ஐன்ஸ்டீன் பிரமித்த இந்தியர் –சத்யேந்திரநாத் போஸ்

-

இந்திய விஞ்ஞானிகளில் மிக முக்கியமானவர் சத்யேந்திரநாத் போஸ். இவர் ஐன்ஸ்டீனுடன் இணைந்து பல ஆய்வுகளைச் செய்திருக்கிறார். இவர்களது ஆய்வுக் கோட்பாடுகளுக்கு போஸ் – ஐன்ஸ்டீன் ஸ்டாடிஸ்டிக்ஸ் என்றே பெயரிடப்பட்டுள்ளது.
–
ஜெர்மன் மொழியில் இருந்த ஐன்ஸ்டீன் கோட்பாடுகளை ஆங்கிலத்தில் மொழிபெயர்த்தவர் போஸ். மேடம் கியூரியுடனும் இணைந்து பணியாற்றி இருக்கிறார்.
–
சத்யேந்திரநாத் போஸ் 1894 ஜனவரி 1ம் தேதி கொல்கத்தாவில் பிறந்தார். இவரது தந்தை சுரேந்திரநாத் போஸ். இவர் ரயில்வே ஊழியர். பணி நிமித்தமாக போஸின் குடும்பம் கோவா பாகூன் என்ற இடத்திற்கு மாறியது. அங்கு பள்ளிப் படிப்பை முடித்த போஸ், 1909ல் கல்கத்தாவில் பிரசிடென்சி கல்லூரியில் சேர்ந்தார். கல்லூரியில் அவருக்கு விஞ்ஞானி ஜகதீஷ் சந்திர போஸுடன் தொடர்பு கிடைத்தது. அதனால் போஸுக்கு அறிவியல் ஆர்வம் ஏற்பட்டது.
–
1913ல் பி.ஏ. கணிதத்தில் முதல் மாணவராகத் தேறிய போஸ், ‘யூனிவர்சிட்டி காலேஜ் ஆஃப் சயின்ஸ்’ கல்லூரியில் ஆசிரியராகச் சேர்ந்தார். அந்தக் கல்லூரியில் நூலகம் இல்லை. பல நூல்களை சேகரித்து தரமான நூலகத்தை மாணவர்கள் நலனுக்காக உருவாக்கினார் போஸ்.
–
ஐன்ஸ்டீனின் சார்பியல் கொள்கை அப்போது ஜெர்மன் மொழியில் இருந்தது. அந்த நூலை மொழி மாற்றம் செய்ய விரும்பிய போஸ், அதற்காகவே ஜெர்மன் மொழியைக் கற்றுத் தேர்ந்தார். அந்த நூலை ஆங்கிலத்தில் சிறப்பாக மொழி பெயர்த்தார்.
–
புகழ்பெற்ற இயற்பியல் விஞ்ஞானி மாக்ஸ் பிளாங்கின் கட்டுரைகள் அடங்கிய நூல் ஒன்று போஸுக்கு கிடைத்தது. அதன் தலைப்பு ‘தெர்மோடைனமிக்கும் வெப்பமும்’. இந்த நூலில் இயற்பியல் சமன்பாடுகள் மற்றும் குவாண்டம் பற்றிய விதிமுறைகளும் அதிகமாக இருந்தன.
–
அவற்றைப் படித்த போஸ், மாக்ஸ் பிளாங்கின் விதிமுறைகளை ஆய்வு செய்தார். பிளாங்கை விட அதிகமாக அவரின் தியரி பற்றி ஆராய்ந்து, ‘பிளாங்க்ஸ் லோ அண்ட் லைட் குவாண்டம் ஹைப்போதீஸிஸ்’ என்ற தலைப்பில் ஆய்வுக் கட்டுரைகள் எழுதினார்.
–
1921ல் அவர் டாக்கா பல்கலைக்கழகத்தில் ரீடராகச் சேர்ந்தார். தொடர்ந்து தான் மூன்று ஆண்டுகளாக எழுதிய கட்டுரைகளை புகழ்பெற்ற விஞ்ஞானி ஐன்ஸ்டீனுக்கு அனுப்பி வைத்தார். அக்கட்டுரைகளைப் படித்த ஐன்ஸ்டீன், போஸைப் பாராட்டி கடிதம் எழுதினார். ‘விஞ்ஞான உலத்திற்கு புதிய முயற்சி’ என்று பாராட்டியிருந்தார்.
–
அதன்பின் ஐன்ஸ்டீனின் நெருங்கிய மாணவராக போஸ் மாறினார். போஸின் கட்டுரைகளை ஐன்ஸ்டீனே ஜெர்மன் மொழியில் மொழிபெயர்த்து வெளியிட்டார். ஜெர்மனி சென்று சுமார் 20 வருடங்கள் ஐன்ஸ்டீ னிடம் ஆய்வாளராகப் பணி புரிந்த போஸ் 1945ல் இந்தியா வந்தார்.
–
தேசிய அறிவியல் காங்கிரஸ் தலைவராக அவருக்குப் பதவி வழங்கப்பட்டது. ‘போஸ் ஸ்டாடிஸ்டிக்ஸ்’ கண்டுபிடிப்பிற்காக அவருக்கு ராயல் சொசைட்டி யின் ‘ஃபெல்லோஷிப் விருது’ வழங்கப்பட்டது. 1954ம் ஆண்டு ‘பத்மபூஷண்’ விருதும் வழங்கப்பட்டது. இப்படி பல பெருமைகளைப் பெற்ற சத்யேந்திரநாத் போஸ் 1974ம் ஆண்டு பிப்ரவரி 4ம் தேதி மறைந்தார்.
–
சி.பரத்
நன்றி –(முத்தாரம்)-