அமெரிக்க அழகியாக நடிகை ஒலிவியா ஜோர்டான் தேர்வு

-
64-வது அமெரிக்க அழகிப் போட்டி லூசியானா மாகாணத்தின் தலைநகரான படோன் ரவுக் நகரில் நேற்று முன்தினம் இரவு நடந்தது. 51 அழகிகள் பங்கேற்ற இதன் இறுதிச்சுற்றுக்கு 15 பேர் முன்னேறினர்.

இதில் ஆக்லஹோமா மாகாணத்தைச் சேர்ந்த 26 வயது ஒலிவியா ஜோர்டான் சிறந்த அழகியாக தேர்ந்தெடுக்கப்பட்டார். பாஸ்டன் பல்கலைக்கழகத்தில் பட்டப்படிப்பை முடித்த ஒலிவியா ஜோர்டான், ஹாட் டப் டைம்மெஷின், லைப்டைம் டெலிவிஷன் பைலட் ஆகிய ஆலிவுட் படங்களில் நடித்துள்ளார்.

அமெரிக்காவின் 2-வது பிரச்சினையாக எதை கருதுகிறீர்கள்? என்ற கேள்விக்கு மற்ற அழகிகள் சரியாக பதில் அளிக்கத் தவறினர். ஒலிவியா, “நாம் இன்னும் நாட்டில் இனப்பிரச்சினை பற்றி பேசிக் கொண்டிருக்கிறோம். அது இதுவரை தீர்க்கப்படாத ஒன்றாகவே உள்ளது. முதலில் அதைத் தீர்த்து வைக்க நாம் உண்மையாக உழைக்கவேண்டும்’’ என்றார்.

அவருடைய அசத்தலான இந்த பதிலே அவருக்கு அமெரிக்க அழகி பட்டத்தை பெற்றுத் தந்தது.

முன்னதாக, அமெரிக்க அழகிப்போட்டியை நடத்துபவர்களில் ஒருவரும், குடியரசு கட்சி சார்பில் ஜனாதிபதி தேர்தலில் போட்டியிட பிரசாரம் செய்து வருபவருமான டொனால்டு டிரம்ப், ‘அமெரிக்காவில் குடியேறும் மெக்சிகோவாசிகளில் சிலர் கற்பழிப்பு குற்றவாளிகளாகவும், போதை மருந்து கடத்தல்காரர்களாகவும் உள்ளனர்’ என்று கூறி பிரச்சினையை ஏற்படுத்தியிருந்தது, குறிப்பிடத்தக்கது.
=
தினத்தந்தி