வருமானம், 3,000 முதல் 3,500 ரூபாய் வருகிறது.

தமிழ்நாடு மாநில ஊரக வாழ்வாதார இயக்கத்தின் கீழ், கிராம வறுமை ஒழிப்பு சங்கத்தை,
கடந்தாண்டு ஆரம்பித்தோம்.சித்தாலப்பாக்கத்தில் உள்ள, 55 மகளிர் சுய உதவி குழுக்களில், நாங்கள் மட்டுமே ஒத்த தொழில் செய்கிறோம். மேலும்,வருமானத்திற்காக, யாரையும் எதிர்பார்க்காமல், எங்கள் உழைப்பைமட்டுமே நம்பி, உழைத்துக்கொண்டிருக்கிறோம்.
சுதா, 32, உறுப்பினர்

மகளிர் சுய குழுவிடம் கடன் பெற்று தொழில் செய்யும் இந்தபெண்களுக்கு, ஊக்கம் அளித்தால் பல சாதனைகள் புரிவார்கள்.
மோகனா, 38, பொருளாளர்

தனியார் நிறுவனத்தில் பணிபுரியும், கணவரின் வருமானத்தில் குடும்பசெலவுகளை சமாளிப்பது கடினமாக உள்ளது. குழந்தைகள் இருப்பதால், என்னால் வேலைக்கு செல்ல முடியவில்லை. தற்பொழுது, ஒத்த தொழில் மூலம் வீட்டில் இருந்து, மாதம் 3,000 ரூபாய் சம்பாதிக்கிறேன். அதனால், வீட்டு செலவுகளை, நானே பார்த்துக்கொள்கிறேன்.
மஞ்சுளா, 30, செயலர்
---
தினமலர்