கடுகுகள் மூலம் 8 அடி உயர ஸ்ரீவில்லிபுத்தூர் ஆண்டாள் உருவம்:

-

-

—-

நாகை மாவட்டம், சீர்காழி பகுதியைச் சேர்ந்த இளைஞர் ஒருவர், கடுகுகளைக் கொண்டு 8 அடி உயரத்தில் ஸ்ரீவில்லிபுத்தூர் ஆண்டாள் உருவத்தை வடிவமைத்துள்ளார். இளைஞரின் சாதனை முயற்சியை இந்தியா புக் ஆஃப் ரெக்கார்ட்ஸ் அங்கீகரித்துள்ளது.

சீர்காழியை அடுத்த கொள்ளிடத்தைச் சேர்ந்த கைவினைக் கலைஞர் ஆர். பிரபு (35). இவர் சாதனை முயற்சியாக 8 அடி உயரத்தில் ஸ்ரீவில்லிபுத்தூர் ஆண்டாள் உருவத்தை ஓவியமாக வரைந்து, பின்னர் கடுகுகளைக் கொண்டு ஆண்டாள் உருவப்படத்தை வடிவமைத்துள்ளார். இவரின் இந்த சாதனை முயற்சியை இந்திய அளவில் சாதனைகளை அங்கீகரிக்கும் இந்தியா புக்ஸ் ஆஃப் ரெக்கார்ட்ஸ் அங்கீகரித்து பிரபுவுக்கு கடிதம் அனுப்பியுள்ளது. விரைவில் இந்த புத்தகத்தில் பிரபுவின் சாதனை இடம் பெறவுள்ளது.

இதுகுறித்து பிரபு கூறியது: சிறுவயது முதலே சாதனை படைக்க வேண்டும் என்ற சிந்தனை எனக்குண்டு. பொறுமையை அனைவரும் கடைப்பிடிக்க வேண்டும் என்பதை வலியுறுத்தவே, கடுகுகள் மூலம் ஆண்டாள் உருவத்தை உருவாக்கினேன்.

இந்த ஓவியத்தின் உயரம் 8 அடி, அகலம் 5 அடி. இந்த ஓவியத்துக்கு 750 கிராம் கடுகும், ஒரு கிலோ பசையும் தேவைப்பட்டது.

முதலில் ஆண்டாள் உருவத்தை ஒரு வெள்ளை சார்ட் அட்டையில் கோடுகளாக வரைந்துவிட்டு பின்னர் அந்த கோடுகள் மேல் பொற்கொல்லர்கள் பயன்படுத்தும் மூக்குத்தி கல் பிடிக்கும் கிடுக்கியை பயன்படுத்தி மிகவும் பொறுமையாக ஒவ்வொரு கடுகாக எடுத்து பசையில் தோய்த்து, சார்ட்டில் வரையப்பட்ட கோடுகள் மீது ஒட்டி ஓவியத்தை முடித்தேன். இந்த கடுகு ஓவியத்தை வடிவமைக்க 3 மாதங்கள் ஆனது. அரைமணி நேரம் ஓவியத்தை வடிவமைத்தால் எனக்கு 2 மணிநேரம் ஓய்வு தேவைப்படும் என்றார்.

-தினமணி