முட்டிக்கால் மாறி தற்போது மொட்டைக்கைக்கும் “ஆப்பு’

-
–

ஈப்போ, 3 ஜூலை – முட்டிக்காலுக்கு மேலே உடை அணிவது சரியா தப்பா என்ற விவாதங்கள் சூடு பிடித்துள்ள நிலையில், தற்போது மொட்டைக்கைக்கும் தடை விழுந்துள்ளது. இந்த மொட்டைக்கைக்கு தடை விழுந்த சம்பவம் ஈப்போ மாநகர மன்றத்திற்கு வருகைப் புரிந்த ஒரு பெண்ணுக்கு நேர்ந்துள்ளது.

இயுனிஸ் சாய் (வயது 32) என்ற அந்த பெண், காலர் வைத்த மொட்டை கை வைத்த மேற்சட்டையும், ஜீன்ஸும் அணிந்து ஈப்போ மாநகர மன்றத்திற்குச் சென்றபோது, பாதுகாவலர்களால் தடுத்து நிறுத்தப்பட்டுள்ளார்.

தமது வணிக உரிமத்தைப் புதுப்பிப்பதற்காக அவர் மாநகர மன்றத்திற்குச் சென்றபோது, அங்குள்ள பாதுகாவலர்களில் ஒருவர் அவருடைய சட்டையில் “கை பகுதி” குறைவதாக கூறியுள்ளார்.

“அங்கு நான் என் நண்பருடன் இருந்தேன். நல்லவேளையாக அவரிடம் முழு கை வைத்த ஜேக்கட் மேலாடை இருந்ததால், அதனை வாங்கி அணிந்துகொண்டு உள்ளே செல்ல அனுமதிக்கப்பட்டேன்” என அப்பெண் தெரிவித்தார்.

“என் கால் முழுவதும் மூடியிருந்ததால், நான் அணிந்திருந்த ஆடை ஒழுக்கமானது என நினைத்தேன். ஆனால் எனக்கு இங்கு இந்த நிலைமை ஏற்படும் என நான் நினைக்கவேயில்லை” என அவர் தெரிவித்தார்.

“இடத்திற்குப் பொருத்தமான ஆடை அணிந்திருந்தும், மக்களை உடல் முழுவதும் மூடி மறைத்து விட்டு வருமாறு திரும்ப அனுப்புவது ஏற்றுக்கொள்ள முடியாத விஷயம்” என சாய் தெரிவித்தார்.

“ அதிகாரிகள் மற்றவர்களின் கலாச்சாரத்திற்கும் மதிப்பளிக்க வேண்டும் என்றார் அவர்”.

மாநகர மன்றத்தின் கதவுகளில் பொருத்தமான உடை எனும் பெயரில் ஒட்டப்பட்டுள்ள போஸ்டரில், முஸ்லிம் அல்லாதவர்கள் நீண்ட ஆடையும், கை பகுதி, முட்டி வரை இருக்க வேண்டும் என்றும் குறிப்பிட்டுள்ளது.

“தற்போது, வெயில்காலத்தால் எங்கும் வெப்பமாக உள்ளது. இது போன்று சீனர்கள் நீளமான ஆடைகளை அணிந்துகொண்டு வெளியே செல்வார்கள் என எதிர்ப்பார்க்க முடியாது என்றார் அவர்.

=
நன்றி- வணக்கம் மலேசியா.காம்