ஹெலன் கெல்லர்!

எழுத்தாளர், பேச்சாளர் என புகழ்பெற்ற ஹெலன் கெல்லர் அமெரிக்காவைச் சேர்ந்தவர். இவர் இளம் வயதிலேயே கண் பார்வை, கேட்கும் திறன், பேசும் திறன் ஆகியவற்றை இழந்தவர். ஆனாலும் தளர்வடையாத முயற்சியால் எவரும் செய்ய முடியாத சாதனைகளை படைத்தவர். அவரைப் பற்றி இங்கே அறிந்து கொள்வோம்!

ஹெலன் கெல்லர் 1880-ம் ஆண்டு ஜூன் 27-ந் தேதி பிறந்தார். பிறந்த சிறிது காலத்திலேயே தனது உணர்வுகளை சரியான முறையில் வெளிப்படுத்த முடியாத குறைபாடுகளுடன் காணப்பட்டார்.

1887-ம் ஆண்டு கெல்லர், அலெக்சாண்டர் கிரகாம் பெல்லின் உதவியோடு பார்வையற்றோருக்கான 'பெர்கின்ஸ்' பள்ளியில் சேர்ந்து படித்தார்.

ஒவ்வொரு பொருளாக தொட்டுத் தொட்டு உணர்ந்த கெல்லர், பார்வையற்றோருக்கான பிரெயில் எழுத்து முறையைக் கற்றுக் கொண்டார். ஆங்கிலம், பிரெஞ்சு, ஜெர்மன், கிரேக்கம், லத்தீன் ஆகிய மொழிகளை இயல்பாகவே கற்றுத் தேர்ந்தார்.

ராட்கிளிப் பல்கலைக்கழகத்தில் படித்து இளங்கலைப் பட்டம் பெற்றார். கண் பார்வையின்றி, காது கேளாமல் பல்கலைக்கழகத்தில் படித்து இளங்கலைப் பட்டம் பெற்ற முதல் பெண்மணி என்ற சிறப்பும் பெற்றார்.

கெல்லர் 'தி ஸ்டோரி ஆப் மை லைப்' என்ற தனது சுயசரிதையை எழுதினார். இவர் மொத்தம் 12 நூல்கள் எழுதி உள்ளார். அவரது நூல்கள் மராத்தி உள்ளிட்ட ஐம்பதுக்கும் மேற்பட்ட உலக மொழிகளில் மொழி பெயர்க்கப்பட்டு இன்றளவும் தலைசிறந்ததாக போற்றப்பட்டு வருகிறது.

உழைப்பாளர் உரிமை களையும், சோசலிச தத்துவத்தையும் ஆதரித்துப் பல கட்டுரைகளும், புத்தகங்களும் எழுதினார். இவர் தன் பெயரில் பார்வையற்றோர் நலனுக்காக லாப நோக்கற்ற அமைப்பை தொடங்கினார்.

1915-ம் ஆண்டு ஜார்ஜ் கெஸ்லர் என்பவருடன் இணைந்து 'ஹெலன் கெல்லர் சர்வதேச அமைப்பை' தொடங்கினார். கெல்லர் மாற்றுத் திறனாளிகளுக்கான வழக்குரைஞராகவும் திகழ்ந்தார்.

அமெரிக்கா ஐக்கிய நாடுகளின் மிக உயர்ந்த சுதந்திரப் பதக்கத்தை கெல்லருக்கு வழங்கி கவுரவிக்கப்பட்டது. அலெக்சாண்டர் கிரகாம்பெல், சார்லி சாப்ளின், மார்க் டுவெயின் போன்றவர்களுடன் நட்பு கொண்டிருந்தார். நியூயார்க்கின் சிறந்த பெண்மணியாகத் தேர்ந்தெடுக்கப்பட்டார். கண் இழந்தோர், காது கேளாதோருக்காக தனது 88 வயது வரை அயராது உழைத்தார்.

பக்கவாத நோயால் பாதிக்கப்பட்ட கெல்லர், 1968-ம் ஆண்டு ஜூன் 1-ந் தேதி உயிர் துறந்தார். அமெரிக்க வரலாற்றில் குறிப்பிடத்தக்க அம்சமாக முதன் முதலில் மாற்றுத் திறனாளியான ஹெலன் கெல்லருக்கு சிலை வைக்கப்பட்டது.

1904-ம் ஆண்டு கெல்லர், சல்லிவன் என்ற ஆசிரியருடன் நியூயார்க் சென்றார். அங்கு கெல்லருக்கு பேசக் கற்றுத்தர சாரா புல்லர் என்ற ஆசிரியை உதவினார். வாய் உதடுகள் மற்றும் நாக்கின் அசைவுகளைத் தொட்டுத் தொட்டு உணர்ந்து பேசக் கற்றுக் கொண்டார். தட்டுத் தடுமாறி பேசத் தொடங்கிய கெல்லர் தெளிவாகப் பேச முடியவில்லையே என்று மனம் தளராமல் முயற்சிகளை மேற்கொண்டார்.

பார்வையற்றோருக்கான பள்ளிகள் திறக்க உலக நாடுகள் பலவற்றுக்கும் சுற்றுப்பயணம் மேற்கொண்டார். அது மட்டுமல்லாமல் தேசிய நூலகம் ஒன்றையும் உருவாக்கினார்.