உருவுகண்டு எள்ளாதே !

உருவுகண்டு எள்ளாதே !
===========================

மடல்பெரிது தாழை மகிழினிது கந்தம்
உடல்சிறியர் என்றிருக்க வேண்டா-கடல்பெரிது
மண்நீரும் ஆகாது அதனருகே சிற்றூறல்
உண்நீரும் ஆகி விடும்.

இது ஒளவையாரின் மூதுரைப்பாடல். இப்பாடலின் பொருள்

தாழம்பூ மடல்களினாலே பெரிதாயிருக்கின்றது; மகிழம்பூ இதழ்களினால் சிறியதாக இருப்பினும் மணத்தினால் மிக இனிதாயிருக்கின்றது. கடல் மிகப் பெரிதாக இருக்கின்றது; ஆனால் , அக்கடல்நீர் உடம்பழுக்கைப் போக்குதற்கும் தகுதி உடையதாகாது. அக்கடலின் பக்கத்தே சிறிய மணற்குழியில் ஊறும் நீர் பருகுதற்கும் சிறந்த நீராகிறது. அதனால் , ஒருவரை உருவத்தினால் சிறியர் என எண்ணி அவமதிக்க வேண்டா; அவர் ஆற்றல் மிக்கவராகவும் இருக்கலாம்.

இவ்வுரையே, இப்பாடலுக்குப் பெரும்பாலான உரையாசிரியர்கள் கொள்ளுகின்ற பொருளாகும். இவ்வுரையின்படி தாழம்பூ , மடல்கள் பெரிதாக இருப்பினும் , மணமற்ற ஓரு பூ என்ற கருத்து வெளிப்படுகின்றது. ஆனால் தாழம்பூ மிக்க மணமுள்ள ஒரு பூ என்பதை நாம் அனைவரும் அறிவோம். " தாழம்பூவின் நறுமணத்தில் நல்ல தரமிருக்கும் " என்ற திரைப்படப்பாடல் கூட ஒன்று உள்ளது. அப்படியானால் " தாழை " என்ற சொல்லுக்குப் பொருள் என்ன என்ற கேள்வி எழுகிறதல்லவா?

" தாழை " என்ற சொல்லுக்குத் தென்னைமரம் எனப் பொருள் காண்பார் நச்சினார்க்கினியர்.

" தாழை விழுக்குலை உதிரத் தாக்கி " என்ற திருமுருகாற்றுப் படையின் வரிகளுக்கு உரை எழுதுங்கால் " தாழை " என்ற சொல்லுக்குத் தென்னைமரம் எனப் பொருள் கொள்கிறார்.

இப்போது மேலேகண்ட மூதுரைப் பாடலுக்குப் பொருள் காண்போம்.

தென்னை ஓலை பெரிதாக இருந்தாலும் சிறிதும் மணம் இல்லை.ஆனால் மகிழம்பூ உருவில் சிறியதாக இருந்தாலும் இனிய மணம் கொண்டது. கடல் பெரிதாக இருப்பினும் அந்த நீர் கழுவுவதற்கும் பயன்படாது ; ஆனால் கடல் அருகே இருக்கும் சிறிய ஊற்று நீர் குடிப்பதற்கும் பயன்படும். எனவே ஒருவரை அவர்தம் உருவத்தைக் கொண்டு மதிப்பிடலாகாது ; ஆற்றலைக் கொண்டே மதிப்பிடவேண்டும்.

எனவே " தாழை " என்ற சொல்லுக்குத் " தென்னை " என்று பொருள் கொள்வதே பொருத்தமாகும்.

நன்று ,அறிவு பூர்வமாக உள்ளது விளக்கம் .
தாழம்பூவின் பெரிய (வெளி )மடல்களை பற்றி கூறினார்கள் என நினைத்து இருந்தேன் .
அந்த பெரிய மடல்களில் வாசம் இருக்காது .
நன்றி ,jagadeesan .

ரமணியன்

-
தாழம்பூ இதழ்களினாலே பெரிதாயிருக்கின்றது,
மகிழம்பூ (இதழ்களினாலே சிறிதாயினும்) மணத்திலே
தாழம்பூவினும்) இனிதாயிருக்கின்றது,
-
இந்த விளக்கமே சிறப்பு உடையதாக இருப்பதாக கருதுகிறேன்...
-
பூ இதழ்களுக்கு இடையே உள்ள மணத்தைப் பற்றியது
என்பதால், தென்னை ஓலையைப் பற்றிய பேச்சுக்கே
இடமில்லை...