ஜெயலலிதா மீதான வழக்கில் மேல் முறையீடு: பட்டதாரி இளைஞர் தற்கொலை

by **ayyasamy ram** Mon 29 Jun 2015 - 6:15

ஜெயலலிதா மீதான சொத்துக் குவிப்பு வழக்குத் தொடர்பாக கர்நாடக அரசு மேல்முறையீடு செய்ததால், மனமுடைந்த பண்ருட்டி பகுதியைச் சேர்ந்த பட்டதாரி இளைஞர் சனிக்கிழமை விஷம் குடித்து தற்கொலை செய்து கொண்டார்.
-
கடலூர் மாவட்டம், பண்ருட்டி வட்டம், நன்னிக்குப்பம், மேட்டுத்தெருவைச் சேர்ந்தவர் ஆறுமுகம், விவசாயி. இவருக்கு 3 மகன்கள் உள்ளனர். இளைய மகன் சாந்தசீலம் (29). எம்.பி.ஏ. பட்டதாரி. இவர் அதிமுக மேலவை பிரதிநிதியாக உள்ளதாகக் கூறப்படுகிறது.
-
ஜெயலலிதா சொத்துக் குவிப்பு வழக்கு தொடர்பாக கர்நாடக அரசு அண்மையில் மேல்முறையீடு செய்தது. இதனால் மனமுடைந்த சாந்தசீலம் சனிக்கிழமை மாலை விஷம் குடித்து மயங்கி விழுந்தாராம். இவரை அருகில் இருந்தவர்கள் மீட்டு மருத்துவமனைக்குக் கொண்டு சென்றனர். எனினும், வழியிலேயே சாந்தசீலம் இறந்தார். தகவல் அறிந்த முத்தாண்டிக்குப்பம் போலீஸார் சடலத்தைக் கைப்பற்றி பண்ருட்டி அரசு மருத்துவமனைக்கு அனுப்பி வைத்து விசாரணை நடத்தி வருகின்றனர்.
-
எம்.பி., எம்எல்ஏக்கள் அஞ்சலி: இந்தச் சம்பவத்தை அறிந்த கடலூர் எம்.பி அருண்மொழித்தேவன், எம்எல்ஏக்கள் சொரத்தூர் ரா.ராஜேந்திரன் உள்ளிட்ட பலர் இறந்த சாந்தசீலம் உடலுக்கு அஞ்சலி செலுத்தினர்.
-
தினமணி